Praha (dpa/SN). Medije w Čěskej zhladuja spočatk noweho lěta rozdźělnje a zdźěla chětro kritisce na dotalnu bilancu w boju přećiwo koronje w susodnym kraju kaž tež na tamnišu šćěpjensku kampanju w minjenym lěće.
Nowinarki a nowinarjo konserwatiwneho dźenika Lidové noviny w Praze měnja mjez druhim, zo je šćěpjenje pře koronu nadźije wobydlerstwa jeno zdźěla spjelniło. „Na spočatku koronapandemije běchu wuhlady na šćěpjenje přećiwo nowemu wirusej nic mjenje hač přeća a hołe mysle“, rěka w nowinje. „Nadźije na šćěpiwo pře koronu su so spjelnili, ale jenož po połojcy. Knježerstwo drje je w minjenym lěće cyłostatne kampanje za imunizaciju wobydlerstwa přewjedowało, ale lěto 2021 je zdobom dopóznaće wunjesło, zo šćěpiwa po wšěm zdaću njejsu te brónje, kotrež zamóža cyły šmjatk zakónčić – znajmjeńša nic tak, kaž běchu sej to mnozy předstajili a kaž běchu to politiske, towaršnostne a wědomostne elity přilubili. Tuž je nětko rozsudne, što nam nowe lěto 2022 wunjese“, zjimaja nowinarjo aktualne połoženje w Čěskej.
Praha. W Čěskej płaća wot dźensnišeho přiwótřene naprawy hladajo na silwestersku nóc 2021. Hač do druheho januara smětej w hosćencach susodneho kraja maksimalnje dwě wosobje za jednym blidom sedźeć. Nowa škitna naprawa so wězo na swójby abo wjacore wosoby z jedneje domjacnosće njepoćahuje, informuje nowy strowotniski minister Vlastimil Válek.
Wotewrjenske časy lokalow pak nochce Válek wobmjezować, 2G-prawidło płaći samozrozumliwje tež za poslednju nóc stareho lěta. Gastronomiski personal ma z pomocu qr-kodea kontrolować, hač su wobdźělnicy wulkeho swjedźenja wustrowjeni abo šćěpjeni.
Praha (dpa/SN). Bywši čěski ministerski prezident Andrej Babiš je sej bydlenski mobil kupił. Po swojich słowach chce wón z jězdźidłom „k ludźom jěć.“ Čěske nowiny to wčera wuhódnoćichu a měnja, zo chce Babiš njeoficialnje kampanju za zastojnstwo prezidenta kraja zahajić. Tuchwilna hamtska doba Miloša Zemana so wšak w lěće 2023 skónči. Ze změnu wustawy nětko lud prezidenta woli.
Babiš je přeco wo tym sonił, zo je z bydlenskim mobilom po puću, rozprawja wón we wideju, kotrež je w socialnej syći wozjewił. Přiwšěm dyrbi wón hišće zwučować, ze sydom a poł metrow dołhim mobilom jězdźić, miliardar wujasni. We februaru chce z tym započeć.
Andrej Babiš je wólby parlamenta w oktobrje přećiwo zwjazkarstwu pjeć liberalnych a konserwatiwnych stronow přěhrał. Wjacore negatiwne powěsće na přikład koło wokoło financow 67lětneho masiwnje pod ćišć stajachu. Załožer populistiskeho hibanja ANO bě wot 2017 do 2021 šef čěskeho knježerstwa, do toho bě wón financny minister. Nětko pak ma po wšěm zdaću ambicije, zo chce so z prezidentom kraja stać.
Praha. Wjele Čechow nochce so hodowne swjaty dny praženeho karpa a přijomnych hodźin ze swójbnymi wzdać. To zwěsćichu w nadawku Čěskeho rozhłosa sobudźěłaćerjo instituta Median, kiž je znaty za swoje naprašowanja za měnjenjemi. „Hody – to su nałožki, swójbni a přećeljo, poprjančki a hodowny štom“, wjeseli so młoda žona z Prahi.
Prěni wupyšeny božodźěsćowy štom zyboleše so 1812 we wili Jana K. Liebicha, direktora Stavovskeho dźiwadła w Praze. Woblubowany nałožk so bórze po cyłym kraju rozšěrješe, a prěni hodowny štom na zjawnym naměsće móžachu wobydlerjo Plzenja w adwenće 1925 wobdźiwać. Ale tež čěske hodowne spěwy a dary su wjetšinje našich južnych susodow njeparujomny wobstatk swjatych dnjow.
