Runja mnohim druhim wsam dwurěčneje Hornjeje Łužicy steji tež w Sernjanach kóžde lěto pyšna meja. Swjedźeń mejemjetanja pak bě tam lětsa něšto cyle wosebite.
Sernjany. „W Sernjanach je zaso žiwjenje!“ Tajke a podobne sady běchu minjenu sobotu při mejemjetanju na nawsy słyšeć. Wjacore lětdźesatki tam hižo nichtó wokoło meje njerejwaše. Lětsa pak so najmłódši wobydlerjo wsy zhromadnje ze swojimi maćerjemi zmužichu a w narodnej drasće tři pěsnički wokoło meje zarejwachu. „Mějachmy wokoło póstnic ideju, tónle nałožk zaso wožiwić, wšako bydli tu dosć młodych swójbow. Tuž so minjene tři tydźenje wjacekróć z našimi dźěćimi zetkachmy, zo bychmy z nimi ,Stup dale‘, ,Takle wjerćimy‘ a ,Katyržinku‘ nazwučowali“, rjekny Jana Bjeńšowa, jedna ze Sernjanskich młodych maćerjow.
Budyšanam njeje wšojedne, štó po wólbach wyšeho měšćanosty na čole jich města steji. Prjedy hač 7. junija za jednoho ze šěsć kandidatow hłosuja, chcedźa jich pozicije zeznać. Składnosć skićeše wčera wječor forum pod hesłom „Quo vadis Budyšin?“ w Němsko-Serbskim ludowym dźiwadle. Něhdźe 600 měšćanow je to sćěhowało.
Budyšin (SN/at). Hač naležnosć požadarjow azyla, połoženje na spjatym jězoru abo problemowe pasmo nutřkowne město – mnoho, štož Budyšanam pod nochćemi pali, staj intendant NSLDź Lutz Hillmann a nawoda tudyšeje lokalneje redakcije nowiny Sächsische Zeitung Uli Schönbach z kandidatami za zastojnstwo wyšeho měšćanosty sprjewineho města rozjimowałoj. Publikum sćěhowaše w přihladowarskej žurli a na jewišću wuwjedźenjam kandidatow jara wotewrjeny a fairny. Tež z přikleskom njelutowachu. Tak je so dwuhodźinske zhromadne zarjadowanje NSLDź a nowiny SZ we wěcownej atmosferje z mało wosobinskimi konfrontacijemi spěšnje minyło.
Měła so Radworska gmejna na zdźěłanju koncepta za regionalny zakładny centrum z Wulkodubrawskej a Malešanskej gmejnu wobdźělić abo nic? Wo tym wčera wječor na posedźenju tamnišeje gmejnskeje rady tež kontrowersnje debatowachu.
Radwor (SN/MkWj). Hižo wot lěta 2009 dźěłatej Radworska a Wulkodubrawska gmejna na zakładźe zjawnoprawniskeho planowanskeho zrěčenje we wšelakich komunalnych wobłukach hromadźe. Tutón „zakładnocentralny zwjazk“ chcedźa nětko na Malešansku gmejnu rozšěrić. Wo tym wjesnjanosta Wincenc Baberška (CDU) na wčerawšim posedźenju informowaše. Hłowna přičina su aktualne wužadanja kaž demografiska změna, pobrachowace komunalne financy a přiběracy ćišć na gmejny. Tójšto nadawkow a problemow njemóža gmejny hižo sami zmištrować, wčera zdźělichu. Dźeń a bóle stej tuž koordinacija a wothłosowanje ze susodnymi gmejnami trěbnej.
Sylny zajim za managera
Budyšin. Wo městno citymanagera, kotrež staj město Budyšin a towarstwo „Nutřkowne město“ wupisałoj su so 40 zajimcow z Němskeje a jedyn z Awstriskeje požadali. Kaž Hendrik Truhel z towarstwa rjekny su so na třoch kónčnych kandidatow wusměrili. Rozsud padnje w přichodnych dnjach.
W dwórnišću so hiba
Wojerecy. Po tym, zo je skupina Wojerowčanow při přesadźowanju twarjenje dwórnišća kupiła, bě najprjedy zaso měr. Nětko pak so intensiwnje na tym dźěła, twarjenje zaso k nahladnemu dypkej města sčinić. K tomu su wobsedźerjo dali nadawk, zwěsćić tuchwilny staw twarjenja. Přikład noweho twarjenja je koncept podobneho razu z Leutkirch.
