Z wudaća: póndźela, 29 junija 2015

Z busom do Hochozy

Radwor. Štóž nochce za dwaj tydźenjej mjezynarodny folklorny festiwal jenož w Hornjej Łužicy dožiwić, móže sej pjatk, 10. julija, na přijomne wašnje tež do Hochozy dojěć. Šmitec wozydłownistwo poskića za to busowu jězbu. Wotjězd budźe we 18 hodź. z Chrósćic, z Hochozy wotjědźe bus w 1 hodź. Jězba płaći na wosobu 25 eurow, w płaćiznje zapřijaty je zastup na Hochožanskich statokach. Přizjewjenja přijimuja Šmitecy pod telefonowym čisłom 035935/ 28 60.

Přednošuje wo łosach

Stróža. Z łosami w Hornjej Łužicy zaběra so přednošk Michaela Striesy srjedu, 1. julija, w 19 hodź. w Stróžanskim Domje tysac hatow. Hłownje póńdźe wo łosowy projekt w biosferowym rezer­waće Hornjołužiska hola a haty. Zastup płaći dwaj euraj, potuńšeny jedyn.

Ćichońca. Najprjedy raz wudźenja wzdać dyrbi so muž, kotremuž běchu njeznaći minjeny pjatk při Budyskim spjatym jězoru­ jeho wudźenski grat pokradnyli. Tón bě sej wón popołdnju pola Ćichońcy k wudźenju spřihotował, dyrbješe pak hišće raz wróćo k awtu. Krótki wokomik su njeznaći wužili a grat w hódnoće 1 200 eurow spakosćili. Policiji škodowany pozdźišo rozprawješe, zo bě na jězoru ludźi­ widźał, kotřiž tam čołmikowachu. W tym zwisku pyta policija za módrym VWjom Passatom.

Łuty. Njemało stróžili su so wobsedźerjo jednoswójbneho domu we Łutach, jako so sobotu z dowola wróćichu. Njeznaći běchu so w tym času pola nich zadobyli a mjez druhim sterejopřiprawu typa Bose,­ MP3-playeraj kaž tež krutu kompjuterowu tačel pokradnyli.

Rozsudne koło trěbne było

Hamor/Wóspork. Nowy wjesnjanosta Hamora je Achim Junker (CDU). Wón je so wčera ze 46,4 procentami w druhim wólbnym přechodźe přesadźił a naslěduje Rolanda Trunscha. Tež we Wósporku mějachu znowa wolić. Jürgenej Arltej (Wolerske zjednoćenstwo, 42,7 procentow) dowěrichu zastojnstwo měšćanosty jako naslědnika Michaela Staudy.

Zawod pyta noweho nawodu

Budyšin. Dotalny nawoda Budyskeho zawoda Bombardier Transportation Volker­ Eickhoff wopušći zawod kónc junija. 60lětny přewozmje wotnožku ka­nad­iskeho předewzaća we Wrócławju. Tam twarja dźěle za elektriske lokomotiwy. Za Budyski zawod pyta Bombardier hišće naslědnika, je dźě to kompetencne srjedźišćo za nadróžne a ćahi.

Zasudźa hidu na cuzych

Drježdźany. Diecezanska rada Drježdźansko-Mišnjanskeho biskopstwa prawicarskoekstremistiske nastajenje mnohich wobydlerjow w Freitalu a druhich městach diecezy zasudźa. Hida na cuzych diskriminuje ludźi, kotřiž w nuzy a zadwělowanju za wućekom a pomocu pytaja, zastupnistwo lajkow dźensa w Drježdźanach zdźěli.

