Minjenu wutoru rozšěri so po Worklecach zrudźaca powěsć, zo je po dołhej, sćerpnje znjesenej chorosći wučer a wjelelětny nawoda Worklečanskeje Serbskeje wyšeje šule „Michał Hórnik“ Siegfried Baumgärtel w starobje 76 lět zemrěł.
Wón narodźi so 7. nalětnika 1940 w Ralbicach, hdźež so mać sama wo njeho a lěto staršeho bratra staraše. Pod chuduškimi poměrami wonaj skromnje wotrosćeštaj. Sprawne a pilne žiwjenske nastajenje, kotrež jeho w dźěćatstwje formowaše, je sej čas zemskeho byća zachował. Zastupiwši 1946 do šule w Ralbicach dyrbješe hižo jako šulski młodźenc w prózdninach pola burow dźěłać. 1958 je nadarjeny hólčec wuspěšnje abituru złožił. Njemóžeše studować, dokelž njebě maćeri móžno ze swojej skromnej mzdu jako póstownica jeho a hižo studowaceho materielnje zastarać. Stipendij pak bu po statnych předpisach synomaj přistajeneje zapowědźeny. Dźěłaše tuž dwě lěće w płunokombinaće Čorna Pumpa, zo by pozdźišo na Pedagogiskim instituće w Budyšinje studować móhł.
