Łužica w miniaturje
Ze serbskimi pakćikami dźěći zwjeselili
Radwor (pi/SN). Na swjedźenju swjateho Mikławša stej kubłanska referentka Domowiny Katrin Suchec-Dźisławkowa a regionalna rěčnica za teritorij Budyskeje župy „Jan Arnošt Smoler“ Katja Liznarjec pěstowarnjam wosebite pakćiki přepodałoj. W nich běchu nowej kamishibai-powědce wo Připołdnicy a Pumpoće, kotrejž je Sonja Hrjehorjowa zhotowiła, dźěćacy trikowy film wo Krabaće, cejdejka ze serbskej hudźbu a nowše dźěćace knihi Ludoweho nakładnistwa Domowina kaž tež wšelake materialije za kubłarki a kubłarjow, přewostajene wot Rěčneho centruma WITAJ. Na póndźelnej darnej akciji wobdźělenej běštej tež Weronika Butendeichowa z RCW a w Radworju čłonka tamnišeje staršiskeje iniciatiwy Birgit Elsner.
Njewšědna adwentna protyka
W Budyskim dźěćacym dnjowym přebywanišću „Jan Radyserb-Wjela“ maja kubłarki tuchwilu wulke wjeselo. Wot 1. decembra dóstawaja tam kóždy dźeń wosebitu překwapjenku.
Budyšin (SN/MiR). Nawodnica pěstowarnje w nošerstwje Miłočanskeho Křesćansko-socialneho kubłanskeho skutka Grit Henčlowa je zahorjena: „Tajke něšto hišće měli njejsmy. Starši nas a dźěći wšědnje překwapjeja.“ 1. decembra, přińdźe Antje Paulikowa z košikom do pěstowarnje. Do njeho spakowane měješe oranže, čaj a słódkosće. Štwórtk posylnichu so kubłarki z pokładźenych całtow, kotrež bě jim rězniski mišter Roman Wjenk přewostajił. Pjatk wjeselachu so nad swěčkami – te bě Janika Dresslerowa sobu přinjesła. A dźensa přepoda jim Alexander Tröger čaj, kofej a tykanc.
Rozsudźić ma nawodnistwo šule
Na zakładnych šulach Sakskeje su wospjet rjadowniske cyłki dźělene. To rěka, zo nimaja šulerjo móžnosć, z tamnymi wuknjacymi swojeje rjadownje hromadźe wuknyć abo w přestawkach so zetkać.
Budyšin (SN/MiR). Wučerjo maja po móžnosći jenož w jednej rjadowni wučbu podawać. Sakske ministerstwo za kultus je za to 22. nowembra wotpowědne postajenje wudało.
Rjadowanja na jednym boku kontakty wobmjezuja, na tamnym pak přewostajeja rozsud zamołwitym na kubłanišćach. Byrnjež w zjawnym žiwjenju wobmjezowanja byli, su zakładne šule a dźěćace dnjowe přebywanišća dale wotewrjene. A wone maja, zapřijimajo hodowne prózdniny, we wobmjezowanym prawidłowym wudźeržowanju dale dźěłać. Šulske nawodnistwo resp. nošer šule zdobom wo tym rozsudźi, hač cyło-dnjowske poskitki přewjeduje.
Do potajneje šule na pruwowanje
Zapozdźenja při zapisanju
Sakske uniwersity mjez wukrajnymi studentami nadal woblubowane
Lipsk (dpa/SN). Woni pochadźeja z Chiny, Kanady, Awstralskeje, Italskeje a dalšeho wukraja: Najebać koronapandemiju su sakske wysoke šule mjez studowacymi dale woblubowane. Přirunujo z lětom 2020 zajim za studij w swobodnym staće na mnohich městnach zaso přiběra, kaž naprašowanje powěsćernje dpa wujewja. Přiwšěm wostawa imatrikulacija wukrajnych studentow koronakrizy a płaćiwych wobmjezowanjow pućowanja dla dale wobćežna naležnosć.
Připódla prajene
Kreatiwne dny za prózdniny
Slepo (AK/SN). Spěchować projekty w Serbach je w Sakskej dźensa samozrozumliwe. Zo pak wuhotowarjo wupisanjow na swojich internetnych stronach požadanja w serbskej rěči wozjewjeja, skerje mjenje. To dyrbješe njedawno nawodnica horta na Zakładnej šuli „Dr. Marja Grólmusec“ Slepo dožiwić. Składnostnje 750lětneho wobstaća wsy chce so hort klětu w zymskich prózdninach z kreatiwnymi dnjemi wobdźělić. Ideja šulerjow je twarić wšelke objekty z legoklockami. Za nakup klockow trjebaja pjenjezy. „Tuchwilu smy zapřijeći do wothłosowanja wo pjenježnych darach we wobłuku akcije Ludoweje banki Raiffeisenbanki. Smy so ze swojim projektom tam požadali“, Christin Becker rozprawja. „Hač do 28. nowembra hišće móža ludźo tam wothłosować. Smy so z projektom w němskej a serbskej rěči požadali. Nažel su při wozjewjenju projektowych idejow na internetnej stronje jenož němski tekst přewzali.“
Šulerki a šulerjo 11. lětnika Serbskeho gymnazija Budyšin běchu ...
Wotewrjeniza dalše pokiwy na dobro šulow
Zaměr skutkowanja referentki Domowiny za kubłanje a dorost Katrin Suchec-Dźisławkoweje je, na serbskich a serbšćinu podawacych šulach docpěć najlěpše wuměnjenja za serbšćinu wuknjacych.
Budyšin (SN). Zarjad Domowiny chce zwisk k zastupjerjam narodneje organizacije na šulskich konferencach w Sakskej skrućić. Zapřijate su serbske kubłanišća resp. tajke ze serbskorěčnej wučbu w Sakskej. Prěnje zetkanje wotmě so wutoru popołdnju na žurli Serbskeho domu w Budyšinje. Katrin Suchec-Dźisławkowa poda přitomnym dohlad do prawniskich zakładow za serbske šule w Sakskim šulskim zakonju. Zwjazowała je swoje wuwjedźenja z wočakowanjemi na skutkownosć „serbskeje prezency“ w šulskich konferencach. Kaž kubłanska referentka Domowiny potwjerdźi, je wažne „so słowa jimać a serbske temy narěčeć“. K tomu słušeja nastorki šulskemu wjednistwu hladajo na to, profilować serbskosć w šuli a na přikład na internetnej stronje.
