Nowa wóčnolěkarska praksa
Budyšin. W lěkarskim domje Budyskeje chorownje při Měšćanskim nasypje wotewrje dr. Conrad Hoffmann pjatk, 1. februara, nowu wóčnolěkarsku praksu. Kaž chorownja w nowinskim wozjewjenju zdźěli, móža sej pacienća hižo nětko pod telefonowym čisłom 03591/ 37 161 termin dojednać. Wotewrjenske časy praksy budu póndźelu wot 10 do 12 hodź. a wot 13 do 18 hodź., wutoru wot 8 do 12 hodź. a wot 13 do 15 hodź., srjedu wot 8 do 12 hodź. a wot 13 do 18 hodź. kaž tež štwórtk wot 10 do 12 hodź. a wot 13 do 16 hodź.
Wustajeńca k jubilejej
Budyšin. W znamjenju 30. róčnicy měrliweje rewolucije w NDR steji filatelistiska a numismatiska wustajeńca „30 lět bjez hranicow zběrać, slědźić a wuhotować“, kotruž wotewru jutře, štwórtk, w 19.30 hodź. w rumnosćach Budyskeje Ludoweje banki. Tam pokazaja listowe znamki, wosebite kołki, pjenjezy, fota a nowinske rozprawy ze zašłych třiceći lět. Poł hodźiny do wotewrjenja móža sej wopytowarjo wosebity pjenjez ze slěbra razyć dać. Wjacori fachowcy jutře wo wustajenych objektach porěča. Wo ćělne derjeměće budźe postarane.
Za dźěłarničku so přizjewić
Wopominaja fararja Fryca
Gołkojce (SN). Składnostnje 200. posmjertnin fararja Jana Bjedricha Fryca přeproša dźěłowa skupina Serbska namša jutře, wutoru, na wopomnjensku swjatočnosć do Gołkojc (Kolkwitz) pola Choćebuza, hdźež chcedźa na přełožerja Stareho testamenta do serbšćiny spominać. Wot 14.30 hodź. zaklinči w Gołkojskej cyrkwi pišćelowa hudźba. W 15 hodź. započnje so nutrnosć z dušepastyrku Katharinu Köhlerowej, a při rowje Fryca połoža wěnc. Po tym předstaja rodopisne slědźenja wo fararju. Wšitcy zajimcy su wutrobnje witani.
Ćežkochorych přewodźeć
Kamjenc (SN). Nowy přihotowanski kurs za přewod ćežkochorych a mrějacych zahaji so srjedu, 6. februara, w Kamjenskim zetkawanskim domje Carity. Pod hesłom „Přewodźeć nawuknyć“ ma kurs hač do 7. měrca trać – a to kóždu srjedu wot 17 do 21 hodź. kaž tež dwójce sobotu wot 9 do 15 hodź. Přizjewjenja su móžne w domje Carity w Kamjencu pod telefonowym čisłom 0 35 78 / 37 43 12. Tam dóstanu zajimcy dalše informacije wo kursu a jeho wobsahach.
Serbski sejm so schadźuje
Wětošow. Třeće schadźowanje Serbskeho sejma wotměje so jutře, sobotu, na Awgusta Bebelowej 9 we Wětošowje. W 10 hodź. započnje so dźěłarnička wo internej a eksternej komunikacij. Posedźenje zahaji so w 13 hodź. z poskitkom rozmołwy přitomnym hosćom. Dale diskutuja wo naćisku jednanskeho porjada, wo wobsahowych zaměrach sejma a wo lětušich dźěłowych ćežišćach. Hosćo su witani.
Wustajeńca so skónči
Budyšin. Aktualna kabinetna wustajeńca w Muzeju Budyšin z wobrazami Ulriki Mětškoweje budźe njedźelu posledni raz widźeć. Při tej składnosći wěnuje so Erika von Borries zajutřišim w 15 hodź. žiwjenju Wilhelma Müllera (1794–1827), na kotrehož teksty so twórby Ulriki Mětškoweje złožuja.
