Kubłanska referentka Domowiny wo dopóznaćach wuměny w FUEN
Budyšin/Helsinki (SN/BŠe). Kajke kubłanske šansy ma šwedska mjeńšina w Finskej? Z kotrymi wužadanjemi dyrbja so mjeńšiny generelnje w šulskim wukubłanju swojich dźěći rozestajeć? Tajkim a podobnym prašenjam wěnowachu so zastupjerjo narodnych mjeńšinow njedawno na lětnej konferency dźěłoweho zjednoćenstwa za kubłanje pod třěchu Federalistiskeje unije europskich narodnosćow (FUEN). Zetkanje wotmě so mjeztym hižo šesty raz, tónraz w finskej stolicy Helsinki/Helsingfors. Ze stron Serbow wobdźělištaj so referentka za kubłanje pola Domowiny Katrin Suchec-Dźisławkowa a jednaćel Serbskeho šulskeho towarstwa Andreas Ošika.
Budyšin (SN). Pod titulom: „Kulturelle Sicherheit in zweisprachigen Gemeinden am Beispiel der drohenden Nichteinrichtung einer fünften Klasse in Radwor/Radibor 2005“ je dźensa nowa publikacija w małym rjedźe Serbskeho instituta wušła. Kniha awtorki Karoline Brützel złožuje so we hłownym na jeje masterske dźěło. Strach zawrěća serbskich srjedźnych šulow běše spočatk 2000tych lět. Publikacija skići zajimowanym čitarjam dohlady do tehdyšich podawkow, wosebje přez perspektiwu potrjechenych. Kniha ma wobjim 115 stronow a je wotnětka na předań.
Hižo loni kónc junija je so Serbske mustwo holcow a žonow z testowej hru w Ralbicach na koparske mišterstwo narodnych awtochtonych mjeńšin Europy přihotowało. Tež dalša testowa hra sobotu, 19. meje, přewjedźe so w Delanach, a to wot připołdnju 11 hodź. Potom pak njehraja serbske koparki, kaž tu na wobrazu přećiwo hólčemu dorostowemu cyłkej Sokoła Ralbicy/Hórki, ale přećiwo mustwu Hlinowskeho SK. Wo ćělne derjeměće přihladowarjow so w Ralbicach sobotu postaraja. Dalši test Serbskeho mustwa holcow w žonow budźe njedźelu, 2. junija, w Slepom. Foto: Konstantin Hrjehor
Chinski prezident Xi Jinping (nalěwo) je ruskeho prezidenta Wladimira Putina w stolicy Pekingu na dwaj dnjej trajacy statny wopyt witał. Xi je Putinej dalše wuske partnerstwo přilubił. China je najwažniši zwjazkar Ruskeje, kotraž je wójny w Ukrainje dla mjezynarodnje w dalokej měrje izolowana. Peking Moskwu tež w tymle nastupanju podpěruje. Foto: pa/AP/Sergej Bobyljew
Nětko je prawy čas w zahrodźe rostliny wšelakeje družiny sadźeć, wšako su „lodowe muže“ nimo. Krollec zahrodnistwo we Wudworju, z nawodnicu Kerstin Kroll (naprawo), je wulku ličbu tomatow a kórkow plahowało a so tak na nawal kupcow přihotowało. Wosebje požadana je družina tomatow „Harzfeuer“, kotruž sej lubowarjo hižo za čas NDR chwalachu. Foto: Feliks Haza
Wot lěta 1970 hižo wopytuja šulerjo Ralbičanskeje serbskeje wyšeje šule partnerske kubłanišćo w čěskim Mělníku. Tež wčera, srjedu, pobychu woni na swojej tradicionalnej wuprawje. Na zetkanju předstajištej sej 5. lětnikaj wobeju šulow kulturnej programaj. Nimo toho wobhladachu sej šulerjo měšćanski centrum Mělníka. Dale steješe zhromadne sportowanje na agendźe wopyta. Po wuspěšnej wuměnje a mjezsobnym zeznaću nawróćichu so šulerki a šulerjo hišće samsny dźeń domoj do Łužicy. Foto: Jan Rjeda
