Ralbicy (SN/KSp/MG). Je to prěni raz, zo je sćelak MDR pěskowčika ze serbskimi wobsahami zrealizował. Dohromady třinaće epizodow, kotrež so ze serbskimi bajkami zaběraja, su tak zhotowili. Dźěćom Ralbičanskeje zakładneje šule a pěstowarnje su štyri krótkofilmy wčera, póndźelu, w tamnišej sportowni prezentowali. Epizody staj Eliza Płocienak-Alvarez a Lubina Hajduk-Veljkovićowa spisałoj. „Kito, Maja a potajna křinja“ serija rěka. Wosobam su Julija Mittagec, Mato Škoda a dźiwadźelnica Gabriela Marija Šmajdźina hłós spožčili. Wot 5. oktobra nowe serbske filmčki w telewiziji pokazuja a to stajnje njedźelu na sćelaku MDR z pomocu dwukanaloweho wusyłaja. Tež we Wuhladku epizody pokazaja. Wězo namakaće wšitke wobsahi tež online, na přikład na internetnej stronje serbskeho rozhłosa.