Gmejna měła stejišćo zabrać
Rozsud wo wonkownych připrawach při pěstowarni přestorčili
Róžant (JK/SN). Wurjadne posedźenje gmejnskeje rady Ralbic-Róžanta wčera wječor w Róžeńće njemóžeše samo na sebi najwažniši dypk dnjoweho porjada wobjednać, dokelž ma so tón hišće raz dokładnje wobdźěłać a přihotować. Předwidźane bě, přepodać nadawk za připrawjenje wonkowneho areala noweje Ralbičanskeje pěstowarnje. Dokelž pak su wotwidźomne wudawki za to daloko nad planowanym budgetom, dyrbi so gmejna z komornicu a projektowym běrowom k tomu jasnišo dorěčeć. Tohodla padnje rozsud za to hakle na posedźenju gmejnskeje rady w meji.
Wuprawa do Berlina so poradźiła
Sobotu podachu so čłonojo Budyskeje župy „Jan Arnošt Smoler“ při krasnym słónčnym wjedrje na wuprawu, tónraz do Berlina.
Wosebita wustajeńca „Wo pčołkach a ludźoch“ w Muzeju Europskich kulturow běše prěni cil. Před muzejom so wšitcy za foto zestupichmy. Wěcywustojne wjedźenje a žiwe komentary k wosebitosćam pčołarjenja w Słowjenskej wšitkich zajimowachu. Škoda, zo nazajtra tutu wustajeńcu hižo wottwarichu, hewak bychu sej dalši pčołarjo z Łužicy eksponaty ze Słowjenskeje runjež wuslědźić móhli. Wobhladujo sej druhe rumnosće tutoho wosebiteho muzeja Europskich kulturow nam napadny, zo Serbja tam nimo jedneje klanki zastupjeni njejsu. To by tola jónu projekt za Serbskej muzejej w Budyšinje a Choćebuzu było, wopytowarjam němskeje stolicy z wysokim niwowom Serbow předstajić!
Krótkopowěsće (17.04.24)
Žadyn dźiw na postawje
Drježdźany/Wotrow. Prašenje za pozdatnym dźiwom na postawje blisko Wotrowa je rozrisane. Po přepytowanju zdźěli biskopstwo Drježdźany-Mišno wčera, zo jedna so při čerwjenej maćiznje wo roztoče. Klaus Reinhardt, profesor za nałožowanu coologiju při Drježdźanskej TU, bě k tutomu rezultatej přišoł. Wulka ličba zwěrjatkow na hłowomaj postawy móhła na ćopłoće zaležeć.
Stawki maturu poćežuja
Budyšin. Po cyłej Sakskej stawkuja wot dźensa, srjedy, hač do njedźele zaso busowi šoferojo. W Budyskim wokrjesu je wospjet předewzaće RegioBus potrjechene. Wosebje mjerzacy je stawk za maturantow, kotřiž tuchwilu swoje pruwowanja złoža. Sakski kultusowy minister Christian Piwarz bě so wčera nad situaciju wulce hóršił.
Poskićuja přezmjezny studij
We woleńcy 100. jubilej swjećili
Dwójny wuspěch za Ralbičanske kubłanišćo
Drježdźany/Ralbicy (JR/SN). Šuler wosmeho lětnika Serbskeje wyšeje šule Ralbicy Jakub Barč je njedawno 14. saksku olympiadu rušćiny w Drježdźanach dobył. Druhe městno mjez šulerjemi wyšich šulow wudoby sej jeho sobušulerka Louisa Domanic. Tohorunja wuspěšnje na wubědźowanju wobdźěliła je so Ralbičanka Sarah Šnablec.
Dohromady bě so w sakskej stolicy 55 wuknjacych wyšich šulow w štyrjoch cuzych rěčach wubědźowało, nimo rušćiny w francošćinje, w jendźelšćinje a lětsa prěni króć w španišćinje. W jendźelšćinje wudoby sej šulerka 9. lětnika Luna Ritze ze Slepjanskeje wyšeje šule prěnje městno. Sakski kultusowy minister Christian Piwarz (CDU) je młodostnym myta přepodał.
