Přednošuje wo reformaciji
Chrósćicy. Lěto reformacije k wopomnjeću jeje 500. róčnicy w Němskej drje je oficialnje nimo. Wostawaja pak zajimawe historiske slědźenja, dopóznaća a publikacije. K tym je mjez druhim přinošował za biskopstwo Drježdźany-Mišno z wosebitej knihu a za dwurěčnu Łužicu z kapitlom w knize „Pjeć lětstotkow – Serbja a reformacija“ dr. Jens Buliš. W Chróšćanskej putniskej hospodźe přednošuje wón jutře, 9. hodownika, w 19.45 hodź. wo poměrje Serbow k reformaciji a wo łužiskich historiskich wosebitosćach. Wšitcy zajimcy su přeprošeni.
Wustaja rasowu pjeriznu
Delnja Hórka. Towarstwo plahowarjow rasoweje pjerizny 1878 Budyšin a wokolina přewjedźe jutře a njedźelu wulku přehladku rasoweje pjerizny w Delnjohórčanskej sportowni. Sobotu wot 9 do 17 a njedźelu wot 9 do 16 hodź. budźe něhdźe 400 pjeritych skoćatow w najwšelakorišich rasach a barbach widźeć.
Na adwentne wiki
Rakecy. Na terenje bywšeho Rakečanskeho kubła wotměja so jutře, sobotu, wot 14 hodź. adwentne wiki. Wo kulturne wobrubjenje staraja so mjez druhim zakładna šula, pěstowarnja a žónski chór.
Šulerjo koncertuja
Worklecy. Serbska zakładna šula „Michał Hórnik“ přeprošuje wšitkich staršich, dźědow, wowki a dalšich zajimcow na tradicionalny adwentny koncert jutře, pjatk, we 18 hodź. do Worklečanskeje ćěłozwučowarnje. Z wjele lubosću a wosobinskim zasadźenjom su so šulerjo a wučerjo na tónle wjeršk w běhu šulskeho lěta přihotowali. Tuž so organizatorojo bohateho wopyta nadźijeja.
Za adwentničku so přizjewić
Chrósćicy. Lětuša adwentnička wuměnkarkow a wuměnkarjow Chróšćanskeje gmejny wotměje so štwórtk, 14. decembra w 15 hodź. w Chróšćanskej wjacezaměrowej hali. Při kofeju, wosušku a kulturnym programje wjesela so wjesnjanosta a jeho sobudźěłaćerjo na rjane zhromadne popołdnjo z rentnarjemi. Organizatoriskich přičin dla njech so zajimcy hač do 11. decembra na gmejnje (tel. 035796/96 210, email: ) přizjewja.
Planuja jězbu seniorow
„Hłowna“ Bratrowstwa
Kulow. Wšitcy čłonojo a dalši zajimcy su přeprošeni na hłownu zhromadźiznu Kulowskeho Bratrowstwa, kotraž wotměje so pjatk, 8. decembra, w 19 hodź. na Kulowskej Bosćanowej žurli. Po spominanju na zemrětych čłonow, zbožopřećach wšitkim jubilaram towarstwa a po krótkich rozprawach předsydki, dźiwadłoweje skupiny a chóra přizamknje so přednošk superintendenta Jana Malinka „Reformacija a Serbja“.
Wo pohrjebniskej kulturje
Janšojce. Serbsko-němski domizniski muzej w Janšojcach přeprošuje jutře, štwórtk, we 18 hodź. na přednošk. Sobudźěłaćerjo Choćebuskeje wotnožki Serbskeho instituta porěča wo kultiskim, drohotnym a kurioznym w serbskej Delnjej Łužicy w Picnjanskim hamće. Jedyn z ćežišćow přednoška budźe serbska pohrjebniska kultura. Wo njej swědči mjez druhim historiska pohrjebna kuča, kotraž je w muzejowej bróžni widźeć.
Hodowna wustajeńca
Adwentnička skupinarjow
Pančicy-Kukow. Čłonojo Domowinskeje skupiny Pančicy-Kukow njech njezabudu na swoju adwentničku jutře, srjedu, we 18 hodź. w Starej hospodźe. Tam zaklinči dujerska hudźba a budźe składnosć, zhromadnje spěwać a pobjesadować. Na předań budu zaso serbske knihi z Ludoweho nakładnistwa Domowina. Tón wječor budźe tohorunja móžno podpisać wobydlersku akciju Minority SafePack za prawa narodnych mjeńšin w Europje.
Twarja busowej čakarni
Serbske Pazlicy. Nowej busowej čakarni smě Njebjelčanska gmejna w Serbskich Pazlicach twarić dać. Wužiwać budu za to spěchowanske srědki, kotrež bě gmejna spočatk nowembra připrajene dóstała. Dokelž pak so lěto nachila, njehodźi so naprawa lětsa hižo zwoprawdźić. Tohodla su čłonojo gmejnskeje rady na swojim zašłym posedźenju wjesnjanostu społnomócnili, jednać z firmami a přijomny poskitk za twar namakać. Klětu nalěto chcedźa čakarni z pomocu při- zwolenych 21 500 eurow a z gmejnskim podźělom natwarić dać.
