Krótkopowěsće (10.08.23)
Špatny WLAN wuknjacych trapi
Berlin. Špatny abo pobrachowacy WLAN mjenowaše 87 procentow woprašanych 14- do 19lětych młodostnych w reprezentatiwnym woprašowanju za Digitalny zwjazk Bitcom najnuzniši problem swojeje šule, jasnje před pobrachowacymi wučerjemi z 59 procentami.
Silicijowy zawod předała
Čorna Pumpa. Württembergska skupina Schmidt je zawod za produkciju silicija w Čornopumpskim industrijnišću na US-předewzaće Group14 Technologies předała. Nowy wobsydnik připowědźi, zo chce wšitkich 13 sobudźěłaćerjow přewzać a ličbu tutych srjedźnodobnje samo wo pjeć króć powjetšić. Produkowany silicij chce zhotowjerjam baterijow a akuwow dodawać. Tajki zawod předewzaća Altech ma w susodstwje nastać.
Dźeniki w Čěskej wohrožene?
Krótkopowěsće (09.08.23)
Kónčne wothłosowanje zahajili
Mnichow. Nakładnistwo Langenscheidt je po wuhódnoćenju wothłosowanja lisćinu kandidatow za němske „Młodźinske słowo lěta“ wozjewiło. Hač do 20. septembra móža zajimcy wotnětka online z dźesać namjetow tři słowa resp. wobroty za finale w septembrje wuzwolić. Lisćina wopřijima wopřijeća, kaž na přikład „Kerl*in“, „Digga(h)“ a wospjet akronym „Yolo“, skrótšenku za „Sy jenož jónu žiwy“.
Meyer sej kontrole žada
Zhorjelc. Zhorjelski krajny rada Stephan Meyer (CDU) je sej doraznje žadał nachwilne kontrole na němsko-pólskej hranicy zawjesć. „Přiběraceho ilegalneho zapućowanja migrantow a alarmowaceje aktiwity kriminelnych pašowarjow dla je nuznje trjeba, zo zwjazkowe knježerstwo hnydom jedna“, piše politikar we wčera wozjewjenym lisće zwjazkowej ministerce nutřkowneho Nancy Faeser (SPD).
Zelena Liga skorži jamy dla
Krótkopowěsće (08.08.23)
Z prezentaciju na kongresu
Praha. Lětuši Mjezynarodny kongres fonetiskich wědomosćow (ICPhS) so wot wčerawšeho hač do pjatka w Praze wotměwa. Na nim předstaji wědomostna sobudźěłaćerka Serbskeho instituta dr. Astrid Schmiedelowa rěčno-technologiske aspekty nastupajo předčitansku funkciju za hornjo- a delnjoserbšćinu.
„Wobswětowy check“ w złoće
Budyšin. Budyski hotel Best Western Plus bu z „wobswětowym checkom“ w złoće Němskeho zwjazka hotelow a hosćencow (DEHOGA) počesćeny. Certifikacija wobkrući prócowanja a inwesticije hotela ze štyrjomi hwězdami w minjenych lětach nastupajo škit wobswěta a klimy. Tak maja měd wot swójskich pčołkow. Tež rozsudźi hosć, hdyž maja jeho stwu rjedźić, tak přirodne resursy lutuja.
Čěske motory w ruskich trutach
Krótkopowěsće (07.08.23)
Porto za list najprjedy njezměnja
Bonn. Němski póst porto za list dočasnje na 85 centow zwyšić njesmě. Wotpowědnu próstwu je Zwjazkowa agentura za syće wotpokazała, kaž tuta dźensa w Bonnje informowaše. Koncern bě spis w meji zapodał, zo směł hižo klětu wudawkow za personal a energiju dla porto zwyšić a to lěto prjedy hač předwidźane. Po pruwowanju regulowanski zarjad zdźěli, zo njeje póst zwyšenje kóštow w dosahacej měrje dopokazał. Přećiwo rozsudej móže koncern DHL skoržić.
Druhi raz w Aziji
Lissabon. Na wšěch 1,5 milionow wěriwych wobdźěli so njedźelu na zakónčacej Božej mši Swětoweho zetkanja młodźiny w portugalskej stolicy Lissabon. Na kóncu mšě wozjewi bamž Franciskus, zo stolica Južneje Koreje Seoul přichodne swětowe zetkanje wuhotuje. Je to po 1995 hakle druhi raz, zo budźe swjatk w Aziji.
Křešćan Krawc z jubilarom
Krótkopowěsće (04.08.23)
Hudźbny festiwal zahajeny
Klětno. Při Klětnjanskim přistawje Bjerwałdskeho jězora su wčera festiwal „Break the Rules“ – najwjetši hudźbny podawk we Łužicy – zahajili. Hač do njedźele budźe tu wjace hač 50 hudźbnikow, přewažnje zastupjerjo hiphopa a rap-hudźby, na dohromady štyrjoch jewišćach wustupować. Wot 15 000 zastupnych lisćikow je jenož hišće mało na předań.
Maju zawru
Kulow. Nawodnistwo Kulowskeho předewzaća Maja je připowědźiło, zo kónc lěta zawod zawru. Z tym zhubi něhdźe 450 sobudźěłaćerjow producenta lochkomeblow swoje přistajenje. Za 27 wučomnikow chcedźa druhe wukubłanišćo namakać. Přičina tohole postupowanja je, zo njeje najwjetši nadawkidawar zrěčenje z Maju podlěšił.
Kak z Netrebko dale póńdźe?
