Wědomostnicy w Błótach

Choćebuz. Wědomostnicy z dźesać krajow swěta přebywaja dźensa w Błótach. Wulět k Łužiskim Serbam w Braniborskej je dźěl witanskeho programa slědźerjow. Mjez nimi staj stipendiataj programa BRAIN, sociologa a slědźer wo mjeńšinach Giovanni Picker z Italskeje a specialist za słowjanske rěče Boban Arsenijević ze Serbiskeje.

Zaso 40 000 wobydlerjow

Budyšin. Ličba wobydlerjow Budyšina je lětsa w prěnim kwartalu zaso hranicu 40 000 překročiła. Dnja 31. měrca běchu dokładnje 40 004 z hłownym bydlenjom w měsće přizjewjeni, kaž Budyski statistiski wotrjad piše. Hłowna přičina je přiběraca ličba požadarjow wo azyl. Pozitiwny trend zwěsćeja tež nastupajo porody.

Katamaran so dliji

Zły Komorow. Wot 1. junija běchu jězby z katamaranom wot Złokomorowskeho na Lejnjanski jězor předwidźane. Nowa wosebita łódź pak dotal hišće hač do Złeho Komorowa dojěła njeje. Kaž jednaćelka łódźnistwa Marianne Löwa praji, přewjedu tam jězby z wosebitej łódźu najskerje hakle wot 15. junija. Łódź ma 5. abo 6. junija z wosebitym transportom dojěć.

Hry znowa napjate byli

Zasadny rozsud měšćanskeje rady za wulki swjedźeń 2016

Kulow (AK/SN). 15. Krabatowy swjedźeń ma so klětu w Kulowje wotměć. K tomu je so měšćanska rada wčera jednohłósnje wuznała. Při planowanju hospodarskeho etata 2016 chcedźa zarjadowanje z 15 000 eurami wobkedźbować.

Krabatowe towarstwo swjedźeń kóždolětnje z partnerami regiona a ze so­bustawskimi komunami, towarstwami a zwjazkami organizuje. Kulow přisłuša towarstwu wot jeho załoženja. Lěta 2008 běchu swjedźeń w Sulšecach wuhoto­wali. „Sulšečenjo su tehdy wulke měritka sadźeli. Cyła wjes bě wupyšena“, podšmórny zastupowacy měšćanosta Georg Szczepanski (CDU). Dźakowano wulkemu angažementej wjesneje zhromadnosće je tónle Krabatowy swjedźeń mnohim hišće derje w pomjatku. Na njón móhł Kulow nětko nawjazać, wšako maja na měšćanskim torhošću Krabatowu stelu­. Nimo toho bu Krabat 2. junija 1704 w Kulowje pochowany, na čož dopomina wopomnjenska tafla.

Paducha dosahnyli

Budyšin. Z wobrotniwym jednanjom móžachu zawčerawšim w Budyšinje paducha­ kolesa lepić. Na Drjewowych wikach­ bě 17lětny swoje koleso njezamknjene wotstajił a do wobchoda šoł. Paduch składnosć wuži, šwikny so na koło a z nim wotjědźe. Jako to młodostny pytny­, wón za ćěkacym skućićelom spěchaše a hromadźe z pasantami 34lětneho pakostnika­ dosćahny. Jeho přepo­dachu mjeztym alarmowanej policiji.

Tež w Němcach su swjatkownu póndźelu při wětrniku swjećili. Wětrnikowe towarstwo ze swojimi 28 sobustawami je stany natwariło a wšitko wurjedźiło, tak zo móžachu nětko 18. raz hosći witać. Towarstwo běchu 1996 załožili.

Lětsa móžachmy 300 wopytowarjow witać. Wučerka Daniela Crügerowa a Susann Kumerowa wěcywustojnje po młynje wodźeštej a ludźom rozłožowaštej, kak běchu tam hač do kónca wójny žito mlěli. Wulki zajim bě tohorunja za wustajeńcu rasowych nukli, kotrež plahowarjo kóždolětnje na terenje wětrnika wustajeja. Dźěći móžachu paslić a na ponyju jěchać. Wulki nawal knježeše při kofejpiću, dokelž porjedźachu hosćom słód­ny samopječeny tykanc. K tomu zaklinča samo live-hudźba. Mnozy pospytachu so tež w plećenju korbikow, štož sobu­dźě­łaćerjo domu „Žiwjenska pomoc“ poskićachu. Wšitkim čłonam a dobrowólnym pomocnikam wutrobny dźak za aktiwne sobudźěło.
Achim Nowak