Z alkoholom do přirowa
Pančicy-Kukow. Na wokrjesnej dróze 9238 pola Pančic-Kukowa je w nocy na wutoru k wobchadnemu njezbožu dóšło. 25lětny wodźer VW bě z dotal njeznateje přičiny w prawej křiwicy na lěwy bok puća zajěł a so do přirowa sunył. Při tym nasta něhdźe 5 000 eurow škody. Při wobdźěłanju njezboža policisća zwěsćichu, zo měješe wodźer awta 1,04 promile alkohola w kreji. Na to njedyrbješe wón jenož krej, ale tež swoju jězbnu dowolnosć wotedać.
Kolesa zaso přišrubowali
Bretnig. Kuriozne padustwo je so kónc tydźenja w Bretnigu stało. Njeznaći su wot Opela najprjedy štyri kolesa wotšrubowali a na to spinadła wottwarili. Skónčnje wšitke kolesa zaso přišrubowachu a so hakle potom zminychu.
Pos njeskutki wuslědźił
Biskopicy. Policajski pos je njedźelu w Biskopicach wjacore njeskutki wuslědźił. Najprjedy bě so na Neustadtskej wobchadne njezbožo stało, při kotrymž motorski do awta zrazy. Po zražce wodźer motorskeho ćekny. Při wobdźěłanju njezboža zasadźichu mjez druhim policajskeho psa. Tón wjedźeše zastojnikow do zahrodkownišća, hdźež bě so 36lětny zawinowar zražki schował. Wón přizna, zo bě njezbožo zawinił. Kaž so wukopa, njebě motorske přizjewjene a tež nic zawěsćene. Hamtske čisło njebě płaćiwe. Jězbnu dowolnosć muž njeměješe. Nimo toho steješe wón pod wliwom drogow.
Z nowymi črijemi ćeknył
Budyšin. Stare črije na nowe zaměnił je muž sobotu w nakupowanišću na Budyskej Delnjokinjanskej dróze. Jako chcyše kupnicu bjez płaćenja wopušćić, jeho sobudźěłaćer narěča. Na to muž strowotne problemy wudawaše, so wutorhny a ćekny. Nowe črije běchu něhdźe 45 eurow hódne. Hač při pytanju za skućićelom stare črije něšto pomhaja, njeje znate.
Wjacore njedostatki zwěsćili
Wóspork. Policija je póndźelu pola Wósporka ukrainski Mercedes Sprinter z připowěšakom kontrolowała a při tym wjacore njedostatki zwěsćiła. Tak bě awto 85 procentow přećežko nakładowane. Na připowěšaku zwěsćichu samo 150 procentow přewjele. Prědnje wokno Mercedesa bě wjacekróć puknjene, čehoždla wodźer přez nje scyła prawje hladać njemóžeše. Nimo toho běchu wobruče jězdźidła ze spikesami wuhotowane, štož w Němskej dowolene njeje. Dale pobrachowaše awtomatiske registrowanje jězbnych datow.
Wroble alarm zawinili
Wojerecy. Awtomatiski alarm je wčera rano we Wojerecach zasadźenje policije wuskutkował. Sobudźěłaćerjo wěstotneje słužby zdźělichu, zo su alarm w nakupowanišću při Kamjenskim kole registrowali. Na městnje policisća „skućićelow“ spěšnje wuslědźichu. Jednaše so wo wjacore wroble, kotrež běchu w nakupowanišću zamknjene, w nim tam a sem lětachu a na te wašnje alarm zawinichu. Z tym bě za zastojnikow zasadźenje wotzamknjene. W běhu wčerawšeho dnja móžachu ptački zaso do swobody lećeć.
W domje kable kradnyli
Miłoraz. W nocy na sobotu su so njeznaći do jednoswójbneho domu na Wochožanskim puću w Miłorazu w Trjebinskej gmejnje zadobyli. W domje wotstronichu namócnje wjacore koporowe kable kaž tež wšelake nastroje a wzachu je sobu. Rubiznu trochuje policija na něhdźe 3 000 eurow, wěcna škoda wučinja něhdźe 5 000 eurow. Hač jedna so wo twarjenje, z kotrehož su wobydlerjo přesydlenja wsy dla wućahnyli, z policajskeje rozprawy njewuchadźa.
Paducha lepili
Wojerecy. Z pomocu sobudźěłaćerja nakupowanišća móžeše policija we Wojerecach srjedu paducha lepić. Njeznaty muž bě sej w kupnicy na Lipeckim naměsće wjacore twory wzał a chcyše z nimi nimo kasy hić. Jako jeho sobudźěłaćer kupnicy na to narěča, so muž wutorhny a ćekny. Sobudźěłaćer za nim do bydlenskeje štwórće spěchaše. Při jednym z bydlenskich domow muž sobudźěłaćerjej durje před nosom zaprasny, při čimž jeho snadnje zrani. Škodowany na to policiju informowaše. Zastojnicy zwěsćichu w bydlenskim domje 47lětneho muža. Wobydler swój njeskutk přizna a spakosćene twory w hódnoće 30 eurow wróći. Wón změje so nětko podhlada rubježneho padustwa dla zamołwić. Kriminalna słužba Wojerowskeho policajskeho rewěra pad dale přepytuje.
W bydlenjach so posłužowali
Kamjenc. Po wšěm zdaću wjacore měsacy dołho su njeznaći w prózdnych wjaceswójbnych domach na Kamjenskej Fichtowej kradnyli. Kaž policija wutoru zhoni, wutwarichu z třoch bydlenskich blokow wšelki inwentar, mjez druhim milinowody, tepjenske roły a armatury. Po prěnim trochowanju nasta škoda we wobjimje šěsćcyfroweje sumy.
Kolesy so zesamostatniłoj
Narć. K nic runjewon wšědnemu wobchadnemu njezbožu su póndźelu popołdnju policiju na zwjazkowej dróze B 96 wołali. 53lětny wodźer transportera typa Mercedes Sprinter bě do směra na Wojerecy po puću. Z dotal njeznateje přičiny pušćištej so wobě kolesy na lěwym boku zadnjeje wóski a zrazyštej do napřećo jěduceho wosoboweho awta. Škoda wučinja něhdźe 5 000 eurow.
Rozestajenje na póstnicach
Kulow. Na póstniskim swjedźenju na Wojerowskej dróze w Kulowje je w nocy na póndźelu k namócnemu rozestajenju dóšło. 20lětny bě tam 25lětnemu z pjasću mjezwoči dyrił, tak zo dyrbješe so starši lěkarsce zastarać dać. Skućićel změje so nětko podhlada zranjenja ćěła dla zamołwić. Kriminalna słužba policije pad dale přepytuje.
Drogi brał a z awtom jěł
Němcy. 19lětneho wodźerja transportera su policisća njedźelu dopołdnja w Němcach zadźerželi. Drogowy test reagowaše pola njeho pozitiwnje na konop, amfetaminy a kokain. Młody muž dyrbješe na to krej wotedać.