47 km/h přespěšnje jěł

Semichow. Spěšnosć měrili su srjedu na statnej dróze S 111 w Semichow (Semmichau) pola Hodźija. Tam je 70 km/h dowolenych. Wot 649 měrjenych jězdźi­dłow bě 18 přespěšnje po puću. Najnuznišo měješe wodźer Audija, kotrehož błysknychu ze 117 km/h. Wón ma 400 eurow pokuty płaćić, dóstanje dypkaj w Flensburgu a dyrbi měsac nóžkować.

Kolesa pokradnyli

Budyšin. Wosobowe awta, kotrež na terenje awtowych domow pod hołym njebjom steja, su stajnje zaso cil paduchow. Minjeny kónc tydźenja su sej njeznaći ­jedyn z Budyskich awtowych domow za padustwo wupytali. Kaž policija zdźěli, woni wot štyrjoch jězdźidłow wšitke kolesa wotšrubowachu. Jich hódnotu trochuja na něhdźe 16 000 eurow. Nimo ­toho načinichu skućićeljo něhdźe 22 000 eurow wěcneje škody. Kriminalna słužba pad přepytuje.

Při nurjenju znjezbožił a zemrěł

Hórki. Tragiske njezbožo při nurjenju je so sobotu dopołdnja w Hórčanskej skale stało. Tam bě skupina pólskich nurjakow we wodźe, jako so 52lětny muž nadobo ze strowotniskimi problemami bědźeše. Druzy jeho z wody wućahnychu a wo­žiwić započachu. Wuchowanske mocy dowjezechu jeho z helikopterom do chorownje. Tam muž krótko na to zemrě. Kriminalni technikarjo techniske wuhotowanje nurjaka přepytuja.

Awto přećiwo mopedej

Worklecy. Na křižowanišću pola Worklec do směra na Smječkecy je předwčerawšim k zražce mjez wosobowym awtom a mopedom dóšło. 56lětny wodźer VWja je tam z Worklec přijěł a chcyše přez křižowanišćo do Smječkec. Při tym njewobkedźbowaše wón wotprawa přijěduceho 17lětneho wodźerja mopeda a do njeho zrazy. Młodostny so při tym ćežko zrani. Wuchowanske mocy dowjezechu jeho do chorownje. Při zražce nasta něhdźe 7 000 eurow škody. Wobchadna słužba Zhorjelskeje policajskeje direkcije so z tym padom nadrobnišo zaběra.