Wo 37. mjezynarodnym swjedźenju serbskeje poezije we Łužicy

Budyšin (AW/SN). Z lyrisko-hudźbnym za­rjadowanjom k finalej wustajeńcy „Satkula abo (s)twor(jen)a krajina“ słowjenskeho wuměłca Karla Vouka zakónči so wčera w Budyskim Serbskim mu­­ze­ju 37. mjezynarodny swjedźeń serb­ske­je poezije. Swjatk je ze serbskimi a wukrajnymi poetami „pomhał twarić dalše mosty mjezsobneho dorozumjenja ludow“, zwurazni moderator a čłon předsydstwa Zwjazka serbskich wuměłcow Benedikt Dyrlich. Karl Vouk hódnoćeše wulki wuznam­ festiwala, poćahujo so na napřećiwny při­nošk w němskej nowinje k Drjež­dźanskemu zarjadowanju. „Njech wěnc słowow we wašich rjadach krasne kćenja wunjese. Njech waše twórby dale mnohotnosć rěčow swěta wobohaćeja.“ Přitomni słyšachu pěsnje Marion Kwicojc a w maćernych rěčach basnje Juž­neju Serbow Mića Cvijetića, Igora Reima a Ljubuše Simića, Ukrainjanow Tatjany a Sergeja Dzjuba, Čecha Milana Hrabala, Syričana Abdelwahhaba Azzawija, Rusa Dmitrija Dragilewa kaž tež Słowaka Ladislava Volka.

Nowe połoženje nastupajo plany energijoweho koncerna Vattenfall w Slepjanskej kónčinje je Zwjazkowe předsydstwo Domowiny na wuradźowanju sobotu w Slepom wosebje zaběrało.

Slepo (IN/SN). Zwjazkowe předsydstwo Domowiny njebudźe zasadny problem brunicy w Slepjanskej kónčinje rozrisać móc, přiwšěm chce ludźom pomhać a załožić Łužiski fonds, poskićacy wobydlerjam tak perspektiwy. To je jedyn z wuslědkow sobotneho wuradźowanja zwjazkoweho předsydstwa w Slepom, na ko­trymž bě hłowna tema nowa situacija wokoło koncerna Vattenfall. Naj­aktualniše powěsće wo wupowědźenjach zrěčenjow z firmami, kotrež mějachu nadaw­ki za jamu Wochozy II, pokazuja, kak palaca tema je.

Dźesać městnow w Njebjelčicach, Budyši­nje, Lubiju a Korzymje a wjace hač sto wuměłcow – bus wuměłstwa wabješe kónc tydźenja něhdźe pjeć stow ludźi na turu po hornjołužiskej wuměłstwowej scenje.

Korzym (HS/SN/CoR). Medijowy rěčnik Korzymskeje wuměłskeje iniciatiwy Stefan Michalk je spokojom: „Lětsa je wjele wjace ludźi poskitk přiwzało hač na lońšej premjerje. Wothłós bě dobry, busy běchu derje pjelnjene. Pytnjemy, zo akceptanca koncepta bus wuměłstwa přiběra.“ Wothłós na městnje bě podobny. Tak wop­yta Serbski muzej sobotu a njedźelu něhdźe połsta a Muzej Budyšin 75 zajimcow. Galerija Budissin bě z dohromady 80 zajimcami runje tak spokojom kaž cityjowa galerija Brilke.

Budyšin (SN/at). Nowy Budyski wyši měšćanosta je Alexander Ahrens. 49lětny zhromadny kandidat Budyskeho woby­dlerskeho zwjazkarstwa (BBBz), Lěwicy a SPD je wčerawše rozsudne wólby z 48,1 procentom njewočakowano jasnje dobył. Matthias Knaak (CDU, 35,6%) njeje do njeho sadźenu nadźiju spjelnić móhł. Třeći na wólbnym lisćiku Mike Hauschild njeje ze 16,6 procentam swój wuslědk z prěnjeho koła cyle wospjetował. Wólbne wobdźělenje 38,6 procentow bě wo pjeć procentow słabše hač při wólbach 7. junija.

Wot 18 hodź. staj Ahrens a Hauschild hromadźe ze swojimi podpěrarjemi w foyeru radnicy dochadźace wuslědki sćěho­wałoj. Hižo te z prěnich wólbnych lokalow widźachu Alexandera Ahrensa prědku. Na kóncu doby wón w 26 z 30 wólbnych wobwodow, Matthias Knaak w štyrjoch. Krótko do sedmich přińdźe tež wón do foyera a dobyćerjej gratulowaše.

„Moja wospjetna kandidatura bě na kóždy pad prawa. Sym tež podźěl hłosow nimale dźeržał“, rjekny Mike Hauschild. „Přiznawam swoju poražku“, běchu­ słowa přesłapjeneho Matthiasa Knaaka, „z pozběhnjenej hłowu pak budu w měšćanskej radźe z nowym wyšim měšćanostu dźěłać.“