Wo wukubłanju we wójsku
Budyšin. Informaciske zarjadowanje wo wukubłanskich a studijnych móžnosćach w Zwjazkowej woborje wotměje so póndźelu, 14. januara, wot 14 hodź. w Budyskim powołanskim informaciskim centrumje na Nowosólskej.
Swětło do ćmy stawiznow
Do noweho horta pohladnyć
Pančicy-Kukow. Kubłarki dwurěčneho dźěćaceho dnjoweho přebywanišća Pančicy-Kukow, kotrež je w nošerstwje Křesćansko-socialneho kubłanskeho skutka (CSB), přeprošeja na dźeń wotewrjenych duri do noweho horta, a to pjatk, 11. januara, wot 14 do 18 hodź. Wšitcy zajimcy su wutrobnje witani po wulkomyslnych rumnosćach so rozhladować. Kubłarki wjesela so na zajimawe rozmołwy wokoło hortoweho žiwjenja a noweho domu a rady na prašenja wotmołwja.
Paliatiwna stacija hotowa
Wojerecy. Po něhdźe wosom měsacach twarskeho časa je na 3. poschodźe Wojerowskeho jězorinoweho klinikuma nowa paliatiwna stacija nastała. Tam maja městno za šěsć pacientow a jich přiwuznych. Techniske wuhotowanje rumnosćow kaž tež barby a meble w nich su na to wusměrjene, wobydlerjam přijomnu atmosferu skićić a runočasnje najlěpše lěkarske zastaranje zaručić. Za twar paliatiwneje stacije nałožichu dohromady 1,32 milionow eurow, z čehož je sakske socialne ministerstwo 1,04 miliony eurow spěchowało.
Kamjenje postajić dać
Kamjenc. Wosebitu rěčnu hodźinu změja jutře, wutoru, wot 17 do 18 hodź. w Kamjenskim Muzeju zapadneje Łužicy. Štóž ma doma někajki kamjeń abo samo fosil z pućowanja abo dowola, móže sej wot geologi Jensa Czoßeka rjec dać, wo kotry so jedna. Při tym je wšojedne, hač pochadźa kamjeń z pobrjoha morja abo z horow. Lěpšina přiwšěm je, móže-li wopytowar rjec, hdźe je kamjeń namakał. Zastup je darmotny.
Kak demokratiju spěchować?
Budyšin. Z prašenjom, što zamóža spěchowanske programy za demokratiju, zaběra so zajutřišim, srjedu, wot 19 hodź. stajne blido Budyskeje skupiny CDU w piwarni na Thomasa Mannowej. Z hosćom budźe Marie Melzer, kotraž w Budyšinje aktiwity spěchowanskeho programa „Partnerstwa za demokratiju“ koordinuje. Wona porěči wo swojich nazhonjenjach a tež wo tym, što móža spěchowanske programy wuskutkować. Zarjadowanje je zjawne.
Tež lětsa dale poradźuja
Porěči wo jězoru
Zhromadnje blidotenis hrać
Konjecy. Kóždolětny zhromadny wječor za wšěch, kotřiž chcedźa zaso jónu blidotenis hrać, wotměje so jutře, pjatk, na žurli Konječanskeho towarstwoweho domu. Započatk za dźěći je wot 17 hodź. a za dorosćenych wot 19 hodź. Konječanske blidotenisowe towarstwo wšitkich zajimcow wutrobnje přeprošuje.
Kak štomiki wotbyć?
Budyšin. Hižo druhi dźeń noweho lěta je Budyski wokrjes wčera w nowinskim wozjewjenju na to skedźbnił, kak móža wobydlerjo swoje hodowne štomiki najlěpje wotbyć. Tak móža je rozkuskować a do sudobja za biowotpadki ćisnyć. W januaru hodźi so hodowny štomik nimo toho cyły pódla wotpadkoweho sudobja stajić. Za to njesmědźa žana lameta abo druhe wěcy na šmrěku abo jědli wisać. Štomiki, wjetše hač 1,50 metrow, dyrbja přikrótšene być, hałžki pak maja na nich wostać. Wotrězane hałžki wotpadkowe awto žane sobu njebjerje.
