Poměrnje mało serbšćinarjow
Wjacore zakładne šule w dwurěčnej Łužicy wuwučuja šulerjow w serbskej rěči. K tomu słušatej mjez druhim Kulowska Krabatowa šula a šula Handrija Zejlerja we Wojerecach.
Wojerecy/Kulow (SN/MiR). W Kulowje maja w 1. lětniku lětsa dwě rjadowni, w kotrymajž 43 šulerjow wuknje. Cyłkownje je na šuli jědnaće rjadownjow wot 1. do 4. lětnika ze 224 šulerjemi. Někotři šulerjo maja jenož jednu hodźinu serbšćiny wob tydźeń, druzy tři. Šěsć dźěći w nowym 1. lětniku wuknje serbšćinu po koncepće 2plus a to intensiwnje z 13 hodźinami wučby w serbskej rěči wob tydźeń. Serbska rěč je wobchadna rěč w předmjeće serbšćina. W předmjetach wěcna wučba, ručne dźěło, nabožina maja wone bilingualnu wučbu.
Za rjanu a spodobnu serbšćinu
Počesća angažowanych młodostnych
Hižo pjaty raz počesći lětsa towarstwo Syć za dźěćace a młodźinske dźěło młodych ludźi, kotřiž so ze zapalom za druhich zasadźuja. Doba zapodaća namjetow so za dwě njedźeli zahaji.
Budyšin (SN/VaŽ). Myto za angažement młodostnych lěta 2025 dóstanu předewšěm projekty, iniciatiwy a towarstwa. Budyska wokrjesna lutowarnja kaž tež Wuchodosakska lutowarnja Drježdźany akciju spěchujetej.
Wosebity projekt w prěnim tydźenju
Wulki zajim za studij w domiznje
Zhorjelc/Žitawa (SN). 40 młodych žonow a muži je so dotal wo nowy poskitk studija wučerstwa w Zhorjelcu a Žitawje požadało. Wo tym je sćelak „Radijo Łužica“ rozprawjał. Rektor wysokeje šule Žitawa/Zhorjelc, Alexander Kratzsch, je z tutym wothłosom jara spokojom. Poskitk je nastał w kooperaciji z Lipšćanskej uniwersitu a je w Sakskej jónkrótny. Z nim chce sej Swobodny stat Sakska dosć wučerjow za wyše a spěchowanske šule w Hornjej Łužicy nakubłać.
Dohromady 60 městnow steji za nowy studij wučerstwa za wyšu šulu a za spěchowansku pedagogiku k dispoziciji. Požadanja najprjedy uniwersita Lipsk pruwuje. Požadarja abo požadarku, kiž wuměnjenja spjelnja, najprjedy Lipšćanska uniwersita imatrikuluje. Potom dóstanje namołwu, so za swojej předmjetaj na uniwersiće Žitawa/Zhorjelc zapisać.
Nowy studij so započnje w zymskim semestrje 2025/26. Zajimcy móža sej dwaj předmjetaj wupytać. Na wuběrk su: matematika, biologija, němčina a hospodarstwo/technika/domjacnosć/socialne. Swój praktikum budu na kubłanišću w Hornjej Łužicy absolwować.
Chorhoje před šulemi – wšo njejasne
Wokrjesny sejmik w Budyšinje je drje do prózdnin wobzamknył, zo měli po móžnosći před šulemi w nošerstwje wokrjesa chorhoje stajnje zmawować. Kak so to zwoprawdźi, pak jasne njeje.
Budyšin (mj/SN). Na lisćinje potrjechenych kubłanišćow stejitej tež powołanskej šulskej centrumaj w Kamjencu a we Wojerecach. Wjetšina wokrjesnych radźićelow je so po namjeće krajnoradneho zarjada za priority rozsudźiła. Hdźež njeje štyrjoch sćežorow za němsku, saksku, serbsku a europsku chorhoj, maja najprjedy němsku, potom saksku a serbsku chorhoj pójsnyć. We Wojerecach maja tři sćežory, potajkim by tam jenož europska chorhoj pobrachowała. Dokelž steji w serbskim sydlenskim rumje serbska chorhoj na prěnim městnje wobzamknjenych prioritow, bychu na sćežoromaj před Kamjenskim stejnišćom městno za serbske a němske barby měli.
Naprašowanje Serbskich Nowin pak je krótko do kónca prózdnin wunjesło, zo we Wojerecach wo tutej winowatosći hišće ničo zhonili njejsu. W Kamjencu njejsu sej ani wěsći, zo stej sćežoraj hišće kmanej za stajne wužiwanje.
Kedźbu při fotografowanju!
Njemóža ani wotchad wučerjow narunać
Sakski kultusowy minister Conrad Clemens (CDU) rěči jutře dopołdnja w Drježdźanach wo přihotach na šulske lěto 2025/2026. Tež we Łužicy so ludźo prašeja, kelko wučerjow budźe pobrachować.
Strašne a skurilne podawki na šulach
Nawodnistwa gymnazijow w Sakskej su zašłe šulske lěto 2024/25 wšo dohromady 277 „wosebitych podawkow“ přizjewili. Něhdźe 50 razow bě to hroženje z bombu abo nadpadom.
Drježdźany/Budyšin (SN/mb). Jeničce póndźelu poslednjeho tydźenja lětušeho róžownika dožiwi 16 gymnazijow po cyłej Sakskej tajke hroženje. To wuchadźa z lisćiny, kotruž je kultusowe ministerstwo wotmołwje kubłanskopolitiskej rěčnicy frakcije AfD w Sakskim krajnym sejmje Romy Penz připołožiło. Kaž hižo nastupajo tajke podawki na wyšich a zakładnych šulach (SN rozprawjachu) njejsu prašenje za staćanstwom wobdźělenych šulerjow a konsekwencami ze stron šulow wotmołwili, dokelž by hewak jedyn połnje dźěłacy sobudźěłaćer ministerstwa znajmjeńša tři njedźele z rešeršemi zaběrany był.
Uniwersiće pjenjezy pobrachuja
Wšudźe w kraju pjenjezy pobrachuja. Tole nětko tež uniwersitu w Lipsku potrjechi. Miliony eurow dyrbja tam w přichodnych lětach lutować. Wosebje małe studijne směry tole jara trjechi. Kak so tole na Institut za sorabistiku wuskutkuje, dźensa hišće nichtó rjec nochce a njemóže.
Lipsk (SN/MG). Lipšćanska uniwersita dyrbi lutować. Dohromady 16 milionow eurow jej faluje, dokelž kraj Sakska hižo wosebitu financielnu podpěru njepłaći. Tole zaleži na napjatym financielnym połoženju swobodneho stata. Jenička uniwersita Němskeje, na kotrejž maja institut za sorabistiku, ma lutować – nic pak na personalu a na kwaliće wuwučowanja, bě rektorka Eva Inés Obergfell wóndano w rozmołwje ze sćelakom MDR rjekła. W samsnej rozmołwje bě wona tohorunja prajiła, zo móhli přemyslować, hač „studijne směry, kotrež su jenož mało abo minimalnje wućežene, z druhimi předmjetami hromadu zwjedźemy.“ Sorabistika je jedyn z tych předmjetow, kotryž jeno mało studentkow a studentow studuja.
