Zesylnjeja swoju „druhu nohu“
Předewzaće Jägermeister swój skład w Kamjencu dale rozšěrja
Kamjenc. Cyłkownje 80 dubowych sudow, kotrež so přeco hišće w ručnym dźěle zhotowjeja, steji dotal w Kamjenskim zawodźe Jägermeister k dispoziciji. W nich składuja zakładne přidawki za woblubowany liker. Kóždy sud ma městno za hač do 10 000 litrow. Mjeztym pak je přemało městna za sudy, zo móhli potrjebu předewzaća dołhodobnje zaručić. Tohodla je towaršnosć zawoda rozsudźiło, skład rozšěrić. Loni kónc nowembra su tam zamołwići zaryw swjatočnje woswjećili. Cyłkownje chcedźa při Kamjenskim stejnišću Jägermeister wjacore miliony eurow inwestować. W nowym składźe za sudy ma městno za hač do 225 dalšich dubowych sudow być.
Wudźeržliwosć je samozrozumliwa
Posoljo za region dźeń a wažniši
Budyšin (SN). Mjeztym hižo dwaj lětdźesatkaj so posoljo Hornjeje Łužicy z wulkim angažementom za region zasadźeja. Woni aktiwnje tež zwonka Łužicy na sylnosće a potenciale kónčiny skedźbnjeja, W lěće 2003 je Marketingowa towaršnosć Hornja Łužica-Delnja Šleska (MGO) iniciatiwu załožiła. W njej su wosoby ze zjawneho žiwjenja, hospodarstwa, turizma, sporta, kultury a politiki zapřijeći. Woni su reprezentanća a region skutkownje zastupuja a zwičnjeja.
Wo spěchowanske srědki so požadać
Rakecy (SN). Towarstwo za wuwiće Hornjołužiskeje hole a haty (OHTL) je nětko zajimcow namołwjało, so wo spěchowanske srědki požadać. Cyłkownje je 790 000 eurow k dispoziciji. We wobłuku dźesać naprawow Leaderoweje spěchowanskeje strategije we wobłukach zakładne zastaranje a žiwjenska kwalita, hospodarstwo a dźěło, turizm a wočerstwjenje w bliskosći, kubłanje, bydlenje, přiroda a wobswět kaž tež akwakultura a rybarstwo móža so zajimcy wo spěchowanje požadać. Wjace informacijow je na internetnej stronje www.ohtl.de/foerderung/aufrufe-leader/ podate.
Hač do 4. měrca móža so priwatne wosoby, předewzaća, komuny abo iniciatorojo w Rakečanskim běrowje towarstwa OHTL informować. Tam steja zdobom fachowcy k dispoziciji, kotřiž zajimcow poradźuja, wšako je wažne, swoju projektnu ideju a swójske zaměry prawje wopisać. Fachowcy pak skedźbnjeja na to, zo měli so zajimcy do toho telefonisce abo z mejlku přizjewić a sej termin wučinić.
Jenož jedna serbska firma
Choćebuz (SN/at). Zhromadne wustajenišćo serbskich firmownikow pod serbskej chorhoju na Choćebuskich rjemjeslniskich wikach lětsa žane wjace njebudźe. Na lisćinje wustajerjow za přehladku 20. a 21. wulkeho róžka wuhladaš hišće jeničku serbsku firmu, Heinzojc drastowu šwalčernju ze Žylowa w hali 4. Zastupjeny pak budźe dale Roland Paprot ze Škodowa, kotryž z wukładźenjemi za špundowanje wikuje a je zdobom kładźe. Nic pak ze swójskim stejnišćom. „Kóšty su so jara zwyšeli“, rjekny wón. Za swójski zawod so to njewupłaći. Dokelž je Paprot fachowy poradźowar marki JOKA, budźe wón jako tajki na wustajenišću Choćebuskeje wotnožki předewzaća W. & L. Jordan w hali 2.
Mnohich delnjoserbskich firmownikow, kotřiž běchu so do korony na zhromadnym wustajenišću wobdźělili, su zwyšene płaćizny za přestrjeń a posłužby wottrašili. 2020 na přikład płaćeše ratarski wěcywustojny Juro Hanška z Brjazyny 35 eurow za kwadratny meter a 80 eurow medijoweje pawšale. Lětsa bjeru za kwadratny meter 70 eurow, obligatoriskej stej pawšali 100 eurow za marketing a 140 eurow za techniku a serwis.
Prosće předrohe
Bioratarjo bórze ze „Sprawnym originalom“
Bioratarjo Hornjeje Łužicy zeńdźechu so tele dny w Nuknicy na mjeztym třeće stajne blido. Tónkróć zaběrachu so z wosebitej zwičnjenskej strategiju ambicioněrowaneje iniciatiwy.
