Z wudaća: srjeda, 27 julija 2016

Wot hrajneje doby 2017/2018 změjemy w kopańcy juniorow na małym polu młodźiny D, E a F nimale hižo rewolucisku změnu. Cyłe lěta njesmědźeše wrotar bul z rukow direktnje přez srjedźnu liniju třělić. Tež wotkopy dyrbjachu so před srjedźnej liniju wot druheho hrajerja přiwzać abo so jeho dótknyć. Jeli so to njesta, dyrbješe sudnik situaciju přetor­hnyć. W tajkich padach dawaše na wysokosći srjedźneje linije stajnje wólny kop za přećiwnika. Prawidło „Hraće přez srjedźnu liniju“ płaći jenož hišće w hrajnej dobje 2016/2017. Wot julija 2017 budźe při runje wopisanymaj situacijomaj město srjedźneje linije šěsnatka na tamnym boku hrajnišća magiska hranica. To rěka, zo smědźa so wotkopy a dołhe bule wrotarja nimale direktnje hač do přećiwniskich wrotow třělić! Bul pak dyrbi so wězo do tuteje „hranicy“ swójskeho abo přećiwniskeho hrajerja dótknyć – hewak dóstanje přećiwnik na wysokosći swójskeje šěsnatki wólny kop. Hižo w aktualnej dobje smědźa mustwa zhromadnje tole dojednać a raz wuspytać. Powšitkownje pak płaći dale hišće srjedźna linija jako imaginarna hranica.

Philadelphia (dpa/SN). Hillary Clinton je so do stawizniskich knihow zapisała: 68lětnu něhdyšu wonkownu ministerku USA su na zjězdźe demokratow oficialnje za prezidentsku kandidatku wuzwolili. Wona je tuž prěnja žónska w stawiznach USA, kotraž za najwyše zastojnstwo kraja kandiduje. Při wothłosowanju so wona jasnje přećiwo swojemu kontrahentej Berniejej Sandersej přesadźi, kiž swoju poražku přizna. Clinton nastupi 8. nowembra přećiwo kandidatej republikanow Donaldej Trumpej.

Wuradźowanje terora dla

Paris (dpa/SN). Po teroristiskim nadpadźe na katolsku cykej w sewjernej Francoskej je so statny prezident Francois Hollande ze zastupnikami wšelakich wěrywuznaćow zetkał. Do prezidentskeho palasta přeprošeni běchu katolikojo, prawosławni, protestanća kaž tež muslimojo, židźa a buddhisća. Wčera wječor bě Hollande arcybiskopa z Rouena witał a z bamžom Franciskusom telefonował. Islamistiskaj atentatnikaj běštaj wčera njedaloko Rouena katolsku cyrkej nadpadnyłoj a duchowneho moriłoj.

Krajej pochłostać?

Młodostni putnicy ze wšeho swěta su so wčera na hłownym torhošću Krakowa na młodźinskim festiwalu składnostnje zahajenja swětoweho zetkanja młodźiny z bamžom Franciskusom wobdźělili. Swjateho wótca wočakowachu w Krakowje dźensa popołdnju. Foto: dpa/Jacek Turczyk

Krakow (dpa/K/SN). Ze swjatočnymi kemšemi pod hołym njebjom su dźesaćitysacy wěriwych w južnopólskim Krakowje zahajenje Dnja swětoweje młodźiny swjećili. Na šěsć dnjow trajacym zetkanju wobdźěla so něhdźe połdra miliona młodych křesćanow. Přizjewiło je so dobre poł miliona putnikow ze 187 statow, z Němskeje 15 500. Dźensa připućowa bamž Franciskus do Krakowa, zo by z młodymi ludźimi swjećił a so modlił. Zasćinjeny je zlět wot zamordowanja měšnika w Francoskej. Jutře poda so bamž skrótka do Częstochowy, hnadowneho městna. Na swojej prěnjej wiziće Pólskeje wopyta wón tež něhdyše němske koncentraciske lěhwo Auschwitz.

Na wšě šěsnaće hodźin je muž w kontejneru stareje drasty na swoje wuswobodźenje čakać dyrbjał. 44lětny bě w Gorknitzu pola Drježdźan kontejner přeslědźił a so při tym do njeho sunył, zdźěli policija. Wusłyšawši wołanje a klepanje muža w železnym sudobju, poinformowa wobydler susodneho domu wohnjowu woboru. Policija nětko pospytaneho „padustwa mjenje hódnych wěcow“ dla přećiwo njemu přepytuje.

