Poradźuje darmotnje
Budyšin. Jutře, 21. junija, přeprosy zapósłanc krajneho sejma a wokrjesneho sejmika Lěwicy, prawiznik Hajko Kozel, na darmotne socialne poradźowanje w Budyšinje. Zhromadnje z prawiznikom Gregorom Janikom, kiž je w socialnym prawje wosebje wobhonjeny, móže wón pomhać problemy nastupajo socialne prašenja rozrisać. Poradźowanje wotměje so wot 14 do 16 hodź. we wobydlerskim běrowje Lěwicy na Šulerskej 10. Zajimcy njech dojednaja sej termin pod telefonowym čisłom 0 3591/ 490 976.
Koncertuja pod lipu
Choćebuz. Mjeztym hižo 23. raz wotměje so zajutřišim, pjatk, w 17.30 hodź. w Choćebuzu komorny koncert pod lipu. Dokelž w Serbskim muzeju saněrowanske dźěła hišće traja, budźe koncert w Serbskim domje na Bebelowej 82. Wječor wuhotuja šulerki a šulerjo Choćebuskeho konserwatorija. Wšitcy zajimcy su wutrobnje witani.
25 lět zwjazk Carity
Wotewru wustajeńcu
Smochćicy. Přehladku z twórbami Claudije Böhme wotewru jutře, srjedu, w 19 hodź. w Smochčanskim Domje biskopa Bena. W njej pokazuja rysowanki z wołojnikom a krydu kaž tež wšelake fotografije. Wuměłča ma za wulke wužadanje, při rysowanju jónkrótnosć jednotliweje wosobiny abo objekta wotkryć a zwobraznić. Přehladka budźe hač do 31. awgusta w cyrkwi a we hłownym domje přistupna.
Šulerjo hudźa
Budyšin. W Němsko-Serbskim ludowym dźiwadle wuhotuje Budyska wokrjesna hudźbna šula jutře, srjedu, w 19 hodź. koncert ke kóncej šulskeho lěta. Pod hesłom „Zetkanja“ zaklinči potom wulka paleta hudźby wot sola hač k sinfoniskemu orchestrej, wot baroka hač k swingej. Šulerjo, kotřiž su lětsa delni schodźenk II kaž tež srjedźny schodźenk I abo II zakónčili, dóstanu we wobłuku koncerta swoje wuswědčenje. Zastupne lisćiki dóstanu zajimcy při kasy Němsko-Serbskeho ludoweho dźiwadła.
Wobornicy z jubilejom
Běły Chołmc. Na 90lětne wobstaće swojeje dobrowólneje wohnjoweje wobory zhladuja wot dźensnišeho hač do njedźele w Běłym Chołmcu. We wobłuku dźensnišeje diskoteki dožiwi publikum show młodźinskich wobornikow z wodu a swěcu. Jutře w 14 hodź. slěduje ćah wobornikow po wsy. Na to prezentuja woni swoju techniku. Wječor budu reje. Njedźelu dopołdnja přeproša na rańše piwko z dujerskej hudźbu a na wobjed z praženym swinjećom.
Za rěčny kurs so přizjewić
Pančicy-Kukow. Wot 20. awgusta hač do 10. decembra 2018 wotměje so w Pančicach-Kukowje 2. natwarjacy kurs (3. semester) serbšćiny. Wučba je stajnje póndźelu wot 19 hodź. hač do 20.30 hodź. w Šuli Ćišinskeho. Přizjewjenja přijimuje Rěčny centrum WITAJ pod telefonowym čisłom 03591/ 550 400 abo e-mailnje pod .
Komponist w telewiziji
Podstupim/Budyšin. Přichodne wusyłanje telewizijneho magacina RBB Łužyca jutře w 13.30 hodź. wěnuje so komponistej a nošerjej Myta Ćišinskeho Jurej Mětškej. Dokumentaciju „Jedna gesta, jedyn wodych, jedyn kosmos“ běštej Roman Pernak a Měto Zawadzki w jutrownym času w Budyšinje nawjerćałoj.
