Wšudźe w kraju pjenjezy pobrachuja. Tole nětko tež uniwersitu w Lipsku po­trjechi. Miliony eurow dyrbja tam w přichodnych lětach lutować. Wosebje małe studijne směry tole jara trjechi. Kak so tole na Institut za sorabistiku wuskutkuje, dźensa hišće nichtó rjec nochce a njemóže.

Lipsk (SN/MG). Lipšćanska uniwersita dyrbi lutować. Dohromady 16 milionow eurow jej faluje, dokelž kraj Sakska hižo wosebitu financielnu podpěru njepłaći. Tole zaleži na napjatym financielnym połoženju swobodneho stata. Jenička uniwersita Němskeje, na kotrejž maja institut za sorabistiku, ma lutować – nic pak na personalu a na kwaliće wuwučowanja, bě rektorka Eva Inés Obergfell wóndano w rozmołwje ze sćelakom MDR rjekła. W samsnej rozmołwje bě wona tohorunja prajiła, zo móhli přemyslować, hač „studijne směry, kotrež su jenož mało abo minimalnje wućežene, z druhimi předmjetami hromadu zwjedźemy.“ Sorabistika je jedyn z tych předmjetow, kotryž jeno mało studentkow a studentow studuja.