Nuknica (SN/BŠe). Ratarjo, młynkojo a pjekarjo měli w přichodźe hromadźe dźěłać. Znajmjeńša je tole zaměr projekta, kotryž bě loni iniciatiwa Slow food Łužica zwjazkowemu ratarskemu ministerstwu zapodała. Projekt stej ambicioněrowanej čłonce iniciatiwy Anke Knaak a Kerstin Mickan nětko bioratarjam Hornjeje Łužicy předstajili, wšako maja woni najwažnišu rolu zabrać. Mjez nimi běchu na přikład Marko Smoła z Nuknicy, Ignac Wjesela z Chrósćic, Ronny Rebiš z Kašec, Beno Šołta ze Žuric a Maćij Čórlich ze Sulšec. Na jich polach plahowane žitne družiny, su mjenujcy přidawk za cyle wosebitu marku, kotraž ma so w regionje etablěrować. „Chcemy, zo něšto nowe nastanje. Ludźo měli sej kusk domizny kupić móc“, Kerstin Mickan wuzběhny. Z biowudźěłkow ratarjow, kotrež młyny w regionje do muki předźěłaja, maja pjekarjo „Sprawne originale“ kreěrować.
Tež za přichodny tydźeń su ratarjo protesty přizjewili
Budyšin (SN/BŠe). Mjeztym hižo pjaty dźeń protestuja ratarjo po cyłej Němskej. Tež w Hornjej Łužicy wotměchu dźensa wot ranja wjacore akcije. Prěni raz su burja ze swojimi ratarskimi mašinami kružny wobchad při Třoch hwězdach blokowali. Busam bě móžno zwisk dale wužiwać, tola dojězdźowarjo dyrbjachu za druhimi pućemi pytać. Wjele z nich přijědźe ze směra Słoneje Boršće do sprjewineho města. Tež zajězdaj zwjazkoweje awtodróhi A4 Budyšin wuchod a zapad su ratarjo zašlahali. W měsće dóńdźe k wobchadnym haćenjam.
Za dalekubłanje mocy wjazali
Z přetwarom na předewzaće přichoda chce koncern Łužiska energija a milinarnje (LEAG) swoje kompetency zdobom wužiwać, zo by regionalne předewzaća podpěrał. Zo bychu so jich sobudźěłaćerki a sobudźěłaćerjo w přichodźe w nowych technologijach dale kubłali, dźěłatej LEAG a Choćebuska industrijna a wikowanska komora (IHK) ze Zwjazkom za kwalifikaciju we Łužicy za wobnowjomne energije (QLEE) hromadźe.
Choćebuz (SN/at). Poskitki maja so we wobłuku nałožowanja wodźika a wobnowjomnych energijow wuwić, kotrež su na potrjebu jednotliwych firmow wusměrjene. To je jadro kooperaciskeho dojednanja, kotrež staj personalny předstejićer LEAG Jörg Waniek a hłowny jednaćel IHK Choćebuz dr. Wolfgang Krüger wčera w delnjołužiskej metropoli podpisałoj.
Protestuja dale
Budyšin (SN/BŠe). Akciski tydźeń ratarjow dale traje. Dźensa wotměchu w Drježdźanach wulku demonstraciju, na kotruž sej tež ratarjo z Hornjeje Łužicy dojěchu. Korso je dźensa w 7 hodźin z Lubija wotjěł. Kaž krajnoradny zarjad Budyskeho wokrjesa zdźěli, jědźechu woni po zwjazkowej dróze B6 do Drježdźan. Podłu čary dyrbja šoferojo z haćenjemi ličić. Runje tak su přichodne dny lokalne akcije planowane. Zajězd na zwjazkowu awtodróhu A4 we Wósporku je wot dźensnišeho do pjatka stajnje wot ranja 6 hodźin do 12 hodźin zašlahany. Tež zajězdaj na A4 w Kodrecach a Zhorjelcu stej wot 6 hodź. do 11 hodź. do wobeju směrow Drježdźany a Wrócław blokowanej.
Kowar budźe wandrowski
Serbski kowar Matej Hrjehor za měsac Łužicu wopušći a to znajmjeńša na tři lěta. Po róžowej póndźeli poda so rjemjeslnik na pućowanje po swěće – jako wandrowski. Jako zajimc pod 30 lětami, kiž njeje zadołženy, kiž nima dźěći a njeje woženjeny, chce wuwučeny rjemjeslnik dale wuknyć. Delni Sulšečan wě derje na pućach, kotrež su kamjenjojte, kročić. Hižo jako serbski skawt je wón nawuknył pod jednorymi wuměnjenjemi žiwy być. Swoje rjemjesło jako kowar je daloko zdaleny wot Łužicy, w Tübingenje nawuknył. Potom je w Berlinje a Drježdźanach w modernych předewzaćach dźěłał.
W Čornym Chołmcu porno tomu měješe njedawno składnosć, swoje rjemjesło na tradicionalne wašnje předstajić. Na Krabat-Mystica je wón tři dny kował a na mnohe prašenja wotmołwił. „Mějach mnohich zajimowanych přihladowarjow“, 28lětny rjekny, „wjele je mi powědało, zo su něhdy same powołanje kowarja nawuknyli. Někotři nanojo su swojim dźěćom tež wo kowanju powědali, štož sym tu a tam ze swojej wědu wudospołnił.“
