„Słowo lěta“: Nowotwórby šěrić, wopřijeća wožiwić, z rěču so zaběrać

Budyšin (SN/bn). Ludowe nakładnistwo Domowina a Serbske Nowiny wuhotujetej tež lětsa zaso digitalne wothłosowanje wo „Hornjoserbskim słowje lěta“ (HSSL). Wotnětka hač do 13. decembra přijimujetej zarjadowarjej akcije w tym zwisku namjety čitarstwa. Wěcywustojna jury fachowcow budźe je pruwować a wo jich přiwzaću do wothłosowanskeje lisćiny rozsudźić. Mjez hižo dochadźanymi słowami resp. wobrotami jewja so na přikład wopřijeća „klimowy (při)lěpjer“, „pačenski potencial“, „pašowar“ a „wudźeržliwy“, kotrež so lětsa předewšěm w politiskim rozprawnistwje často wužiwachu. „Wotměškowak“ kaž tež „třemjeńtny“ wopisujetej posledni palenčk, kajkiž sej ludźo po wopyće kulturnych zarjadowanjow abo korčmy ducy domoj rady popřeja. Najnowši neologizm dotal drje je „ritak“ – što so za nim chowa so hišće njepřeradźi. Hač so (wšitke) tele přikłady naposledk do lisćiny přiwozmu, pak hišće wěste njeje. Po jeje wozjewjenju 18. decembra maja čitarki a čitarjo hač do 28. decembra móžnosć wothłosować, a to tónraz jenož hač do 12 hodź.