Biblioteka zawrjena
Kamjenc. Měšćanska biblioteka w Lessingowym měsće wostanje wot 24. decembra do 2. januara zawrjena. W tym času maja zajimcy składnosć, digitalne wupožčowanje Onleihe wužiwać, hdźež móža sej e-booki wupožčić. Wot štwórtka, 3. januara 2019, budźe knihownja zaso wotewrjena.
Zaso so nawróćić?
Budyšin. Štwórtk, 27. decembra, wotměje so na wulkej žurli Budyskeho krajnoradneho zarjada „bursa nawrótnikow“. Wot 10 do 14 hodź. změja zajimcy, kotřiž tuchwilu hišće zwonka domizny dźěłaja, chcedźa pak so zaso nawróćić, přiležnosć wo dźěłowych městnach we Łužicy so informować.
Wo Kitu husličkarju
Budyšin. Dźěći móža so na dalše předstajenje klankohry „Kito husličkar“ wjeselić, kotruž 27. decembra w 10 hodź. w Budyskim Dźiwadle na hrodźe předstaja. Dokelž Kito hudźbu lubuje, by so najradšo z husličkarjom stał.
Kupjel po hodźoch zaso přistupna
Kamjenc. Kamjenska halowa kupjel wostanje wot 24. do 26. decembra zawrjena, wot 27. do 30. decembra pak budźe wot 9 do 18 hodź. přistupna. Tež silwester a Nowe lěto njebudźe tam móžno so kupać, hakle 2. januara wot 9 do 20 hodź. kaž tež 3. a 4. januara wot 9 do 22 hodź.
Agentura zawrjena
Nowy kalender požadany
Hamor (SN). „Kołowokoło Bjerwałdskeho jězora 2019“ rěka nowy lětny kalender łužiskeje jězoriny. Za šěsć eurow móža sej jón zajimcy mjez druhim na Hamorskim gmejnskim zarjedźe kupić. Widźeć su wšelake fotowe motiwy, kaž swětłownja při jězoru. Požadany hodowny dar pak su tohorunja zastupne lisćiki za klětu planowane zarjadowanja w Dźiwadle we Wuchu.
Na farmje swjećili
Wojerecy (SN). Wulke wjeselo knježeše minjeny tydźeń mjez wopytowarjemi Wojerowskeje dźěćaceje a młodźinskeje farmy. 30 holcow a hólcow swjećeše tam swoju adwentničku, a to ći, kotřiž nimale wšědnje na farmu, zarjadnišćo Miłočanskeho Křesćansko-socialneho kubłanskeho skutka, přichadźeja, zo bychu tam skót picowali. Někotři w cirkusu Krabatino sobu skutkuja, dalši so na projektach wobdźěleja. Za swoju adwentničku dóstachu wot Wojerowskeho Lionsoweho kluba 350 eurow darjene.
Čitanski dobropis darić
Wysokoskok z hudźbu
Wóslink (SN). Na Wóslinčanskej Ewangelskej srjedźnej šuli wotmě so spočatk decembra tradicionalny wysokoskok z hudźbu. Lětsa zličichu telko wobdźělnikow kaž hišće ženje. Přitomny bě tež jednaćel kubłanišća Henry Nitzsche. Susann Trepte a Moritz Scholze, wobaj ze 6. lětnika, běštaj najlěpšej. Absolutny rekord pak docpě z přeskočenymi 1,60 metrami Aaron Wehofsky z dźewjatki.
Šek za projekt přepodali
Hórnikecy (SN). Łužiska jězorinowa załožba podpěruje projekt Hórnikečanskeje Energijoweje fabriki „Hladanišćo – grafiti zetka ruinu“ z 3 000 eurami. W lětušich nazymskich prózdninach su w energijowej fabrice dźěłarničku pod mjeno- wanym hesłom přewjedli. Minjeny pjatk šek nětko přepodachu.
Přihotuja přebytk dźěći