Nowa sirena je wótřiša
Pančicy-Kukow. Při ponowjenju třěchi Šule Ćišinskeho w Pančicach su tež nowu sirenu připrawili. Dyrbja ju lědma hladać, a wona funguje tež bjez miliny, informowaše wjesnjanosta Markus Kreuz (CDU) na zašłym posedźenju gmejnskeje rady. Nimo toho je nowa sirena wótřiša hač dotalna. Gmejna dyrbješe za nju 2 500 eurow připłaćić. Samsny model chcedźa nětko tež w Kukowje a we Wotrowje instalować.
Pućuja po bahnje
Dubrjenk. Na přirodowědnu ekskursiju po Dubrjenskim bahnje podać móža so zajimcy njedźelu, 17. junija, w 10 hodź. Bodo Plesky z Kamjenskeho Muzeja zapadneje Łužicy powjedźe wobdźělnikow po jónkrótnej krajinje, kotraž je najwjetši hišće zdźeržany bahnowy kompleks Hornjeje Łužicy. Wobdźělenje płaći na wosobu pjeć eurow, potuńšene tři eura. Zajimcy njech přizjewja so pod telefonowym čisłom 03578/ 78 830. Při tym jim zdźěla, hdźe so pućowanje započnje. Je radźomne sej dalokowid sobu wzać.
Wo pjenjezach cyrkwje
Smochćicy. W rjedźe Smochčanske jewišćo přeproša Dom biskopa Bena jutře, wutoru, w 19.30 hodź. na dalše zarjadowanje. Pod hesłom „Pokleće abo žohnowanje“ póńdźe wo financowanje cyrkwjow w Němskej. Referent je dr. Norbert Feldhoff. Wón bě wot lěta 1979 hač do 2004 generalny wikar Kölnskeho arcybiskopstwa a w tym zastojnstwje zamołwity za jeho financy. Feldhoff zaběra so z prašenjom, kak měła cyrkej dźensa z pjenjezami a zamóženjom wobchadźeć a kak bohata smě abo kak chuda ma cyrkej być. Zastup je darmotny.
Zaběraja so z ptačkami
Wojerecy. Přichodna akademija seniorow Křesćansko-socialneho kubłanskeho skutka wotměje so štwórtk, 14. junija, w 10 hodź. na Wojerowskej dźěćacej a młodźinskej farmje. Tam móža mnohotnosć ptačkow w biosferowym rezerwaće zeznać a zhonja wot Herberta Schnabela, kak móžeš je škitać.
W dźiwadle zaso čitaja
Budyšin. Dwanaty raz přewjedźetej Němsko-Serbske ludowe dźiwadło a Rěčny centrum WITAJ za zahoritych čitarjow 3. a 4. lětnika na kóncu šulskeho lěta serbsku čitansku nóc. Pjatk, 8. junija, zetkaja so mali čitarjo ze swojim spanskim měchom a najlubšej serbskej dźěćacej knihu w Dźiwadle na hrodźe. Na wobdźělnikow čaka zaso pisana a zabawna nóc z tójšto překwapjenkami.
Dźěłaja w Lipju
Pančicy-Kukow. Čłonojo Domowinskeje skupiny Pančicy-Kukow njech njezabudu na přichodne dźěłowe zasadźenje při pomniku Ćišinskeho w Lipju, kotrež budźe sobotu, 9. junija. Pomocnicy zetkaja so w 9 hodź., a njech sej trěbny grat sobu přinjesu.
Poskića darmotnu protyku
Kamjenc. Woblubowanu šulersku protyku Sakskeho krajneho sejma za šulske lěto 2018/2019 dóstanu zajimcy wotnětka zaso darmotnje w běrowje zapósłanca krajneho sejma Alojsa Mikławška (CDU) w jeho Kamjenskim běrowje na Zapadnej 4. Běrow je přistupny wot póndźele do štwórtka wot 8 do 16 hodź. a pjatk wot 8 do 14 hodź.
Přesadźuja swinje a pjeriznu
Budyšin. Zjawne přesadźowanje swini a pjerizny budźe jutře, štwórtk w 10 hodź. w Budyskim krajnoradnym zarjedźe na Dwórnišćowej w stwě 007. Jedna so wo 60 swini, mjez nimi dwě rancy z prosatami a šěsć kundrozow. Dale poskićeja 16 huškow, 33 husow, 21 kačkow a dalšu pjeriznu. Wšón skót přesadźuja jako jedyn los. Bywši wobsedźer njemóže skót hižo zastarać.
