Po wuwiću minjenych lět bě skoro wočakować, zo Alexander Ahrens (SPD) zastojnstwo wyšeho měšćanosty města Budyšina zakitować njebudźe. Přejara bě widźeć, zo so jemu poradźiło njeje, z měšćanskej radu hromadźe na dobro města skutkować. Zo su wolerki a wolerjo z Karstenom Vogtom wčera mužej najwyše zastojnstwo města dowěrili, rěči za charakter wjelelětneho nawody tudyšeho Melanchthonoweho gymnazija, ludźi hromadu zwjesć móc. To je nuznje trěbne, dokelž njesmě změna strukturow sprjewine město dospołnje wobeńć. Z wólbnym wuspěchom Karstena Vogta sunje so powědanje znowa do srjedźišća, kotrež měješe so před sydom lětami z wuzwolenjom Alexandera Ahrensa wuwróćić. To pak njeje so zešlachćiło. „Bjez CDU w měsće ničo njeń­dźe“ wone rěkaše. Dźensa zda so to začuće być, z kotrymž zwjazuje nětko wjace hač štwórćina wólbokmanych Budyšanow swoju nadźiju na bórzomny rozmach w komunje. Axel Arlt

Sakska socialna ministerka Petra Köpping w Běłej Wodźe pobyła

Běła Woda (AK/SN). Wokrjesna chorownja w Běłej Wodźe ma jako wobłuki přesahowacy strowotniski centrum dołhodobnje dale wobstać. Přichodnje budźe wukubłanska chorownja Drježdźanskeje mediciniskeje uniwersity. Runočasnje ma wona jako akademiske wuwučowanišćo w hladanju we wobłuku kubłanja ­Ži­ta­wsko-Zhorjelskeje wysokeje šule skut­kować. „To je přikładne w Sakskej. Zho­r­jelski wokrjes je modelowy region mediciniskeho zastaranja“, podšmórny sakska statna ministerka za socialne a towaršnostnu zwjazanosć Petra Köpping (SPD) na dźěłowym wopyće minjeny štwórtk w Běłej Wodźe. Tam je wona zhromadnje z krajnym radu Berndom Langu (CDU), socialnej decernentku Martinu Weber, někotrymi sobudźěłaćerjemi chorownje, zo zastupnikami chorobnych kasow, samostatnych lěkarjow a z dalšimi fachowcami na městnje wo přichodźe Běłowodźanskeje chorownje wuradźowała.

Tydźeń mjeńšinowych rěčow

Lipsk. Institut za sorabistiku Uniwersity Lipsk kaž tež towarstwo ERIU stej dźensa „Tydźeń europskich mjeńšinowych rěčow“ zahajiłoj. Hač do pjatka maja zajimcy móžnosć, so z čitanjemi, seminarami a koncertami ze šotiskej gelišćinu, ze serbšćinomaj, z kymrišćinu a iršćinu zeznajomić. Mjez druhim wuhotujetaj je „narodny poet Walizow“ Ifor ap Gyn a japanski sorabist prof. Goro Kimura w sociokulturnym centrumje Villa Leipzig.

Wjele zajimcow přišło

Lubij. Na tradicionalnych wukubłanskich wikach Insidertreff zawčerawšim w Lubiju witachu organizatorojo tysacow zajimcow. Wjac hač 130 wustajerjow je tam atraktiwne wukubłanske poskitki w domiznje předstajiło a wo dorost wabiło, při čimž bě lětuše ćežišćo strowotniski wobłuk.

Sudetscy Němcy w syći

Kulow (AK/SN). Za porjedźenje komunalnych pućow a mostow nałožuje město Kulow přichodne měsacy 110 000 eurow. Tole zdźěli zastupowacy twarski nawoda města Frank Kral na zašłym posedźenju měšćanskeje rady.

„Planowane je, puć do Noweje Wsy wot wodočisćernje hač k mostej saněrować“, Kral rozłoži. Dale chcedźa saně­rować dźěl Wojerowskeje dróhi w Kulowje a puć wot Salowa do Koćiny. Nimo toho ponowja přijězd ke gratowni Kulowskeje wohnjoweje wobory. Tu jedna so wo 120 metrow dołhi wotrězk Srjedźneho puća. A skónčnje ma tež móst w Nowej Wsy nowu hornju asfaltowu worštu dóstać.

Derje pokročuja dźěła na wjesnej dróze w Mučowje wot kromy wsy ze směra Brěžkow hač k zwjazkowej dróze B 96. Po informacijach Franka Krala maja twarske dźěła hač do kónca julija wotzamknjene być. Přichodne předewzaće budźe kolesowanska šćežka wot Brěžkow do Mučowa. Prěni twarski wotrězk chcedźa spočatk julija twarić započeć.