Wjace pjenjez trěbnych
Zhorjelc. Ponowjenje Zhorjelskeje katedrale Swjateho Jakuba budźe dlěje trać hač planowane a budźe zdobom tež dróše. Njeplanowane dźěła w nutřkownym rumje a přistup bjez barjerow budu přidatnje 930 000 eurow płaćić. Tute chcedźa z rezerwow biskopstwa a ze zběrkami zwjesć. Tež wěža katedrale dyrbi so ponowić.
Slěbro za Serbski gymnazij
Zběrku pjenjez pokradnyli
Biskopicy. Po wšěm zdaću cyle zaměrnje podachu so njeznaći minjeny kónc tydźenja do bydlenskeho domu w Biskopicach. Po informacijach policije pokradnychu woni zběrku twjerdych pjenjez. Něhdźe 150 jednotliwych pjenjez mějachu po wuprajenju wobsedźerja hódnotu něhdźe 20 000 eurow. Debjenki a domjaca elektronika pak paduchow najskerje njezajimowachu, dokelž je w bydlenju wostajichu.
Na wjacorych městnach su minjeny kónc tydźenja mejemjetanje přewjedli. Štož bě w Němcach premjera, mjenujcy zo so holcy serbsku narodnu drastu woblekaja, je druhdźe móhłrjec z wašnjom.
We Worklecach wotmě so njedźelu mejemjetanje při tamnišej kupnicy, hdźež přichwata něhdźe 120 ludźi, rozprawja Clemens Šmit. Program zahajichu najmjeńši wjesnjenjo z rejkami a pěsnjemi pod nawodom Christiny Hozyneje, Daniele Šołćineje a Terezy Šmitoweje. Na to rejwachu dźěći 1. do 5. lětnika w narodnej drasće wokoło meje. Mejski kral bu Jan Mička, kiž sej Piju Šnajderec za swoju mejsku kralownu wuzwoli. Po programje podachu so wšitcy do wjesneho parka na zhromadny kofej. Organizowali su poradźene popołdnjo młode swójby z mnohimi pomocnikami. Wosebity dźak wuprajichu knjeni Maricy Preußowej za kóždolětnu pisanu zabawu z dźěćimi.
Hórnikečanska energijowa fabrika kóžde lěto wjele ludźi přiwabja, kotřiž so za staru hórnistwowu techniku zajimuja. Přichodnje chcedźa tam tójšto pjenjez inwestować.
Wojerecy (AK/SN). Budyski wokrjes chce jako nošer Hórnikečanskeje energijoweje fabriki hórnistwowy muzej zaměrnje dale wuwiwać. Tole podšmórny přisydnica krajneho rady Birgit Weber na zašłym posedźenju Wojerowskeje měšćanskeje rady. Za to chcedźa dohromady 8,7 milionow eurow wudać. Z toho płaći wokrjes jako nošer milion eurow. Za „zbytk“ nadźijeja so spěchowanja Zwjazka z programa „Narodne projekty městotwara“. Próstwa za to wopřijima 6,9 milionow eurow. Hač srědki dóstanu zhonja po wšěm zdaću kónc junija. Podźěl města Wojerecy wučinja 774 000 eurow. „Napjateho hospodarskeho połoženja komuny dla pak nimaja městu z toho žane wudawki nastać“, rozłoži Birgit Weber. Po jeje słowach chce wokrjes tule sumu njesć, štož tež krajny rada podpěruje.
ZVON podpěruje festiwal
Budyšin. Předsyda Zaměroweho wobchadneho zwjazka Hornja Łužica (ZVON), Budyski krajny rada Michael Harig (CDU) a předsyda Domowiny Dawid Statnik stej dźensa kooperaciske zrěčenje podpisałoj. ZVON chce za folklorny festiwal „Łužica“ transport so wobdźělacych skupin z dźěsać krajow po Łužicy podpěrować.
Ertne pruwowanja zahajene
Budyšin. Za lětušich abiturientow su so dźensa zahajili ertne pruwowanja. Hač do 10. junija budu so šulerjo na gymnazijach, mjez druhim tež na Budyskim Serbskim gymnaziju pruwować. Přidatne ertne pruwowanja wotměja so potom wot 19. do 25. junija. Z nimi maja šulerjo móžnosć, spytać znamku we wuzwolenych předmjetach polěpšić.
Prěni raz w Zhorjelcu
Zhorjelc. Němscy a pólscy biskopja schadźuja so wot dźensnišeho w Zhorjelcu/Zgorzelecu. Je to prěnje zetkanje kontaktoweje skupiny wobeju biskopskeju konferencow w Europa-měsće, praji rěčnik Zhorjelskeho biskopstwa. Čłonojo skupiny chcedźa so wo wuwiću w cyrkwi a towaršnosći a wo móžnych iniciatiwach dorozumić.
FCB testuje w Drježdźanach