Rozmołwa na hrodźe
Wojerecy. Analyza aktualneho połoženja demokratiji napřećiwnych prudow a jich wuskutkow na towaršnosć w Budyskim wokrjesu je wobsah rozmołwy jutře, srjedu, wot 18 do 20.15 hodź. w Krabatowej pincy na Wojerowskim hrodźe. Christian Schäfer ze syće tvBUNT pokaza wideja a rozłoži pokazki na tute zjawy. Akterojo starosća so wo rosćacy wliw prawicarsko-ekstremistiskich myslow a jednanjow w towaršnosći kaž tež wo stupacej ličbje demonstracijow neonacijow a namocy w regionje. Wobmjezowaneje ličby městnow dla měli so zajimcy pola Ludoweje uniwersity Wojerecy, kotraž rozmołwu zarjaduje, pod 03571 20937200 abo e-mejlnje pod přizjewić.
Nazwučuja słowjanske reje
Bukecy. Rejowanska dźěłarnička z choreografom Georgijom Marinovom wotměje so štwórtk, 18. apryla, we 18.30 hodź. na wosadnej žurli ewangelskeje wosady při cyrkwi w Bukecach. Tam nazwučuja a rejuja so słowjanske ludowe reje. Zastup je darmotny. Zajimcy su wutrobnje witani.
Serbšćina lěpje widźomna
Prěnje wuslědki noweho koncepta w Budyšinje mytowane
Budyšin (CS/SN). Corinna Seiler je při swojim ateljeju za šiće na Jerijowej wulkej tafli připrawiła, jednu ryzy serbsce, tamnu ryzy němsce. Krótko do jutrow je so wona na te wašnje wobdźěliła na akciji města Budyšina za wjace widźomnosće serbskeje rěče w zjawnosći, a to hromadźe z dalšimi třomi wobchodami. Wšitke štyri su zastupjerjo města wčera wopytali a mějićelam wosebite taflički přepodali, kotrež móža we wukładnych woknach wo wobdźělenju na akciji swědčić.
Dalša etapa w sportowym domje
Pěskečanske sportowe towarstwo swój sportowy dom na kromje wsy krok po kroku ponowja. Njedźelu je so tam wjele ludźi wo tym přeswědčiło, što su sportowcy w zadnim dźělu twarjenju nowe stworili.
Pěskecy (SN/MWj). Něhdźe 70 ludźi je njedźelu do Pěskečanskeho sportoweho domu přichwatało. Tam přepodachu dospołnje ponowjene sanitarne připrawy, kotrež móža tež zbrašeni wužiwać. K tomu je Njebjelčanski farar Michał Nawka dom, w kotrymž je nětko tež swjaty křiž, požohnował. Předsyda Fabian Korjeńk witaše mjez druhim zapósłanca Sakskeho krajneho sejma Alojsa Mikławška (CDU). Jeho móžna naslědnica Elaine Jenčec wopytowarjow tohorunja serbsce postrowi. Přitomni běchu wjacori aktiwni wjesnjenjo, kotřiž su towarstwo a sportowy dom sobu natwarili.
Bikerojo z něhdźe 170 jězdźidłami su njedźelu do Ralbic k ...
Krótkopowěsće (16.04.24)
Serbske filmy w Drježdźanach
Drježdźany. We wobłuku dźensa zahajeneho 36. filmoweho swjedźenja Drježdźany wuhotuja Sakski filmowy zwjazk, serbsko-němska syć Łužycafilm a Załožba za serbski lud jutře pod hesłom „Wiźeś – Sichtbar – Widźomne“ popołdnjo „serbskich (krótko)filmow“. Mjez druhim předstaja na Hrodźe Lingnera pask „Som doma“ a knihu „Serbske filmowe krajiny“ Grit Lemke a Andyja Rädera.
Druhi raz „Happy monday“
Budyšin. Na druhej „Wjesołej póndźeli“ dožiwi wčera něhdźe 300 zajimcow Młodźinski dujerski orchester Budyšin, skupinu Fortschritt a „Spěwy do směrkow“ z Annu Mariju Bretschneider, Tassom Schille a Timom Heilmannom na Budyskim Hłownym torhošću. Přichodnu póndźelu wuhotuja mjez druhim Serbski institut a band Skaprifischer program na Póstowym naměsće.
Budyšanej myto spožčiła
