Mzda rosće
Praha (ČŽ/K/SN). Wo 1 000 krónow (něhdźe 40 eurow) zwyša w Čěskej wot 1. januara 2022 minimalnu mzdu, kotraž budźe potom 16 200 krónow (ca. 635 eurow) wučinjeć. Naprawu je hišće knježacy kabinet ministerskeho prezidenta Andreja Babiša (ANO) wobzamknył. Z minimalnej mzdu přibudźe zdobom zaručena mzda, a to hač na 32 400 krónow (nimale 1 700 eurow), po tym kajkeho fachoweho pola resp. kak komplikowane abo zamołwite jednotliwe dźěło je.
Dźěławym zboha šerpatko připołožić je nuznje trjeba, dźiwajo na to, zo jim njepřestajna inflacija dochody čućiwje zespóžěra. W oktobru je so rata inflacije na 5,7 procentow zwyšiła, hdyž bě w septembru hižo 4,9 proc. wučinjała. Najbóle rostu po zwěsćowanju ekonomow wudawki za bydlenje, na přikład za wodu, milinu a tepjenje. Ale tež cyrobizny nimale wšitkich družin kaž tohorunja mnohe dalše twory su spochi dróše. Nic naposledk dyrbja awtomobilisća za ćěriwo – bencin kaž tež diesel – skoro wšědnje hłubšo do móšnje sahnyć. Zo hodźał so róst inflacije bórze zadźeržeć, na to njeje tuchwilu wuhladow. Hospodarscy eksperća skerje z tym liča, zo móhła rata skoku hranicu šěsć procentow překročić.
Zawěry přełamać spytali
Situacija na mjezy mjez Pólskej a Běłoruskej so dale přiwótřa
Minsk/Waršawa (dpa/SN). Połoženje na pólsko-běłoruskej mjezy so dźeń wote dnja přiwótřa. Wčera wječor su wjacore sta ćěkancow podarmo spytali so blisko wsy Kuźnica Białostocka přez zawěry do Pólskeje přełamać. Dźensa rano je Pólska hraničny přechod Kuźnica Białostock zawrěła. Pućowacy měli na přechodaj Terespol a Bobrowniki wuwinyć.
Po informacijach pólskich zarjadow je při mjezy něhdźe 3 000 do 4 000 ćěkancow – mnozy z nich z krizowych kónčin kaž Afghanistana a Iraka. Woni přenocowachu při hižo minusowych stopnjach w prowizorisce natwarjenym stanowym lěhwje. Po informacijach běłoruskeje strony su tam wčera tež wjacore wutřěle z pistolow słyšeli.
Po tym zo bě koordinator pólskeje tajneje słužby Stanisław Żaryn wčera přez twitter „wo wulkej ličbje ćěkancow informował, stejacych pod kontrolu wobrónjenych běłoruskich jednotkow, kotrež rozsudźeja, dokal ma skupina hić“, je knježerstwowy šef Mateusz Morawiecki krizowy stab zwołał.
„Garantije steja na hračkach“
Debata wo „eroziji demokratije“ w Pólskej so dale přiwótřa
Waršawa (SN/bn). Mjeztym zo dale akutna humanitarna katastrofa na mjezy k Běłoruskej w pólskich medijach dźeń a mjeńšu rólu zaběra, wěnuja so tamniše nowiny a časopisy tele dny hłownje reakcijam wukraja na „eroziju demokratije“, kajkuž Europska unija a USA Pólskej wumjetuja. Minjenu srjedu bě tak mjenowana Helsinki-komisija, zestajana z čłonkow a čłonow wobeju ameriskeju parlamentariskeju komorow, zwěsćiła, zo njejsu aktualne sankcije EU a USA přećiwo Pólskej a Madźarskej přewjele wuskutkowali a zo so „situacija demokratije we woběmaj krajomaj dale pohubjeńša“. Bywša zastupowaca wonkowna ministerka USA Heather Conley je tohodla namjetowała, „wo prezency ameriskich wojakow w Pólskej rozmyslować“, štož wjacore medije jako direktne hroženje rozumja. Tak cituje najwjetši pólski dźenik Gazeta Wyborcza mjez druhim fachowca za wonkownu politiku a čłona europskeho parlamenta Radosława Sikorskeho (Europska ludowa strona EVP): „To chětro boli.
