W tydźenjach do jutrow w mnohich domjacnosćach jutrowne jejka debja. ...
Wo serbskej rjekowce slědźił
Drježdźany (SN/at). Ewangelska Serbowka Marja Simonowa (1824–1877) je w 19. lětstotku sobu zakłady połožiła za dźensniše skutkowanje Čerwjeneho křiža a za moderne hladanje chorych. Zo je so pućrubarka humanitarneje pomocy ze Sakskeje znowa wotkryła, za to dźakuje so sakski Čerwjeny křiž Andréjej Uebe z rudnohórskeho Beierfelda. Tam nawjeduje wón wot lěta 1995 Sakski muzej čerwjeneho křiža.
Za tutu zasłužbu kaž tež za swój žiwjenski skutk počesća „čłona Čerwjeneho křiža z ćěłom a dušu a historikarja ze zajima“ z Mytom Castiglione Čerwjeneho křiža Němskeje (DRK). Wuznamjenjenje, kotrež spožča lětsa prěni raz, přija André Uebe přichodnu wutoru w Drježdźanach, kaž dr. Kai Kranich, nowinski rěčnik sakskeho DRK, informowaše. „Marja Simonowa bě serbska žona. Biografiske mězniki pokazuja, zo njebě jeje pozdźiše wuwiće samozrozumliwe, a wopodstatnjeja, čehodla je njezabyta rjekowka“, rěka w nowinskej zdźělence.
Hakle loni su jeje wobnowjene rownišćo na Drježdźanskim pohrjebnišću swj. Trojicy znowa přepodali.
Krótkopowěsće (23.02.24)
Wusud na dobro prawow mjeńšin
Luxemburg. Europske sudnistwo (EuGH) je štwórtk skóržbu Rumunskeje přećiwo planowanej Europskej wobydlerskej iniciatiwje za sylnjenje regionow a mjeńšin (EBI) wotpokazało a z tym prawa narodnych mjeńšin w Europje sylniło. Iniciatiwa zasadźuje so za lěpše připóznaće a spěchowanje regionow z hospodarskimi, socialnymi a kulturnymi wosebitosćemi w EU.
Na druhi protest z tvBunt
Budyšin. Swój hłós z pisanej dujerskej hudźbu přećiwo prawicarskemu ekstremizmej a za čłowjeskosć a demokratiju pozběhnyć, tomu słuži njedźelu wot 14 hodź. dalša demonstracija na Hłownym torhošću w Budyšinje. Protest ma wotewrjene město pokazać a měri so přećiwo wobrazej póndźelnych akcijow. Přeprošuje zwjazkarstwo tvBunt. Wočakuja kapału „Banda Comunale“ z Drježdźan.
Boja so pušćenych z jastwa
Kandidatka perspektiwu změnja
Wo wšelake poskitki so nětko spěšnje požadać
Biskopicy (SN/MiR). Socialne zarjadnišća wabja tuchwilu za wobsadźenje swobodnych městnow w socialnym dobrowólnym lěće a w zwjazkowej dobrowólnej słužbje (BFD). Tutej naprawje stej dobra składnosć sej swoje zamóžnosće wuwědomić abo so na nowy žiwjenski puć přihotować.
Dźěłowy kruh so zetka
Ze zhromadnej skazanku je tuńšo
Wjesne dobrowólne wohnjowe wobory Hamorskeje gmejny běchu w lěće 2020 prěnje w Zhorjelskim wokrjesu, kotrež su indiwiduelnje přiměrjenu drastu dóstali. Zo je nětko nowa trěbna, ma jara zwjeselacu přičinu.
Hamor (CK/SN). Škitnu drastu za wjace hač 42 000 eurow chce Hamorska gmejna za swoje dobrowólne wohnjowe wobory kupić. Přičina za to je jara zwjeselaca. Wot lěta 2020 je ličba wobornikow wo dohromady 29 přiběrała, to woznamjenja, zo maja dźensa 15 procentow wjace kameradow w aktiwnej słužbje hač před štyrjomi lětami, informuje nawoda hłowneho zarjada Arian Leffs. „To je wulkotny wuslědk, na kotryž chcemy nawjazać, mjez druhim tež z dźěłom w młodźinskej woborje“, wón praji.
Nakupowanišćo zachować
Wobydlerska zhromadźizna so z wikowanjom w měsće zaběrała
Wojerecy (AK/SN). Wobydlerjo Wojerec chcedźa nakupowanišćo Treff 8 napřećo klinikumej jako centralne zastaranišćo za přichod zachować. Wón ma potencial za dalše wuwiće. Nowe centralne wikowanišćo „Kinajchtska hola“ widźa woni kritisce. To je facit wobydlerskeje zhromadźizny wčera we Łužiskej hali, hdźež wobjednachu drobnowikowanje a koncept wikowanišćow. Na přeće wuběrka za měšćanske wuwiće je měšćanske zarjadnistwo zhromadźiznu zwołało. Něhdźe 420 wobydlerjow je přišło.
Termin dotwara šule přestorčeny
Zwjazuja kompjuterowu a serbsku rěč
Budyšin (SN/MiR). Na Budyskej Sukelnskej pola towarstwa „Dźěłań dźeń“ kaž tež w Serbskim domje pola projekta LUCIJA hraja nowe medije wažnu rólu. „Wěnujemy aktualnu dźěłarničku wuwiwanju aplikacijow“, rjekny projektowy koordinator LUCIJE Michał Cyž, „naš zaměr je, na hižo předležacym powjerchu swójske objekty a grafiki instalować.“ Kónčny produkt ma być wupłód zwjazanosće techniskich wuměnjenjow z fantaziju młodych ludźi, kotřiž so w koděrowanju wuspytaja. Z koděrowanjom dawaja młodostni programej přikazy, zdobom zwučuja so we wužiwanju kompjuteroweje rěče. „Nam słuži za to digitalna rěč Java Script, kotraž hodźi so tež za produkty w serbskej rěči wužiwać“, rjekny Feliks Šołta, referent dźěłarnički. Kilian Bjarš měni: „Sym hižo dołho na tym zajimowany wuslědźić, kak móžu w programach dźěłać.“ A Simon Herfurth rjekny: „Mje woprawdźe wabi swójsku aplikaciju wuwiwać.“ Wobaj so toho nadźijataj, zo budźe tónle pjatk na wobrazowce produkt widźeć, kotryž staj kóždy po swojim słodźe na hižo wobstejacej platformje wuwiłoj.