Praha (ČŽ/K/SN). Čěska socialdemokratija, kotraž dožiwi při oktoberskich wólbach z prěnjokrótnym misnjenjom zastupnistwa w sejmje historiski debakl, so znowa nastaja. Jako prěnju zakładnu kročel wotmě ČSSD w Praze wurjadny stronski zjězd z wólbami předsydstwa a předewšěm noweho předsydy strony. Dotalny šef Jan Hamáček bě ze zamołwitosće za wólbnu katastrofu zastojnstwo złožił.
Za noweho předsydu ČSSD wuzwolichu delegaća 46lětneho Michala Šmardu. Starosta morawskeho Noveho Města doby před dotalnej ministerku za dźěło Janu Matáčovovej a něhdyšim nawodu wojerskeje tajneje słužby Miroslavom Krejčíkom, kotrajž běštaj tohorunja za zastojnstwo šefa kandidowałoj. Po swojim wuzwolenju Šmarda zwurazni, zo je Čěska w sejmje najprjedy jónu bjez lěweje demokratiskeje alternatiwy. „Hrozy tuž dlěšodobna strowotniska, ekonomiska, socialna a moralna kriza, a tohodla trjebaja ludźo w tutym času zepěru w sebjewědomej a skutkownej socialnej demokratiji.“ Wón chce hrožacemu bankrotej strony zadźěwać, statuty změnić a nowym wobličam šansu dać.
Praha (dpa/SN). Dźěłu noweho liberalno- konserwatiwneho knježerstwa w Čěskej ničo wjace na puću njesteji. Prezident Miloš Zeman chce jutře kabinet w namjetowanej zestawje powołać, kaž rěčnik 77lětneho w Praze zdźěli. Rozsud je tež wuslědk hodźiny trajaceje krizoweje rozmołwy z hižo spřisahanym nowym ministerskim prezidentom Petrom Fialu na hrodźe Lány pola města Kladno.
Hišće před dnjemi bě Zeman razne wobmyslenja přećiwo kandidatej za zastojnstwo wonkowneho ministerstwa zwuraznił. Jan Lipavský wot strony Piratow nima po měnjenju prezidenta trěbnu kwalifikaciju. Nimo toho wumjetowaše jemu Zeman „distancowane nastajenje“ k Israelej a Visegrádskej skupinje z Pólskej, Słowakskej a Madźarskej. By-li so rozestajenje mjez Fialu a Zemanom dale přiwótřiło, by měsacy trajace rozestajenje wo kompetencach před wustawowym sudnistwom hrozyło. Fiala hódnoćeše dowidźenje Zemana jako „kročel statnika“. Diskusija z prezidentom bě „jara wotewrjena a zdźěla zasakła“, rjekny 57lětny předsyda strony ODS. Nowa koalicija pjeć stron bě wólby w oktobru dobyła.
Praha. Český Těšín a jeho pólski pendant Cieszyn tworitej jedyn cyłk, podobnje kaž Zhorjelc a Zgorzelec. Mjeztym zo na čěskim boku namjezneje rěki Olše krutych naprawow koronapandemije dla ćišina knježi, dadźa sej ludźo na pólskim boku rěki dohodownu atmosferu lubić.
Minjenu sobotu a njedźelu bě městačko Cieszyn kopate połne, dokelž njejsu so wopytowarjo z bliskich čěskich městow Havířov, Frýdek-Místek a Karviná swjatočneho kuzła wzdać chcyli. „My wobydlerjo Českeho Těšína dožiwjamy tuchwilu jara spodźiwnu situaciju. Mamy wobě měsće za jedyn cyłk. Chodźimy do susodneho kraja dźěłać a nakupować, a Polacy činja to samsne na našim boku. Nětko pak jewja so wulke rozdźěle. Pola nas je wšitko začinjene a puste, naši susodźa pak pěstuja swoje dohodowne nałožki a wjesela so zjawnje na swjate dny, kaž bě to lěto do pandemije tež tu pola nas z wašnjom“, powěda Gabriela Hřebačková, měšćanostka Českeho Těšína.