Łaz (AK/SN). Dohromady 3,5 milionow eurow chce Łazowska gmejna lětsa do wšelakich naprawow inwestować. Ćežišća su centralne přizamknjenje k wopłóčkam w Běłym Chołmcu, Koblicach a Wulkich Ždźarach, dalše saněrowanje Wulkoždźarowskeje zakładneje šule kaž tež naprawy na pućach a při jězorach. Tole wuchadźa z hospodarskeho plana, kotryž su gmejnscy radźićeljo nětko wobzamknyli.
Runja druhim komunam načinjeja žadane wotpisanja tež we Łazu wulke starosće. Pod smužku hospodarskeho plana steji deficit 277 000 eurow. Po słowach komornicy Mandy Liepert tež přichodne lěta žadyn wurunany etat njezměja. Stanje-li so to dwójce za sobu a su-li wšitke zalutowanske a dochodowe móžnosće wučerpane, ma gmejna hospodarski strukturny koncept zdźěłać, kaž komornica rozłoži.
Kulow (AK/SN). Po Mariji Popjelinej dóstanje město Kulow dalšu dnjowu mać za zastaranje dźěći. Wot septembra nastupi Katrin Welsowa swoju słužbu w Brěžkach. Jednohłósnje su ju měšćanscy radźićeljo do systema hladanja dźěći w měsće přiwzali.
„Marija Popjelina je jako dnjowa mać derje wućežena, chce pak za dwě lěće přestać“, rozłožuje Kulowska zamołwita za dźěćace a młodźinske dźěło Beate Hufnagel. „Je tuž wažne so sčasom za naslědnicu rozhladować. Starši sej dnjowe maćerje swójbneho wobchadźenja dla jara waža. To chcemy wobchować.“
Předsydźa a naměstnicy wólbnych wuběrkow gmejnow zarjadniskeho zwjazka Při Klóšterskej wodźe su na komunalne wólby přichodnu njedźelu derje přihotowani.
Pančicy-Kukow (SN/JK). Komunalne wólby w gmejnach zarjadniskeho zwjazka Při Klóšterskej wodźe přichodnu njedźelu su poslednje wólby za přichodnej lěće.
W pjeć gmejnach zarjadniskeho zwjazka wola wjesnjanostu a krajneho radu. W Lejnje, Zejicach a Časecach ma so přidatnje wjesna rada wolić. We Wotrowje a Pančicach-Kukowje budu wólby najskerje spěšnje wotzamknjene. Tam wola jeničce krajneho radu. Wjesnjanosta Markus Kreuz (CDU) bu hakle loni do swojeho zastojnstwa wuzwoleny.
Rozsudne wólby (Stichwahl) 28. junija drje trěbne njebudu, chibazo woprawdźe kóždy z kandidatow samsnu ličbu hłosow dóstanje. To pak so po słowach Alfonsa Ryćerja skerje njestanje, dokelž maja so wobydlerjo serbskich gmejnow pak jenož mjez dwěmaj kandidatomaj rozsudźić pak jenož jednoho wolić.
„Budyšin je wulkotne město. Budyšenjo nochcedźa politisce w sćinje Drježdźan abo Lipska stać. Mój zaměr je sylnić hospodarstwo a turizm sprjewineho města. Ale tež sylniše sobuskutkowanje wobydlerjow na wšitkich rozsudach město nastupajo steji na mojim planje, wosebje wokomiknje palaca tema ćěkancy.“
Jörg Urban je sej za móžne zastojnstwo Budyskeho wyšeho měšćanosty wjele předewzał. Wón wě, zo je Budyšin dwurěčny. Tohodla je jemu wažne, serbskosć w měsće jako dźěl identity Łužicy dale skrućić. Wón wobhladuje dwurěčnosć jako bohatosć města a scyła jako zakład, rěče nawuknyć a tolerantny być. W tym nastupanju ma sam nazhonjenja w swójbje. Je ženjeny z Rusowku, a jeju tři dźěći wotrostuja w žiwej němsko-ruskej dwurěčnosći. Za wjace serbskosće w měsće a za dalše skrućenje serbskeho wědomja chce Urban skutkować, štož je po jeho słowach bytostniše hač turizm na kóšty serbskich nałožkow a tradicijow.
