Popłatk staršich za jědź zwyšili
Radwor (SN/MkWj). Štóž bě sej myslił, zo čłonojo Radworskeje gmejnskeje rady poslednje posedźenje do komunalnych wólbow prosće wotsedźa, tón je so wčera zaličił. Dosć naročna bě naležnosć, kotruž mějachu woleni čłonojo na dnjowym porjedźe: Zarjad za dohladowanje gmejnow bě wuslědźił, zo nježada sej Radworska gmejna staršiski popłatk za přihotowanje snědanje, wobjeda a swačiny w swojich třoch pěstowarnjach, byrnjež tole w pěstowarskim zakoniku takle zakótwjene było. Gmejna płaći po tutym puću 24 000 eurow wob lěto, byrnjež to scyła njetrjebała. Hladajo tež na druhe komuny Budyskeho wokrjesa wo tym diskutowachu, hač žadaja sej wot staršich 70 centow wob dźeń abo scyła ničo. Na blidźe mějachu tež dosć kritiski posudk dohladowanskeho zarjada, kiž gmejnje wobswědči, zo nima dosć dochodow a zo njemóže wěčnje wot swojich nalutowankow žiwa być. Tuž so skónčnje dojednachu, zo napołoža staršim wot awgusta 50 centow přidatnje na dźeń.
Na kóncu měješe wjesnjanostka Madeleine Rynčowa tola hišće składnosć, so radźićelam za dotalne dźěło dźakować.
Dźeń młynow w Barće a druhdźe
Před kapałku za swjatki rjedźili
Bachowa kantata zaklinči
Chróstawa. W Chróstawskej cyrkwi wotměje so swjatki njedźelu, 19. meje, w 16 hodź. koncert z twórbami Johanna Sebastiana Bacha. Pod nawodom kantora Hansa Christiana Martina hraje Drježdźanski barokowy orchester. Zaspěwatej kurenda a cyrkwinski chór Chróstawa. Zaklinčeć budu tež Silbermannowe pišćele. Wot 15 hodź. je koncertna kofejownja wotewrjena. Zastup je darmotny, wo pjenježny dar so prosy.
Do hwězdarnje
Budyšin. „Wotkryj sej swětnišćo“ – tak rěka dalše wudaće dźěćaceje serije „Što je što junior“ za słuchopisak BOOKii. Ludowe nakładnistwo Domowina a Radworska staršiska iniciatiwa přeprosytej pěstowarske a šulske dźěći kaž tež hobbyjowych hwězdarjow na knižnu premjeru 23. meje w 16.30 hodź. do Budyskeje hwězdarnje. Hwězdar rozkładźe z pomocu teleskopa, kak wosebite hwězdy na njebju nadeńdźeš. Zdobom póńdźe wo styki k astrofyzice.
Policija (17.05.24)
Přez balkon so zadobyli
Njechorń. Njeznaći su so minjene dny do njewobydleneho domskeho w Njechornju zadobyli a ze stwow wšelke wěcy w hódnoće 300 eurow pokradnyli, mjez druhim šmóratka, dalokowid a widejowu kameru. Při tym nasta wěcna škoda we wysokosći něhdźe połsta eurow.
Milina naležnosć wobydlerjow
Energijowe drustwo chce wobnowjomnej energiji puć rubać
Hamor (AK/SN). W Hamorskej gmejnje załožene energijowe drustwo wobydlerjow ze swojim dźěło pokročuje – tole potwjerdźi Christin Damian z předsydstwa drustwa na zašłym posedźenju Hamorskeje gmejnskeje rady. „Našu załožensku zhromadźiznu mějachmy w decembrje lěta 2022. Tehdy běše so 27 wobydlerjow wobdźěliło. Mjeztym ma drustwo 47 čłonow“, wona wuswětli. Nimo njeje słušataj Helmut Perk a Guido Ludwig do předsydstwa.
Šulu na hinaše wašnje předstajili
Kóžde druhe lěto wotměwa so na zakładnej šuli „Dr. Marja Grólmusec“ w Slepom ,, Swjedźeń serbskeje rěće‘‘. Rjadownje 1. do 4. lětnika so na tutym projektnym dnju ze serbskimi wobsahami wobdźěleja.
Njedaloko Radworja, zapadnje Miłkec, na Wohnjowej horje sedźa tři ...
Krótkopowěsće (17.05.24)
Domowina namołwja wolić hić
Budyšin. Z namołwu, na komunalnych, Europskich a krajnosejmowych wólbach so wobdźělić, je so prezidij Domowiny za serbsku zjawnosć wobroćił. „W demokratiji smě kóždy sobu skutkować. Tohodla je trěbne, zo zasadźamy so ze swojim hłosom za towaršnosć, kotraž so přez tolerancu, mjezsobny respekt a mnohotnosć wuznamjenja“, rěka we wčera wozjewjenej namołwje.
Z Mytom Viadriny počesćeny
Frankfurt nad Wódru. Z 23. mytom Viadridny je Europska uniwersita Frankfurt nad Wódru wčera němskeho politologu a bywšeho direktora Němskeho historiskeho instituta we Waršawje, prof. dr. Klausa Ziemera, počesćiła. Lawreat je hižo lětdźesatki znaty jako wupokazany znajer a wuběrny analyst němsko-pólskich poćahow.
Weber nachwilny intendant
W Pančicach turu koncertow po Łužicy zakónčił
W cistercienskej cyrkwi w delnjołužiskej Nowej Cali je kantor Drježdźanskeje Cyrkwje našeje knjenje Matthias Grünert swoju njedawnu łužisku pišćelowu turu zahajił. Zakónčił pak je wón ju w klóšterskej cyrkwi cistercienskow w Pančicach-Kukowje.
Pančicy-Kukow (CRM/SN). Wot swjedźenja Božeho spěća hač do minjeneje njedźele, piskaše Matthias Grünert na dwaceći koncertach, wopřijacy sto twórbow wšelakich dobow a stilow. Po tym, zo bě wón „serbski dźeń“ w Choćebuzu wuhotował, poda so do Wětošowa, Žylowa a Bórkowow. Tura wjedźeše 50lětneho wuměłca tež do Złeho Komorowa, do Stareje Darbnje a Kóšena hač do Kamjenca a na kóncu do Pančic-Kukowa. W swojim dwurěčnym přinošku w programowym zešiwku bě předsyda spěchowanskeho towarstwa za serbsku rěč w cyrkwi dr. Hartmut S. Leipner mjez druhim na to skedźbnił, zo je interpret we Wětošowje wjacore serbske melodije zaklinčeć dał.