Radźićeljo so zetkaja
Pančicy-Kukow. Přichodne zjawne posedźenje gmejnskeje rady Pančicy-Kukow budźe jutře, štwórtk, w 19 hodź. w awli Šule Ćišinskeho. Na dnjowym porjedźe steja wjacore twarske temy. Mjez druhim póńdźe wo wužiwanje zbytkow Lejnjanskeje mlokarnje a wo třěšne wokna šulskeho twarjenja. Přizamknje so njezjawny dźěl posedźenja.
Koncertuja w ruinje cyrkwje
Budyšin. W rozwalinje Budyskeje mnišeje cyrkwje wotměje so zajutřišim, 8. junija, w 19 hodź. chórowy koncert. Budyski chór pisaneho swěta pod nawodom Reinharda Simmgena a Beaty Tarrach jón wuhotuje. Zastup je darmotny. Za to proša wo dary za projekt w Nepalu.
Dróha zawrjena
Baćoń. Wokrjesna dróha K 7205 je wot křižowanišća pola Baćonja hač k statnej dróze S 100 hač do 22. junija dospołnje zawrjena. Tam w dwěmaj wotrězkomaj asfaltowu worštu a kromu ponowja. Wokołopuć wjedźe po S 100, S 101, Chrósćicy, S 98 a Bóšicy.
Předstaji knihu na hrodźe
Lichań. Swoju disertaciju wo hrabi Friedrichu Casparu von Gersdorfje předstaji dr. Lubina Malinkowa sobotu, 9. junija, we 18 hodź. na Lichańskim hrodźe. Hród, w swojej dźensnišej formje wot Gersdorfa stworjeny, hraješe jako bydlenje za duchownych a zetkawanišćo pobožnych Serbow wažnu rólu w stawiznach zbudźenych kruhow. Lichański hród budźe sobotu wot 17.30 hodź přistupny. Wo mały přikusk a napoje postara so mějićel hrodu Paul Wehrle. Zdobom budźe móžno sej knihu na městnje kupić. Knižne předstajenje je w němskej rěči. Wšitcy zajimcy su wutrobnje přeprošeni.
Z rukami widźeć
Budyšin. Składnostnje dnja špatnje widźacych poskići Muzej Budyšin zajutřišim, srjedu, wosebite dožiwjenje. Špatnje widźacy a slepi změja we wobłuku wosebiteju wodźenjow składnosć, wubrane objekty přimnyć a je na te wašnje spóznać. Wodźeni započnjetej so w 10 a 13 hodź. Zastupny lisćik do muzeja płaći regularnje 3,50 eurow. Wšitcy špatnje widźacy zajimcy móža so za potuńšeny zastup 2,50 eurow na wodźenju wobdźělić. Wobmjezowaneje kapacity dla chcedźa špatnje widźacym prěnjorjadnje wobdźělenje zmóžnić.
Zabyte znowa wotkryć
Premjera za žony
Budyšin. Na prěnje žonjace čaporowe wiki přeprošuja sobotu, 2. junija, do Budyskeje Montessoriskeje zakładneje šule na Tzschirnerowej. Wot 14 do 17 hodź. změja na Benowej žurli kubłanišća šěroki poskitk trjebanych wěcow wot žonow za žony. Wo ćělne derjeměće postaraja so z kofejom a tykancom.
W měsće zaso twarja
Budyšin. Hłuboko- a dróhotwarskich dźěłow na Dróze Clary Zetkin dla dóńdźe wot přichodneje srjedy w Budyšinje k poćežowanju nadróžneho wobchada při Mosće měra. Wobchad do města powjedźe hač do kónca julija přez Móst swjateho ducha. Z města won wjedźe puć nimo twarnišća. W prěnim tydźenju awgusta budźe dróha mjez Mostom měra a Leibnitzowej asfaltowanja dla dospołnje zawrjena. Šoferojo dyrbja potom po zapadnej tangenće jězdźić.
