Z wudaća: wutora, 03 meje 2016

K nalětnjemu rjedźenju blisko wjesneho hata je so minjenu sobotu něhdźe 20 čłonow Worklečanskeho gmejnskeho zwjazka CDU a dalšich wjesnjanow zetkało. Dospołnje wučisćili a wobarbili su wobłoženje hatneje murje. Na małym zelenišću při hornim haće chcedźa składnostnje lětušeho jubileja spisowaćela a basnika Jurja Brězana w jeho ródnej wsy pomjatny kamjeń stajić. Wokoło tohole terena hodźeli so dalše dopomnjenske akcije za wuknjacych wobeju šulow organizować. Foto: dr. Beno Wałda

Hižo spočatk lěta chcyštej Wulkodubrawska a Malešanska gmejna zhromadne stawnistwo wutworić. Krajna direkcija pak to wotpokaza. Nětko maja nachwilne rozrisanje.

Wulka Dubrawa (CK/SN). Wot julija hač do decembra tohole lěta wukonja stawnica Malešanskeje gmejny stawnistwowe nadawki we Wulkej Dubrawje a změje tam rěčne hodźiny. Wotpowědne zrěčenje zdźěłać je Wulkodubrawska gmejnska rada na swojim zašłym posedźenju wobzamknyła. Trěbne tajke rjadowanje je, dokelž stawnica we Wulkej Dubrawje gmejnske zarjadnistwo w lěću wopušći. Tamni sobudźěłaćerjo nimaja trěbnu kwalifikaciju. Tohodla mějachu hižo dlěši čas problemy, hdyž bě sobudźěłaćerka w dowolu abo chora. Tři lěta su tele zastupnistwo w Malešecach přewzali. Tamniše stawnicy pak njeběchu k tomu hižo dlěje zwólniwe. Dokelž jedna so wo gmejnu přesahowacy nadawk, njemóžachu je tomu tež nuzować.

Dźeń do toho hakle stajena je 20 metrow wysoka meja w Nowej Łuce hižo njedźelu padnyła. Dokelž nimaja dosć ludźi za stražowanje, su ju radšo hnydom zaso we wobłuku mejskeho swjedźenja powalili a tak přiwšěm rjany nałožk pěstowali. K zynkam Hórnikečanskeje dujerskeje kapały młode pory wokoło meje rejwachu, holcy běchu serbsku drastu Wojerowskeho regiona woblečene. Najspěšniši při wjeršku bě Jakob­ Bramborg, kiž sej Cindy Schluck za kralownu wuzwoli. Při tradicionalnym přesadźowanju meje zapłaći Klaus Petrick nahladne 290 eurow do kasy młodźin­skeho kluba. Foto: Ulrike Herzger

Młode swójby hrajkanišćo při wohnjowej woborje porjeńšili

Pěskecy (AK/SN). Elisa, Hanna, Laura a Emilia­ sedźa wjesele w kulojtej čum­pjeli, podobnej na wulke plećene hnězdo. Z jich wobličow wučitaš wjeselo a dźakownosć. „Čumpjel je cyle nowa. Za najmjeńšich mamy hišće dalšu čumpjel“, powěda Christina­ Šwejdźina. Wona słuša k hibićiwym młodym ludźom, kotřiž su wot lońšeho lěća hrajkanišćo při Pěskečanskej wohnjowobornej gratowni sporjedźeli.

„Zakładne wuhotowanje tu hišće bě. Ale hrajkanske nastroje běchu njenahladne“, Christina Šwejdźina rozłožuje. Někotražkuli drjewjana hrjada bě přehnita, zdźěla běchu hozdźe widźeć, w pěskowym kašćiku rosćeše njerodź. „To měješe so změnić“, podšmórnje Tereza Kralowa. Młodźi starši zhonichu wo iniciatiwje znački Fanta, z kotrejž měješe so sto hrajkanišćow podpěrać. Při internetnym wothłosowanju docpěchu 65. městno a smědźachu so nad tysac eurami wjeselić. Njebjelčanska gmejna podpěrowaše jich z materialom a přewza diferencu k cyłkownej sumje. Mnohe młode swójby so tuž gratu přimachu.

