Smochćicy. Radijowy sćelak MDR Kultur wusyła njedźelu, 25. februara, w 10 hodź. live Božu mšu ze Smochčanskeje cyrkwje swj. Bena. Celebrant budźe farar Bernhard Dittrich, kiž tohorunja prěduje. Hudźbne wobrubjenje na starosći změja cyrkwinscy hudźbnicy Drježdźansko-Mišnjanskeho biskopstwa pod nawodom Christiana Bonatha. Hudźbnicy wobdźěla so na dalekubłanju, kotrež so kóžde lětom w Smochćicach wotměwa.
13. schadźowanka swójbow
Chrósćicy. Rěčny centrum WITAJ a Kamjenska župa „Michał Hórnik“ přeprošujetej na schadźowanku swójbow njedźelu, 3. měrca, wot 15 hodź. do Chróšćanskeje „Jednoty“. Pisany program zahaja mali rejwarjo „Łužičanki“. Přizamknu so dźěłarnički a zaběry za najmłódšich, mjez druhim paslenje, dźěćacy sport a čitanski róžk, a za trochu staršich eksperimenty, kuzłanje, nowe medije a krosnowanje. Dale předstaja so Serbski muzej, Němsko-Serbske ludowe dźiwadło a Ludowe nakładnistwo Domowina z najnowšimi poskitkami za swójby a dźěći. Starši maja składnosć so z fachowcami wo rěčnych kursach a rěčnym kubłanju rozmołwjeć abo při kofeju a tykancu bjesadować.
Wulka Dubrawa (UM/SN). Hakle před něšto tydźenjemi je regionalny wuběrk za strukturne wuwiće po brunicy nowotwarej pěstowarnje we Wulkodubrawskim wjesnym dźělu Chwaćicy přihłosował. Wčera dyrbješe wjesnjanosta Hardy Glausch (njestronjan) radźićelow wo zdźělence z Drježdźan informować, zo so dalše planowanje najprjedy raz dale njespěchuje. Kak nětko dale pokročuja, dotal jasne njeje. Poprawom chcychu nowu Chwačansku pěstowarnju lětsa planować a jednotliwe dźěła wupisać, zo móhli 2025 twarić započeć.
Ale je tež zwjeselacych powěsćow z gmejny. „Wjeselu so, zo je wutwar Martina Hoopoweje na prioritnej lisćinje Budyskeho wokrjesa za dróhotwarske spěchowanje zakótwjeny. Mam to za jara wažny projekt, kotryž móžemy nětko zwoprawdźić“, praji Wulkodubrawski wjesnjanosta. Hoopowu mjenuja we wobydlerstwje tež „Pampuchowy puć“, dokelž nadeńdźeš tam na spočatku a na kóncu puća pjekarjow Menzela a Jeremiasa. Rozrisać dyrbja při tym předewšěm prašenje kanalizacije.
Šoferojo wosobowych a nakładnych awtow měli na dróhach nětko zaso bóle kedźbować. Pućowanje amfibijow je so mjenujcy zaso započało. Tohodla su při pućach amfibijowe płoty nastajene.
Njeswačidło (SN/MWj). Mjeztym něšto dnjow čerwjenobrjuchata kunkawa (Rotbauchunke), kobołkowa krokowa (Knoblauchkröte), łuhata žaba (Moorfrosch) a hatny mološ (Teichmolch) zaso pućuja. Amfibije nastaja so na puć ze swojich zymskich kwartěrow k městnam njerkanja. Wutwarjeneje wobchadneje syće dla, kotraž krajiny a žiwjenske rumy rozrězuje, dyrbja wone tež dróhi přeprěčić, štož je žiwjenja strašny akt.
Drježdźany (SN/at). Ewangelska Serbowka Marja Simonowa (1824–1877) je w 19. lětstotku sobu zakłady połožiła za dźensniše skutkowanje Čerwjeneho křiža a za moderne hladanje chorych. Zo je so pućrubarka humanitarneje pomocy ze Sakskeje znowa wotkryła, za to dźakuje so sakski Čerwjeny křiž Andréjej Uebe z rudnohórskeho Beierfelda. Tam nawjeduje wón wot lěta 1995 Sakski muzej čerwjeneho křiža.
Za tutu zasłužbu kaž tež za swój žiwjenski skutk počesća „čłona Čerwjeneho křiža z ćěłom a dušu a historikarja ze zajima“ z Mytom Castiglione Čerwjeneho křiža Němskeje (DRK). Wuznamjenjenje, kotrež spožča lětsa prěni raz, přija André Uebe přichodnu wutoru w Drježdźanach, kaž dr. Kai Kranich, nowinski rěčnik sakskeho DRK, informowaše. „Marja Simonowa bě serbska žona. Biografiske mězniki pokazuja, zo njebě jeje pozdźiše wuwiće samozrozumliwe, a wopodstatnjeja, čehodla je njezabyta rjekowka“, rěka w nowinskej zdźělence.
Hakle loni su jeje wobnowjene rownišćo na Drježdźanskim pohrjebnišću swj. Trojicy znowa přepodali.
Wusud na dobro prawow mjeńšin
Luxemburg. Europske sudnistwo (EuGH) je štwórtk skóržbu Rumunskeje přećiwo planowanej Europskej wobydlerskej iniciatiwje za sylnjenje regionow a mjeńšin (EBI) wotpokazało a z tym prawa narodnych mjeńšin w Europje sylniło. Iniciatiwa zasadźuje so za lěpše připóznaće a spěchowanje regionow z hospodarskimi, socialnymi a kulturnymi wosebitosćemi w EU.
Na druhi protest z tvBunt
Budyšin. Swój hłós z pisanej dujerskej hudźbu přećiwo prawicarskemu ekstremizmej a za čłowjeskosć a demokratiju pozběhnyć, tomu słuži njedźelu wot 14 hodź. dalša demonstracija na Hłownym torhošću w Budyšinje. Protest ma wotewrjene město pokazać a měri so přećiwo wobrazej póndźelnych akcijow. Přeprošuje zwjazkarstwo tvBunt. Wočakuja kapału „Banda Comunale“ z Drježdźan.
Boja so pušćenych z jastwa
Biskopicy (SN/MiR). Socialne zarjadnišća wabja tuchwilu za wobsadźenje swobodnych městnow w socialnym dobrowólnym lěće a w zwjazkowej dobrowólnej słužbje (BFD). Tutej naprawje stej dobra składnosć sej swoje zamóžnosće wuwědomić abo so na nowy žiwjenski puć přihotować.
Wjesne dobrowólne wohnjowe wobory Hamorskeje gmejny běchu w lěće 2020 prěnje w Zhorjelskim wokrjesu, kotrež su indiwiduelnje přiměrjenu drastu dóstali. Zo je nětko nowa trěbna, ma jara zwjeselacu přičinu.
Hamor (CK/SN). Škitnu drastu za wjace hač 42 000 eurow chce Hamorska gmejna za swoje dobrowólne wohnjowe wobory kupić. Přičina za to je jara zwjeselaca. Wot lěta 2020 je ličba wobornikow wo dohromady 29 přiběrała, to woznamjenja, zo maja dźensa 15 procentow wjace kameradow w aktiwnej słužbje hač před štyrjomi lětami, informuje nawoda hłowneho zarjada Arian Leffs. „To je wulkotny wuslědk, na kotryž chcemy nawjazać, mjez druhim tež z dźěłom w młodźinskej woborje“, wón praji.