Wo zmužitosć je w projektnym tydźenju 9. lětnika Slepjanskeje wyšeje šule šło. Tola po jenož jednym dnju je nawoda wyšeje šule Jan Hrjehor projekt po porokach staršich zakónčił. Časopis „Junge Freiheit“, nadregionalny forum prawicarjow, je najebać to po tym kampanju přećiwo Hrjehorjej zahajił.

Slepo (SN/jp). Projektny tydźeń pod hesłom „Zmužići młodostni we wuchodnej Sakskej namakaja perspektiwy“ běše poskitk załožby Amadeu Antonio, kotraž je w zwisku z temami rasizm, antisemitizm a prawicarski ekstremizm prawidłownje z partnerku šulow w Sakskej. Wot 16. do 20. měrca bě projekt planowany, dźiwadłowej pedagogowce z Berlina stej přichwatałoj, z kotrymajž załožba kooperuje. Po prěnim projektnym dnju so mać pola wjednistwa šule přizjewi. Wona rozprawješe, zo běše jeje dźěćo zamylace wobrazy na šmóratku měło.

Wobrazy pochadźeja ze šwicarskeho zešiwka, kiž ma młodostnym queerne žiwjenje wuswětlić. K tomu słuša wuměłsce inscenowane zwobraznjenje muži při splažnym wobchadźe. Dowolena je lektura materiala wot 16 lět, nic hakle wot 18 lět, kaž Sakske Nowiny pisaja.

Choćebuz (SN). Na Braniborskej techniskej uniwersiće (BTU) Choćebuz-Zły Komorow zahaja lětsa nazymu bachelorowy studij wučerstwa w primarnym schodźenku za serbšćinu jako druhi předmjet. Z tym so w Braniborskej prěni raz wučerjo za zakładnu šulu w tymle předmjeće wukubłuja.

Kubłanskopolitiska rěčnica Rady za naležnosće Serbow w Braniborskej (RASW) Delia E. Münchowa rjekny zašły pjatk na prezentaciji studijneho poskitka w braniborskim krajnym sejmje w Podstupimje: „Delnjoserbšćina je wot wotemrěća wohrožena rěč a trjeba nuznje posrědkowanje we wobłuku wučby na šulach. Wukubłanje na BTU nima jenož praktisku relewancu. Wone je zdobom samozrozumliwy wuraz kubłanišća jako uniwersita w dwurěčnej a bikulturnej Delnjej Łužicy.“ RASW běše poskitk zhromadnje z braniborskim ministerstwom za wědomosć, slědźenje a kulturu (MWFK), ze zastupjerjemi BTU kaž tež Serbskeho instituta předstajiła. Studij je jako do praksy integrowany bachelorowy studij koncipowany a ma so pozdźišo jako dualny masterowy studij dale wjesć.