Před dwórnišćom prasnyło

Budyšin. Runje před Budyskim dwórnišćom je so dźensa rano ćežke wobchadne njezbožo stało. Krótko po 6 hodź. wodźerka Forda z parkowanišća před dwórnišćom wujědźe a chcyše do směra na centrum wotjěć. Njewobkedźbowaše pak wulke, wotpadki wotwožowace nakładne awto a zrazy do njeho. Žona so ćežko zrani, tak zo dyrbjachu ju do chorownje dowjezć. Wodźerjej nakładneho a dalšeho wobdźěleneho wosoboweho awta so njezraništaj. Jordanowa bě wjacore hodźiny dospołnje zawrjena.

Jawora (WB/SN). Po wjace hač 45 lětach su młodźi Jaworčenjo lětsa zaso w swojej wsy meju stajili. Z wulkim lóštom a elanom připrawichu sej zdónk, nawichu wěnc a přičinichu na wjeršku meje serbsku chorhoj a pisane banćiki. Při stajenju mejskeho štoma starši wjesnjenjo powědachu, zo bě w Jaworje poslednja meja wokoło lěta 1970 stała. Runje tak kaž te­hdy su tež nětko při stajenju mejskej kěrlušej zaspěwali. Meja ma Jaworu nětko hač do kónca měsaca pyšić. Potom chcedźa ju we wobłuku małeho wjesneho swjedźenja powalić.

Kaž wjacore młode swójby připowědźichu, chcedźa so wone klětu wo městno za chodojtypalenje prócować. Tež tónle nałožk hižo wjacore lěta w Jaworje njepěstuja. Ćim rjeńšo, zo chcedźa jón zaso wožiwić a tak dobru naladu a zhromadnosć we wsy přisporjeć. Hižo nětko pak žnějachu organizatorojo meje za swój angažement chwalbu a připóznaće.

Lea Krječmarjec z Wulkeho Wjelkowa měješe minjeny kónc tydźenja wulku česć, w Budyšinje přećelsku koparsku hru mjez młodźinomaj A Pósta Germanije Budyšin a Dynama Drježdźany sudźić. Šulerka Budyskeho Serbskeho gymnazija bě hakle loni licencu­ za koparsku sudnicu dóstała. Dynamowcy su njeruny duel ze 14:1 dobyli. Foto: Jörg Stephan

HZ Ottendorf/Liegau

– SJ Njebjelčicy 2:0 (0:0)

Zestawa hosći: Matješk – Kral, Deleńk, Šołta, Haška, Hanuza, Cyž, Hrjehor, Hommel, Hoelzel (70. Korjeńk), Ričel

Na kumštnym trawniku w Ottendorfje wuspěch žnjeć bě, je a wostanje ćežko. Z trěbnym nastajenjom dachu so Njebjelčanscy koparjo do partije, a w prěnim połčasu so jim poradźi hru wotewrjenu dźeržeć. Hosćićel měješe wjace šansow, ale tež Njebjelčenjo mějachu jednu přez Ričela, kotruž domjacy wrotar k róžkej wotwobara.

SJ Njebjelčicy

– Frankenthal 3:2 (2:2)

Zestawa domjacych: Hahn – Kral, Deleńk, Haška, Hanuza, Cyž, Hrjehor (87.Šołta), Hommel, Hoelzel, Korjeńk (46. Čornak), Ričel (84. Mjechela)

SV 1911 Großröhrsdorf II

– ST Marijina hwězda 2:0 (0:0)

Zestawa hosći: O. Schmidt – Wróbl, Łušćanski, T. Jurš, Raab, Langer, Pakoßnick, Bělk, P. Schmidt, Winkler, D. Jurš

Dokelž bě sobotu w Großröhrsdorfskim stadionje lochkoatletiske wubědźowanje, su so zamołwići koparskeju cyłkow na to dojednałoj njedźelu w Rödertalu hrać. Hrajerjo ST Marijineje hwězdy po­dachu so tam při nanajrjeńšim wjedrje z jenož jědnaćomi. Wot wšeho spočatka bě hra bohata na šansy. Prěnju měješe Dawid Jurš, dalšej hosćićel. Hra chabłaše tam a sem. Dwě hoberskej móžnosći wotwobaraštaj wrotar Oliver Schmidt z nohu a Jeffrey Raab na liniji. Na to pósła Dawid Jurš ze super přihrawku Křesćana Bělka na lěwej stronje, a tón posłuži Alexandera Winklera­, kiž z hłójčkowanym bulom wrotarja Eberleina přewiny. Pobóčny asistent pak bě nimohru spóznał.