Euro njezawjesć
Praha (ČŽ/K/SN). Wot wólbow sejma sem njejsu ani tři njedźele zašli a hižo wujewja so Čecham na wobzorje nowe knježerstwo. Koaliciji Spolu (ODS-KDU/ČSL-Top 09) a Piratow/STAM dojednaštej so wo koaliciskim zrěčenju kaž tež wo programje knježerstwa za přichodnu legislaturnu periodu. Za docpěće tohole zasadneho zaměra stej jednanskej komisiji wobeju partnerow dwanaće hodźin trjebałoj. Podpisać chcetej koaliciski kontrakt a wozjewjenje knježerstwa póndźelu. Potom dokumentaj tež zjawnosći spřistupnja.
Razna kritika hosćencarjow
Marek Krawc rozprawja wo aktualnje rozjimanych temach w Čěskej
Praha. Čěske knježerstwo z ministerskim prezidentom Andrejom Babišom na čole je 20. winowca 2021 postajiło, zo dyrbi personal gastronomiskich zarjadnišćow strowotniski staw swojich hosći přepruwować. Rozsud je mjez mnohimi wobsedźerjemi a wobhospodarjemi hosćencow raznu kritiku zbudźił. Po jich měnjenju chcedźa politikarjo zamołwitosć za rozšěrjenje koronawirusa na hosćencarjow wotwalić, nimo toho wuskutkuje nowa naprawa po ćežkim połdra lěće z pandemiju dalše financne straty.
Zawěsćernje wjele wupłaćili
„Njejsmy hišće ničo płaćili“
Europske sudnistwo Pólsku k wšědnej pokuće miliona eurow zasudźiło
Waršawa. Napjatosće mjez Europskej uniju a Pólskej dale přiběraja. Předwčerawšim, srjedu, je Europske sudnistwo Pólsku zasudźiło, wšědnje milion eurow pokuty płaćić. Přičina je po informaciji wiceprezidenta spjećowanje kraja, rozsudy najwyšeho europskeho sudnistwa přesadźić. Konkretnje jedna so wo wukaz, dźěło dwělomneje disciplinarneje komory ke chłostanju sudnikow skónčić. Komora po rozsudźe sudnistwa w Luxemburgu prawidła njewotwisneje justicy rani. Dodźerženje wusuda z 14. julija je trěbne, zo njebychu prawniski porjad a hódnoty EU „ćežku a trajnu škodu poćerpjeli“, sudnistwo zdźěli. Pokuta ma Pólsku pohnuć, rozsud skónčnje přesadźić.
Lětsa zhotowja mjenje awtow
Praha (ČŽ/K/SN). Čěske awtotwornje zhotowja lětsa přez 250 000 wozydłow mjenje hač před dwěmaj lětomaj. Zredukowanu produkciju zawinuje čućiwy njedostatk chipow. Financielna strata wučinja po wobličenjach ekspertow za awtowe předewzaća něhdźe 120 miliardow krónow (něhdźe 4,7 miliardow eurow) a za dodawarjow elektroniskich dźělow 80 miliardow krónow (315 milionow eurow). W prěnich dźewjeć měsacach je 831 653 nowych wosobowych jězdźidłow předewzaća wopušćiło. To je jeničce 2,9 procentow wjace hač lěta 2020, jako bě produkcija awtow koronakrizy dla dobry měsac dospołnje zastajena, ale 22 procentow mjenje hač lěta 2019.
Produkcija awtobusow spadny wo 1,2 procentaj na 3 475 eksemplarow. Towaršnosć Tatra Trucks, kotraž w Čěskej jako jenička nakładne awta zhotowja, naprodukowa wot januara hač do kónca septembra 875 jězdźidłow, tuž 56 mjenje hač w samsnym času lońšeho lěta. Jako jenička wozjewja Jawa Moto postup – předewzaće naprodukowa w dotalnych třoch kwartalach 811 motorskich, to je 432 mašinow wjace hač loni.
Milina bjez dawka
Pólska planuje krutu murju
Ćěkancy z Běłoruskeje do susodneho kraja spochi dale přichadźeja
Waršawa. Problem ćěkancow, kotřiž z Běłoruskeje do Pólskeje přichadźeja, politikarjow a wobydlerjow dale zaběra. Při tym so přiběrajcy prašeja: Kak je móžno, zo ćěkancy mjezu mjez krajomaj stajnje zaso překročeja. Ministerski prezident Mateusz Morawiecki je wospjet twjerdźił, zo je prowizoriski zadźěwk z kałateho grotu wěsty a zo pólscy wojacy na mjezy jara dobru słužbu wukonjeja. Najebać to je so minjene měsacy něhdźe 5 000 migrantow z arabskich krajow přez Pólsku do Němskeje dóstało.