Před třomi tydźenjemi z rězarnje ćeknjena kruwa w Kaiserslauternje policiju přeco hišće za nós wodźi. Šoferojo běchu skoćo wčera w měsće wuhladali, na čož policiju wołachu. Jako zastojnicy pijědźechu, skoćo do lěsa ćekny. Tam bjez wuspěcha za nim pytachu. Před třomi tydźenjemi běchu samo helikopter podarmo zasadźili. Dokelž kruwa tež po kolijach běhaše, dyrbjachu nachwilnje čaru zaraćić.

Berlin (dpa/K/SN). Po skućenych atentatach a amoku w Bayerskej napominaja zastupnicy čłowjeskich prawow a justicy politikarjow, zo bychu na přiměrjene wašnje reagowali. Amnesty International ma kritisce za to, zo je wotmyslene wotsunjenje kriminelnych ćěkancow do konfliktnych krajow zranjenje prawa ludow. Generalny zwjazkowy prawiznik Peter Frank warnuje před přechwatnymi reakcijemi. W Tegernseeju wuradźuje bayerske knježerstwo dźensa wo konse­kwencach ze serije njeskutkow. Dźe wo naprawy za lěpši škit ludnosće. Za Zjednoćenstwo zwjazkoweje wobory (DBWV) měło zasadźenje wojakow znutřka kraja być wuwzaće.

Waršawa (dpa/SN). Wjetšina Polakow po najnowšich woprašowanjach wotpokazuje, ćěkancow přiwzać. Po tym so 66 procentow přećiwo tomu wupraja, ćěkancam z Bliskeho wuchoda abo Afriki zmóžnić, do Pólskeje přinć. Jenož 26 procentow by tole witało. Woprašowanje instituta CBOS bu wčera wozjewjene. Do teroristiskich nadpadow w Francoskej loni w nowembru bě połoženje hišće hinaše: Tehdy běše 57 procentow ludźi za to, ćěkancow z krizoweje kónčiny na wuchodźe Ukrainy přiwzać, 35 procentow pak přećiwo tomu.

Najnowše teroristiske nadpady w Němskej widźi pólski nutřkowny minister Mariusz Blaszczak jako wuskutk wopačneje politiki ćěkancam napřećo. Politikar narodnokonserwatiwneje strony Prawo a sprawnosć (PiS) rjekny nowinarjam: „Njeje dwělow, zo su problemy, z kotrymiž so naši susodźa tuchwilu bědźa, wuslědk lětdźesatki trajaceje migraciskeje politiki, wuslědk multikulti-politiki, wuslědk toho, zo su migrantow z Bliskeho wuchoda a Afriki přijimali, kotřiž nochcedźa so do europskeje towaršnosće integrować.“

Ressort za noworjadowanje na kraju Budyskeho krajnoradneho zarjada ma ćeže, zjednorjene noworjadowanske jednanje ležownosćow w Pančicach-Kukowje, Porchowje, Prěčecach a Ralbicach dozakónčić. Lěto wob lěto so termin suwa, a kónc jednanjow njeje wotwidźeć. Praji so, zo k tomu personal a pjenjezy njedosahaja. Dypk! Što pak to ludźom pomha, kotřiž chcedźa swój statok z ležownosću předać abo někomu zdźědźić? Přeco a wšudźe ma wobsedźer při tym topografiski plan předpołožić a nowy mějićel jako zakład za kredit tajki swojej bance. Nětko pak je horjeka mjenowany ressort ležownosć za wjele pjenjez hižo wuměrić dał, štož pak jeje wobsedźerjej ničo njepomha. Tón mjenujcy dyrbi „swój blečk“ hišće raz wuměrić dać, zwjetša wot samsneho wuměrjenskeho běrowa. Tam, hdźež stłóči měrjenski inženjer jeno na knefl kompjutera a je z tym dwójce zaslužił. Měrćin Weclich

W Berlinje rozmysluja wo tym, hač móhł eurocityjowy ćah „Wawel“ přichodnje po Delnjošleskej magistrali jězdźić­.

Budyšin (SN/at). Dalnowobchadnych železniskich zwiskow mjez Berlinom, Braniborskej, Sakskej na němskej stronje a Pólskej žanych njeje. Mjez Drježdźanami a Wrócławjom jězdźa bliskowobchadne ćahi. Za čas europskeje kulturneje stolicy jězdźi Němska železnica (DB) hač do 25. septembra kónc tydźenja z kulturnym ćahom z Berlina přez Baršć do Wrócławja.

Husty čorny kur steješe dźensa nad palacym so składom styropora w braniborskim měsće Wittenberge. Samsny čas spytachu wohnjowi wobornicy płomjenja podusyć. Po prěnich dopóznaćach so při wohenju w fabrice awstriskeje firmy Austrotherm nichtó njezrani. Wudyrił běše woheń z do składu zraženym błyskom. Foto: dpa/Jens Wegner