PoŠtyrjoch koncertuja
Na adwentničku župy
Hudźba k 1. adwentej
Budyšin. Hudźbne chłóšćenki zaklinča njedźelu, 3. decembra, we 18 hodź. w Budyskej cyrkwi Našeje lubeje knjenje. Sopranistka Magdalena Kircheis a tenor Christian Lutz zahajitaj hudźbny zazběh do adwentneho časa z twórbami Scheina, Bacha, Distlera a dalšich komponistow. Magdalena Römhild a Friedemann Böhme hrajetaj tři sonaty za husle a pišćele tak mjenowaneho „Drježdźanskeho Mozarta“, Johanna Gottlieba Naumanna (1741–1801). Tele hudźbne chłóšćenki buchu hakle lětsa w Drježdźanskim archiwje wuhrjebane, do notow zestajane a zaklinča tuž nětko prěni raz. Wšitcy su wutrobnje přeprošeni. Zastup je darmotny.
Zaswěća adwentnu pychu
Chrósćicy. Serbske wjesne towarstwo Domizna Chrósćicy přeproša jutře nawječor na Chróšćansku nawjes. Tam zaswěća w 17 hodź. adwentnu pychu. K tomu zanjesu dujerjo adwentnu hudźbu. Wo mały přikusk budźe postarane. Wšitcy su wutrobnje přeprošeni.
Koncertuja w klóštrje
„Hodowna stawizna“ druhdźe
Smječkecy. Dwójce předstaji Němsko-Serbske ludowe dźiwadło přichodny kónc tydźenja swoju inscenaciju „Hodowna stawizna“. Sobotu, 2. decembra, w 19 hodź. dožiwja ju zajimcy w Smječkečanskim wjesnym klubje (nic kaž planowane we Worklecach) a njedźelu, 3. decembra, w 16 hodź. na Chróšćanskej Krawčikec žurli. Wobě předstajeni budźetej ze simultanym přełožkom.
W sprjewinym měsće po puću
Budyšin. Pod hesłom „Po puću w Sakskej“ pokaza telewizijny sćelak MDR sobotu, 2. decembra, we 18.15 hodź. film wo sprjewinym měsće Budyšinje. Moderatorka Beate Werner je sej přitulne městna w starym měsće wobhladała, po srjedźowěkowskich hasach dundała, kulinariske wosebitosće woptała a so wo dwurěčnosći města wobhoniła.
Stare filmy sej wobhladać
Wiki na Mjasowych wikach
Budyšin (SN). Budyskich Wjacławskich wikow dla, kotrež so 1. decembra zahaja, twory Budyskich tydźenskich wikow tuchwilu kóždu wutoru, štwórtk a sobotu na Mjasowych wikach předawaja. Na Žitnych wikach nastajeja nětko hodowne budki. Wot 30. decembra budu tydźenske wiki potom zaso na zwučenym městnje.
Wo wusměrjenju města
Wojerecy (SN). Štóž ma zajim na wusměrjenju města Wojerec hač do lěta 2030, za toho je město darmotnu brošuru wudało. Mały zešiwk dóstanjeće w starej a nowej radnicy a w běrowach wjesnych dźělow města. Tež w interneće je brošura přistupna.
Posledni nazymski koncert
Pančicy-Kukow. Posledni w lětušim rjedźe nazymskich koncertow wotměje so tradicionalnje wječor do pokutneho dnja w Pančicach-Kukowje. W tamnišej Starej hospodźe zaspěwa jutře, wutoru, w 19.30 hodź. delnjoserbski chór Łužyca. Wšitcy lubowarjo serbskeho chóroweho spěwa su na pisany a zabawny program wutrobnje přeprošeni.
Porěči wo dźiwich pčołkach
Rěčicy. We wobłuku swojich zjawnych zarjadowanjow poskići Rěčičanski Erlichtec dwór jutře, wutoru, w 17 hodź. přednošk wo dźiwich pčołkach. Dr. Andreas Scholz poda dohlad do mnohotnosće tychle insektow a da pokiwy, kak móža zahrodkarjo jim přijomne žiwjenske wuměnjenja wutworić. Zastup je darmotny.
Zjawny přednošk
Muzej přeproša dźěći
Budyšin. Na dźěćace popołdnjo pod hesłom „Abrakadabra“ přeproša Budyski Serbski muzej jutře, sobotu. W 16 hodź. dožiwja tam mali wopytowarjo Smjerdźečanskeho kuzłarja Gerata Róbla. Tomu přizamknje so małe wodźenje po wustajeńcy „KRABAT – Muž – Mytos – Marka“. W 17 hodź. pokazaja serbski trikowy film „Sedmy rapak“. Zastup płaći za dorosćenych pjeć eurow, potuńšene 2,50, swójbny lisćik dźesać eurow.
Na gospelowy oratorij
Budyšin. „Our father in heaven“ rěka gospelowy oratorij, kotryž předstajitej ewangelske kantorstwo swj. Pětra a orchester Serbskeho ludoweho ansambla srjedu, 22. nowembra, a sobotu, 25. nowembra, stajnje w 17 hodź. w Budyskej Marje-Marćinej cyrkwi. Pod nawodom cyrkwinskeho hudźbneho direktora Michaela Vettera zaklinči sinfoniska twórba, wopřijaca elementy bluesa, swinga a gospela. Wobjednawa so samotnosć čłowjeka pod wužiwanjom bibliskich tekstow. Zastup je darmotny, pjenježny dar je witany.
