Přichod Instituta za sorabistiku měł lěpje zawěsćeny być

Nawodnistwo Instituta za sora­bistiku Lipšćanskeje uniwersity, sobudźěłaćerjo a studenća měli zaso bóle ze sobu rěčeć. Tole bě jasne žadanje, kotrež wurosće ze zetkanja­ mjez zastupjerjemi Lipšćanskeho kubłanišća a serbskimi institu­cijemi we Łužicy minjenu wutoru w Lipsku. Po kotrym­ puću měło so to stać, maja sej wosebje studenća hišće wuwědomić. Damian Dyrlich rjekny: „Sym wjesoły, zo je so dźensniše zetkanje wotměło. By tež rjenje było, bychu-li studenća we wobłuku wuwučowanskich hodźin­ wjace składnosćow měli, z profesorom a docentami wo problemach rěčeć, kotrež w běhu studija nastawaja.“

Wjeselo wobradźiło je Kamjenske předewzaće za běrowowy serwis a personalne posłužby GMC dźensa Worklečanskej zakładnej šuli. Sobudźěłaćerka firmy Jana Hiccyna (naprawo) přepoda nawodnicy šule Luciji Kuškec a šulerjam šek w hódnoće 150 eurow. Pjenjezy wužiwać chcedźa za swoju lětušu nalětničku, kotraž ma cyle w znamjenju Jurja Brězana a jeho stotych posmjertnych narodnin stać. Šulerjo chcedźa potom swoju najlubšu knihu Brězana předstajić, spěwy po jeho tekstach nazwučować a wosebite łopjeno zhotowić. Snano dosahaja pjenjezy tež hišće za jězbu do Čornochołmčanskeho Krabatoweho młyna. Foto: Feliks Haza

Drježdźany (SN/MiR). Na 108. zakładnej šuli w Drježdźanach, na Hepkowej hasy w měšćanskim dźělu Strěžin, ma so wot šulskeho lěta 2016/2017 serbšćina po-dawać. Šula leži njedaloko Geisingskeje dróhi, na kotrejž je pěstowarnja, hdźež hižo wjacore lěta dźěći serbskorěčnje kubłaja­. Hišće móža zajimowani starši wupjelnić formular na internetnej stronje towarstwa Stup dale a tak swój zajim po­twjerdźić, zo měło so jich dźěćo na wučbje serbšćiny wobdźělić. Přizjewjenje po tymle puću je trěbne, zo bychu čłonojo towarstwa zwěsćili, kak wulka je po­trjeba, wuknjacych w zakładnošulskej starobje serbskorěčnje wuwučować. Přizjewić maja so tuchwilu wosebje starši, čejichž dźěći su so w lětach 2006 do 2010 narodźili. Tole přeje sej Drježdźanski regionalny zarjad Sakskeje kubłanskeje agentury, zo by zwěsćił aktualnu potrjebu za planowanje kaž tež tu na dalše lěta. Hišće w měrcu wotměja so rozmołwy mjez zarjadom a zastupjerjemi towarstwa Stup dale, zo móhli nadrobnišo planować. Loni w decembru bě předsyda towarstwa­ dr.

Berlin (SN). Wubědźowanje DenkT@g namołwja młodostnych w starobje 17 do 22 lět, so přez rešerše, teksty, interviewy a dalše projekty z prašenjemi prawicarstwa, hidy na cuzych a njetolerancy rozestajeć. To zdźěla zapósłanča zwjazkoweho sejma Marja Michałkowa (CDU). Patron wubědźowanja je předsyda zwjazkoweho sejma prof. dr. Norbert Lammert. Přinoški hodźa so hač do kónca oktobra zapodać. Najlěpše chcedźa klětu w januaru w Berlinje wuznamjenić. Dalše informacije namakaja zajimcy na internetnej stronje www.denktag.de.

Konrada Adenauerowa załožba bě wubědźowanje­ DenkT@g w lěće 2001 składnostnje dnja wopominanja woporow nacionalsocializma 27. januara iniciěrowała. Wurisanje wotměwa so kóžde druhe lěto.

„Runje w aktualnej situaciji měli iniciatiwu wužiwać, zo bychmy přez hidu na cuzych motiwowanym njeskutkam znapřećiwili, so z nimi rozestajeli a tak starobje wotpowědnje za naš přichod přinošowali“, piše Marja Michałkowa.