Budyšin (SN/bn). Pod hesłom „Juro Mětšk – Spominanja“ bu předwčerawšim lětuši, wot Załožby za serbski lud wuhotowany koncertny rjad „Musica nova sorabica – Tradicija + eksperiment“ na žurli Budyskeho Serbskeho muzeja zahajeny. Něhdźe 40 wopytowarjow mytowaše naročny, wuběrnje interpretowany program na česć loni zemrěteho „wusahowaceho serbskeho wuměłca, kiž słuša k najwuznamnišim komponistam swojeje generacije“, kaž moderator Sebastian Elikowski-Winkler wuzběhny, ze sylnym přikleskom. Nimo twórbow Mětška, kaž na přikład „SENZA ...“ za sopranowy saksofon solo, „Gaby ja kśidła měł“ za sopran a klawěr a dwě z „Třoch ludowych spěwow za hłós a klawěr“, předstajichu spěwarka Anna Korondi, husler Malte Hübner, bračist Martin Flade, saksofonist a klarinetist Gerold Gnausch, pianist Martin Schneuing a rěčnica Lisa Čornakowa „kruchi komponistow, kotrychž bě Mětšk wobwliwował“, kaž Elikowski-Winkler rozłoži.