Smjerdźaca (SN). W zhromadnym dźěle z Wokrjesnym sportowym zwjazkom Budyšin poskići Serbske šulske towarstwo šulerjam wot 1. do 4. lětnika prózdninske dny. Tute přewjedu w Kubłanskim srjedźišću LIPA w Smjerdźacej a to wot 22. do 26. awgusta, stajnje wot 9 do 15 hodź. Prózdninski poskitk wjerći so dokoławokoło sporta. Wobdźělnicy změja móžnosć, so we wšelakich sportowych družinach wuspytać, nowe sportowe družiny a nastroje ze­znać a so cyle jednorje zhromadnje pohibować!

Dale planuje Serbske šulske towarstwo w Smjerdźečanskim kubłanskim srjedźišću LIPA swójbne stanowanje. ­Te wotměje so wot 27. do 28. julija. Nimo zhromadneje wječerje skići so móžnosć, za bulom honić, wolejbul hrać, so wječor při wohenju rozmołwjeć a hry hrać. ­Rano po rańšim sporće přihotuja a přewjedu zhromadnu snědań, z kotrejž ­přenocowanje zdobom zakónča. Popłatk na dorosćeneho wučinja wosom eurow, na dźěćo dwaj euraj.

Přizjewjenja za poskitkaj přijimuja hač do 15. julija e-mailnje pod abo pod telefonowym čisłom: 0172/78 119 59.

Rubježnu trójku wuslědźili

Hamor. Akribiske přepytowanja Běłowodźanskeje kriminalneje słužby su policiju na slědy třoch paduchow wjedli. Skućićeljo w starobje 18, 20 a 34 lět su zamołwići za wjacore padustwa w zašłych lětach wokoło Hamora. Přećiwo nim přepytuja wosebje ćežkeho padustwa w ně­hdźe 25 padach. Minjene dny su jich ­bydlenja w Běłej Wodźe a Hamoru přepytali a dopokazy zawěsćili. Kaž w rozprawje Zhorjelskeje policajskeje direkcije dale ­rěka, wuslědźichu w braniborskim ­Derbnom wjetši padušny skład třoch podhladnych. Tam namakachu najwšelakoriše mašiny a samo twarsku amplu. Nětko dyrbi policija zwěsćić, kotra ru­bizna z kotreho padustwa pochadźa.

Budyšin. Dźeniki fararja Bogumiła Šwjele (1897–1945) steja w srjedźišću knižneho předstajenja z přełožerku a wudawaćelku Annett Brězanec jutře, štwórtk, w 19 hodź. w Budyskej Smolerjec kniharni. Šwjela słuša jako redaktor, rěčewědnik a sobuzałožer Domowiny k najwuznamnišim wosobinam serbskich stawiznow. Nimo swojeho wobšěrneho skutkowanja je zapisował nimale poł lětstotka serbsko-němski wšědny dźeń a podawki tehdyšeho časa. Při tym skići tohorunja dohlady do swojeho powołanskeho a priwatneho žiwjenja. Wšitcy zajimcy su jutře na knižne předstajenje wutrobnje přeprošeni.

Njeswačidło (JK/SN). Wjesnjanosta Gerd Schuster (CDU), kotryž bu při wólbach wjesnjanosty Njeswačanskeje gmejny jako jenički kandidat z wulkej wjetšinu hłosow znowa wuzwoleny, připowědźi wčerawše posedźenje gmejnskeje rady jako mały jubilej, mjenujcy jako 30. posedźenje w tuchwilnej wólbnej dobje.

Bydlenski dom při něhdyšim ryćerkuble, kotryž bě gmejna hižo před něšto ­časom zjawnje na předań wupisała, je nětko skónčnje předaty. Na kóncu zwostachu třo zajimcy, z kotrychž so molerski mišter Kriewitz, kotryž ma swój zawod w Njeswačidle, přesadźi a dom gmejnje wotkupi. Twarjenje budźe dale jako bydlenski dom wužiwany a nowy wobsedźer ma hižo plany, jón tež ­pod aspektami pomnikoškita wobnowić a bydlenja přenajeć.