Krótkopowěsće (03.08.23)
#WHY! goes international
Wojerecy. Wuznamjenjena komunikaciska a marketingowa strategija města Wojerecy je nětko tež mjezynarodnje prezentna. Informacije ze strony „#WHY – Wandel in Hoyerswerda“, kotraž je digitalne srjedźišćo prezentacije, móža sej zajimcy wotnětka tež w jendźelskej rěči zbližić. Logo je z „Welcome to Hoyerswerda“ wotpowědnje přiměrjeny.
Wjace přizjewjenych awtow
Kamjenc. Ličba přizjewjenych nowych jězdźidłow w Sakskej je prěnju połojcu lěta přirunujo ze samsnym časom loni wo 5,9 procentow přiběrała. Kaž statistiski krajny zarjad w Kamjencu zdźěla, su w prěnim połlěće tutoho lěta 58 345 jězdźidłow přizjewili. Wjace hač 75 procentow z nich běchu wosobowe awta. Runočasnje dósta 136 574 trjebanych awtow noweho wobsedźerja.
Pomnik Atatürka w Praze?
Krótkopowěsće (02.08.23)
Kulturno-politiske spěchowanje
Budyšin. Pod titulom „Aller.Land“ staji Zwjazk komunam wšo dohromady 70 milionow eurow spěchowanskich srědkow k dispoziciji. Z tym chce kulturu a demokratiju, wosebje we wjesnych kónčinach ze słabymi hospodarskimi strukturami, po cyłej Němskej spěchować. Zajimowani njech so hač do lětušeho 21. awgusta na krajnoradnym zarjedźe pod: přizjewja.
„Akademija přichoda“ we Łužicy
Choćebuz. Energijowa změna a jeje wužadanja steja w srjedźišću „Akademije přichoda“, kotruž zarjaduja přichodny tydźeń we Łužicy. Planowane su ekskursije, přednoški a rozmołwne koła k wobswětowym a techniskim prašenjam. Na šěroko zapołožene zarjadowanje wočakuja 50 młodostnych z Berlina a Łužicy.
Stawk w Kamjencu
Kamjenc. 3. tarifowe jednanje dźěłarnistwa ver.di z dźěłodawarjemi we wobłuku drobno- a transportneho wikowanja w Sakskej, Saksko-Anhaltskej a Durinskej njeměješe spokojacy wuslědk. Tuž chcedźa sobudźěłaćerjo wjacorych filialow Kauflanda, mjez druhim w Kamjencu na dróze Willy Muhle, jutře stawkować.
Krótkopowěsće (01.08.23)
ZDF so wot tweeta distancuje
Mainz. Rozhłosowy sćelak ZDF distancuje so wot wuprajenjow satirikarja Jana Böhmermanna, kotryž je w swojim tweeće wo stronje CDU jako „nacijach ze substancu“ rěčał. Tweet běše satiriski komentar na wuprajenja CDU-šefa Friedricha Merca na lěćnej klawsurje swojeje strony w Andechsu, w kotrejž běše swoju stronu jako „alternatiwu za Němsku ze substancu“ wopisał.
Čitanja w prózdninach
Bórkowy. Awtor knižneho rjada Sams Paul Maar, wotewrě dźensa wječor rjad zarjadowanjow w prózdninach w Literarnym salonje Blejcha w Bórkowach. Přichodne tydźenje předstaja tam awtorojo, kotřiž su jako mytowani Błótowskeho literarneho stipendija w hotelu přebywali, ze swojich tam spisanych tekstow.
Hród dale w nošerstwje gmejny
Krótkopowěsće (31.07.23)
Serbski sydlenski rum wuwiwać
Choćebuz. „Serbski sydlenski rum dyrbi so dynamisce wuwiwać móc“, praji zapósłanc Serbskeho sejma, Hanzo Wylem-Keł. Wón reaguje na njedawny wusud zarjadniskeho sudnistwa Choćebuz, kiž je po skóržbje gmejny rozsudźiło, zo wjes Wózwjerch tola do serbskeho sydlenskeho ruma njesłuša. Wylem-Keł sej tež wjac statneje podpěry za pěstowanje serbskich tradicijow žada.
Podpěruja analfabetow
Drježdźany. W Sakskej chcedźa hač do kónca lěta 2025 w cyłku 865 000 eurow ze swójskich srědkow a EU za alfabetizowanje nałožić. Nošer městnosće za koordinaciju naprawow je Zwjazk sakskich ludowych uniwersitow. Po informacijach kubłanskeho ministerstwa je w Sakskej něhdźe 300 000 ludźi, kotřiž maja problemy při čitanju a pisanju.
Nowe mjezynarodne lětanišćo
Krótkopowěsće (28.07.23)
Jězdźenki wot awgusta dróše
Budyšin. „Rozrost wudawkow nastupajo personal, ćěriwa, narunadła a wudźeržowanje zwiskow“ je Zaměrowemu wobchadnemu zwjazkej Hornja Łužica-Delnja Šleska (ZVON) z přičinu, jězdźenki wot 1. awgusta zdźěla podróšić. Potrjechene bilety za jednotliwca płaća potom znajmjeńša 10 a maksimalnje 80 centow wjace. Přerěznje powjetša so płaćizny wo 8 procentow.
Na FUEN-kongres
Flensburg. Federalistiska unija europskich narodnych skupin (FUEN) wotměje wot 7. do 10. septembra 2023 swój 67. kongres. Tónkróć zetkaja so zastupjerjo mjeńšinow w madźarskim měsće Pécs, kotremuž Němcy Fünfkirchen a Chorwaća Pečuh rěkaja. Zajimcy móža so hišće hač do 4. awgusta přizjewić a wuradźowanja live a po live-streamje sćěhować.
Testowa čara přepodata
