Slepo. Sorabisća a serbscy studenća z Drježdźan, Prahi a Lipska pod nawodom docentkow Lubiny Hajduk-Veljkovićoweje wot TU z Drježdźan a Katje Brankačkec z Prahi su so pjatk a sobotu w Slepom schadźowali.

Jako hosća běchu sej Lubinu Malinkowu ze Serbskeho instituta přeprosyli. Zhromadnje zeznachu wosebitu situaciju slepjanšćiny we wšelakich fasetach. Wosebity dźak słuša fararce Jadwize Malinkowej za dohlady do brunicoweje tematiki a za hospodowanje, Julianje Kaulfürstowej za nawod při warjenju prampaneho kała a wujasnjenja, Marekej Rjelce za předstajenje šule, Měranje Cušcynej za čitanje a Manfredej Her­mašej za witanje na Njepilic statoku w Rownom.

Wobdźělenje Praskich studentow je Towarstwo přećelow Serbow (SPL) spěchowało. Při zhromadnym warjenju, spěwanju a hraću nasta wotewrjena atmosfera­, w kotrejž móžachu so wšitcy wo swojim studiju a swojej motiwaciji, so ze serbšćinu zaběrać, wuměnjeć. Běše to prěnje tajke zhromadne zarjadowanje, kiž je so njehladajo na krutu zymu derje radźiło. Lubina Hajduk-Veljkovic

Přełožowanski program dźěła z nowym modelom za přełožk z němčiny do ­hornjoserbšćiny. Za wužiwarki a wužiwarjow to woznamjenja, zo dóstanu zwjetša kwalitatiwnje lěpši přełožk hač dotal.

Budyšin (SN). Nowy model skići šěrši a přiměrjeniši słowoskład a produkuje mjenje zmylkow a wuwostajenjow, Rěčny centrum WITAJ (RCW) tele dny zdźěli. Nimo toho móže program lěpje ze zestajenkami wobchadźeć. Tule je přikład: Sie haben ihr Ehegelübde erneuert. Po dotalnym modelu rěkaše přełožk: Woni su swoje mandźelske zwučowanje ponowili. Nowy model nětko zeserbšći: Woni su swój mandźelski slub wobnowili. Sotra pak móže při přełožowanju tekstow jeničce z pomocu być. Najebać wšitke polěpšenja tohodla zasadnje płaći, zo su wužiwarki a wužiwarjo za kwalitu přełožka zamołwići. Čim wjac konteksta jednotliwe słowa w sadźe maja, ćim lěpša je kwalita přełožka. Tohodla měli wužiwarjo sady ze znajmjeńša pjeć słowami zapodać.

Što je kompjuter a kak wón funguje? Tole zhonja dźěći w nowej digitalnej knižce z titulom „Hodowna misija – kompjuter“, kotruž je studijo Liška w Smjerdźacej wuwiło.

Smjerdźaca (SN/BŠe). Štóž ma nětko w zymskim času trochu chwile a wostudu pase, tomu móhł sćěhowacy poskitk studija Liška Smjerdźečanskeje wotnožki studija LUCIJA rjanu wotměnu skićić. Tamniši sobudźěłaćerjo su interaktiwnu serbsku digitalnu knihu za małych wotkrywarjow kompjutera wuwili. „Ideja za to je so z projekta zrodźiła“, wujasnja sobudźěłaćer ­studija Liška Stefan Gedik. Studijo bě zhromadnje z 2. lětnikom Worklečanskeje zakładneje šule kompjuterowy projekt přewjedł, při kotrymž so šulerjo z kompjuterom a wuhotowanjom zaběrachu. „By škoda było, to nadźěłane jenož za tónle projekt wužiwać. Tuž bě ideja, digitalnu knižku wšitkim zajimcam spřistupnić. Wona je takrjec we wobłuku hodowneho kompjuteroweho projekta w šuli nastała.“

Zo čłowjek wjace hač wosom rěčow nawuknje, sej mnozy předstajeć njemóža. Za Oleksandra Balycheva je to normalita, přetož wěnuje so kóždej nowej rěči z radosću, wćipnotu a jimacej chutnosću. 24lětny Ukrainjan bydli mjeztym tři a poł lěta w Drježdźanach. W aprylu 2022 bě wón wójny w Ukrainje dla jako ćěkanc do Něm­skeje přišoł. Dźensa studuje na Drježdźanskej Techniskej uniwersiće w masterskim studiju europske rěče a jeho ćežišćo je serbšćina. Do toho zabsolwowa w Ukrainje bachelorski studij redaktorskeho­ a korektorskeho dźěła, kiž bě sylnje na ukrainšćinu wusměrjeny. Hižo­ tehdy bě jemu jasne, zo chce so powołansce­ na kóždy pad z rěčemi za­běrać.

Bjez předznajomosćow za serbšćinu so přizjewił