Z wudaća: srjeda, 10 februara 2016

Prašešel-li so mjez politikarjemi, tež serbskimi, za dorostom, pokazaja wone na swoje młodźinske organizacije. Tule přehlad najwažnišich politiskich organizacijow w Němskej a we Łužicy a jich aktualne čłonstwo, dalokož su ličby přistupne:

Wjace hač tysac čłonow

 Młoda unija Němskeje je zhromadna młodźinska organizacija CDU a CSU. Wona je z nimale 120 000 čłonami (staw lěta 2012) najwjetša młodźinska organizacija jedneje z politiskich stron Němskeje a wšeje­ Europy. W Sakskej ma Młoda unija něšto wjace hač tysac čłonow. Ze sobustawom stać móže so kóždy mjez 14. a 35. žiwjenskim lětom. Swoje najlěpše časy měješe organizacija mjez 1976 a 1985 z konstantnje 250 000 čłonami. Wot lěta 1986 ličba čłonow spochi woteběra. Młoda unija je do 18 krajnych zwjazkow rozrjadowana. Budyski wokrjesny zwjazk ma cyłkownje 38 sobustawow. Jeho předsydka je wot kónca januara 21lětna studentka Franziska Kunze z Rakec.

Žónski dorost faluje

Volleyball, wobwodna liga, mužojo

1. ST Kupoj Nowa Łuka 12 34 : 11 31

2. ST Viktoria Worklecy  12 32 : 10 30

3. Módro-běli Wojerecy II 12 26 : 18 21

4. TSV Kundraćicy 11 20 : 20 17

5. OSC Lubij 12 21 : 24 15

6. TuS Niska 10 19 : 22 14

7. VfB Zhorjelc 12 21 : 28 14

8. TSG Hamor Běła Woda 11 11 : 30 7

9. Tra. Mittelherwigsdorf 10 7 : 28 4

Jako halowy rěčnik Roman Hajnk po zwučenym wašnju Worklečanskich volleyballistow předstaji, so tróšku časa miny. K prěnjemu razej w tutej sezonje běchu mjenujcy wšitcy akterojo přitomni – tež Clemens Eckert, kiž bě zaso raz do domizny přichwatał. To běše tež wažne, wšako chcychu Worklečenjo z wuspěchomaj zwisk k načolnikej z Kupoje dźeržeć a sej hišće minimalnu šansu na mišterstwo wobchować. Do Worklec běštej tón dźeń posledni tabulki z Mittelherwigsdorfa a třeći z Kundraćic přijěłoj.

Viktoria Worklecy – Traktor Mittelherwigsdorf 3:0 (25:13, 25:14, 25:16)

Prěnja hra njeby směła poprawom k wulkim problemam wjesć, w předehrě pak Worklečenjo přećiwo Mittelherwigsdorfej najlěpši wukon njepokazachu. Tuž běchu warnowani a hnydom z najlěpšej šěstku započachu, zo njebychu žane nje­trjebawše dypki zhubili. To so tež poradźi. Fanam pokazachu najrjeńši volleyball. Čiste přiwzaća, precizne přihrawki a sylne nadběhi postarachu so wo spěšny předskok. Tak dóstachu hrajerjo na ławce hižo zahe swoju šansu.

Chrósćicy (MoG/SN). Pod hesłom „Lěto žorawjow“ přednošowaše młody wučer biologije Syman Šołta z Kulowa – pochadźacy z Róžanta – sobotu wječor w Chróšćanskej Putniskej hospodźe wo přirodźe wokoło nas a kak so wona w běhu lěta měnja. Hač zwěrjata abo rostliny – zapopadnył je ze swojej kameru jónkrótne a krasne wobrazy, wot zymy přez nalěćo, lěćo a nazymu – doniž so kołoběh lěta zaso njezawrje. Při tym orientowaše so na žorawje, dokelž su to wosebite ptački. W mnohich kulturach maja je za symbol zboža a mudrosće, přeco hižo su wone ludźi fascinowali. Jako ćahawe ptački wot nas widźane najdale na juhu přezymuja: Doleća sej hač do sewjerneje Afriki. Za čas NDR běchu wone pola nas hišće porědke a stejachu na čerwjenej lisćinje wohroženych družin. Mjeztym jich wobstatk zaso přiběra.