Nowe towarstwo załožili
Budyšin. „Willkommen in Bautzen“ rěka towarstwo, kotrež su wčera w Budyskim Kamjentnym domje załožili. Iniciatorojo su čłonojo zwjazkarstwa „Budyšin wostanje pisany“. Za předsydu wuzwolichu Svena Scheidemantela. W Fischbachu bydlacy je sobustaw Budyskeho wokrjesneho sejmika za frakciju Lěwica.
Biskop Koch woteńdźe
Berlin/Drježdźany. Katolski biskop Drježdźansko-Mišnjanskeje diecezy dr. Heiner Koch ma so po informacijach powěsćernje dpa z nowym Berlinskim arcybiskopom stać. 59lětny nastupi naslědnistwo Rainera Marije Woelkeho, kiž bě loni w septembru do Kölna wotešoł. Heiner Koch je wot lěta 2013 biskop w Drježdźanach a je sej tam mjeztym wjele připóznaća zdobył.
Čěska česći Jana Husa
Praha/Husinec. W zwisku z bližacej so 600. róčnicu spalenja nabožinskeho reformatora Jana Husa wotměwaja so w Čěskej republice wjacore zarjadowanja na jeho česć. Čěska telewizija wusyłaše minjene dny nowy třidźělny hrajny film wo idealach a tehdyšej dobje Husa. W jeho ródnym měsće Husinecu su wopomnišćo ponowili.
Hórki (aha/SN). W třicetych lětach minjeneho lětstotka běchu na česć padłych Hórčanow w Prěnjej swětowej wójnje wosrjedź wsy wojerski pomnik postajili. W NDRskim času drje wosta wón stejo, bu pak lědma hladany. W lěće 1995 su pomnik wo někotre metry přestajili. Podstawk, nahladny postament z Hórčanskeho zornowca, bu znowa namurjowany. Dwaj metraj wulku a tři tony ćežku postawu němskeho wojaka je tehdy wjesnjan Rudij Koch ze swojim bagrom typa 174 přestajił. Do fundamenta połožichu kasetu z pjenjezami hišće z NDR- skeho časa, z někotrymi mjeztym „twjerdymi“ pjenjezami, z wudaćemi Serbskich Nowin, Katolskeho Posoła a dźenika Sächsische Zeitung kaž tež wjesnu chroniku.
Hłowna přičina přestajenja bě, zo měješe so připrawić tafla z mjenami w Druhej swětowej wójnje padłych Hórčanow a zo měła wona widźomna być. Mjeztym stej so dalšej lětdźesatkaj minyłoj. Mjena padnjenych na prěnjotnej tafli běchu lědma hišće čitajomne. Hłowa wojaka kaž tež třělba, kotruž dźerži, běštej wobškodźenej.
Kulow (AK/SN). Swoje wohnjowe wobory chce město Kulow solidnje wuhotować. Tole předwidźi dalewjedźenje wohnjowoborneho plana města, kotryž je tamniša měšćanska rada na swojim zašłym posedźenju schwaliła. Prěni tajki plan běchu 2009 wobzamknyli. Kóžde pjeć lět ma so wón dale wjesć a aktualizować.
Wot lěta 2013 je wohnjowa wobora cyłu wodowódnu syć komuny analyzowała. Tak nětko wědźa, kelko hašenskeje wody je na kotrym dypku k dispoziciji. „Wulke ćežišćo je meblowy zawod Maja. Do wohnjowoborneho plana smy nětko dokładnje zapisali, zwotkel móžemy tam wodu brać, a wěmy, hdźe maja w zawodźe awtomatiske hašenske systemy, nasćěnowe hydranty a dalše připrawy“, rozłožuje nawoda Kulowskich wobornikow Jurij Brösan. W nuzowym padźe móža tuž spěšnje zakročić. W měsće a na wokolnych wsach su tež tajke sensibelne dypki zwěsćili, hdźež je často wjele ludźi. K tomu słušeja wobě šuli, pěstowarnje, starownje a hladarnje, Sulšečanski młyn a tamniša pjekarnja. Na teritoriju města maja dale zwjazkowu dróhu, dwě statnej a štyri wokrjesne dróhi. Tež wone płaća jako potencielnje strašne dypki.
Woheń pod třěchu wudyrił
Slepo. Krótko do połnocy dyrbjachu wčera wobornicy w Slepom woheń w jednoswójbnym domje hašeć. Na zbožo móžachu so třo dorosćeni a dwě dźěsći sami wuchować. Třěchu dyrbjachu zdźěla wotkryć, zo móhli z njeje sapace płomjenja podusyć. Wěcnu škodu trochuja na wjacore dźesaćitysacy eurow.