Pytaja historiske fotografije studnjow hrodoweho parka

Njeswačidło (AR/SN). Nic runjewon zwjeselace informacije poda gmejnska komornica Liliana Wetzko na wčerawšim posedźenju Njeswačanskeje gmejnskeje rady k hospodarskemu planej za lěto 2016. Po postajenjach sakskeho gmejnskeho porjada by wón dyrbjał hižo loni hač do kónca nowembra předležeć. Ale kaž we wjetšinje gmejnow bědźa so tež w Njeswačidle hišće z doskónčnym nastajenjom wotewrjenskeje bilancy w zwisku z dopikowym knihowanjom. Bilanca je wuměnjenje za wobzamknjenje lětušeho hospodarskeho plana, tak sej to krajnoradny zarjad žada.

Wojerecy (WS/SN). Přirada za serbske naležnosće města Wojerec je loni w septembrje molowanske wubědźowanje za wšitke 4. lětniki Wojerowskich šulow wupisała. Wotpohlad bě, zo so šulerjo ze žiwjenjom Serbow we Wojerecach na wuměłske wašnje zaběraja. Jara aktiwnje dźěłachu na tutym projekće w Zejlerjowej šuli z podpěru rjadowniskeje wučerki Sylwije Wjeńcyneje. Zahoritosće dźěći dla wutworichu dźěłowu skupinu šulerjow rjadownjow 4a a 4b, kotraž zetkawaše so dźesać króć pjatk po regularnej wučbje. Šulerjo zhromadnje rozmyslowachu, na kotre wašnje móhli nazběrane serbske temy zwobraznić a kotre techniki bychu so k tomu hodźeli. Za wobraz „Serbske napisy“ podachu so samo z kameru na rešeršu. Dale wužiwachu internet a započachu kónc lěta 2015 twórby we wšelakich technikach zhotowjeć. Nimo toho zestajachu 26 šulerjow jako zhromadny projekt protyku za lěto 2016 z mólbami a tekstami k wjerškam kóždeho měsaca, poćahujo so na Wojerecy. Cyłkownje bě 36 šulerjow wobdźělenych.

Serbske blido w stolicy

Berlin. Přichodne zetkanje za serbskim blidom w Berlinje budźe jutře, 11. februara, wot 16 hodź. w hosćencu „Einstein Kaffee“ na Friedrichowej 206. Hosćenc je direktnje pódla bywšeho hraničneho přechoda Checkpoint Charlie. Štóž ma lóšt a chwile so na měsačnych zetkanjach k hajenju maćeršćiny w cuzbje wobdźěleć, je stajnje lubje witany.

Socialne poradźowanje

Budyšin. Jutře, 11. februara, přeprosy zapósłanc Sakskeho krajneho sejma Hajko Kozel (Lěwica) na socialne poradźowanje do wobydlerskeho běrowa Lěwicy na Budyskej Šulerskej. Zhromadnje z prawiznikom Gregorom Janikom, kiž je w socialnym prawje wosebje wobhonjeny, pomha wón při rozrisanju problemow, kotrež so husto w socialnych prašenjach jewja. To nastupa wosebje naležnosće Hartza IV. Poradźowanje započnje so w 14 hodź. a hodźi so tež serbsce wjesć. Termin dojednać móža sej zajimcy pod telefonowym čisłom 03591/ 31 89 904.

Na přednošk wo wjelkach

Rentnarjej znjezbožiłoj

Čorny Chołmc. Ćežke wobchadne nje­zbožo stało je so wčera na zwjazkowej dróze B 96 blisko Čorneho Chołmca. Krótko po 19 hodź. bě tam 86lětny wodźer wosoboweho awta typa Renault Clio po puću. W prawej křiwicy zajědźe wón z dotal njeznateje přičiny na lěwy bok jězdnje a zrazy tam do štoma. Wón a 79lětna sobujěduca so ćežko zraništaj. Wobeju dowjezechu do Wojerowskeje chorownje. Na awće nasta něhdźe 6 000 eurow škody. Awtowa zamkarnja dyrbješe je wotwlec.