Z wudaća: srjeda, 29 julija 2015

Třiceći serbskich seniorow je so wčera w Chróšćanskim hosćencu Marje Krawčikoweje (stejo) na měsačny škot zetkało. „To je dobry­ přerězk, sym spokojom“, rjekny organizator tradicionalneho zarjadowanja Jan Macka. Najwjace dypkow měješe na kóncu Křesćan­ Weclich z Nuknicy před Bjarnatom Čornakom z Lejna a Jurjom Hantom z Budyšina. Foto: Feliks Haza

Koncept za eBayjowu wjes Liboń je skónčnje běrokratiske ćeže přewinył. Hišće tónle tydźeń tam twarić započnu. Wutwarjeć chcedźa ležownosć na energijowy a dožiwjenski statok.

Liboń (UM/SN). Štyri twarjenja, studnja, hat a žołtej wjesnej tafli: To je Liboń – najmjeńša wjes Sakskeje. Jako „eBayjowa wjes“ bu wotležany štyristronski statok daloko znaty. Wšako chcyše jón bywši wobsedźer w lěće 2012 přez internetnu platformu eBay předać. Tole pak so jemu poradźiło njebě. Tróšku pozdźišo zajimowaše so Andreas Reitmann za objekt, dokelž­ je wot znatych pokiw dóstał. Skónčnje z Drježdźan pochadźacy předewzaćel statok kupi. Liboń měł so na modelowu wjes za socialne a skutkowne žiwjenje wuwiwać. To pak bě plan, kotryž njehodźeše so z twar­sko-prawniskich přičin realizować.

Přednoški a ekskursije wo wjelkach žněja dobry wothłós

Rěčicy (SN/mwe). Hižo lěta poskića Rěčičanski wjelči kontaktny běrow přednoški na temu „wjelk“. Wosebje zarjadowanja, na kotrychž wotměwaja so nimo přednoškow abo ekskursijow na slědach wjelkow tež „dny a wječory we wjelčim teritoriju“, žněja mjez ludźimi dobry wohłós. Na nje přichadźa 15 do 25 wobdźělnikow. „Často dyrbimy zajimcam wotprajić, dokelž­ je zarjadowanje hižo wuknihowane. Nimo tudyšich wobydlerjow wabja přednoški­ tež zajimcow ze wšeje Sakskeje a samo turistow z druhich zwjazkowych krajow Němskeje“, zdźěli Serbskim Nowinam Vanessa Ludwig, projektowa nawodnica w kontaktnym běrowje.

Budyšin (SN). Lětnje kino Budyskeho Kamjentneho domu wotměje so w awgusće přeco srjedu wot 21 hodź. w přemysłowym parku Při Sprjewinym wobłuku.

Lěkowanišćo pod lupu stało

Bórkowy (SN). Pruwowanski stres knježeše tele dny w błótowskich Bórkowach, najwjetšej gmejnje Němskeje. „Statnje připóznate městno za lěkowanje ludźi z hojenskimi žórłami“ chce a dyrbi po dźesać lětach swój status zakitować. 23. julija wotmě so k tomu wizitacija krajneho fachoweho wobłuka za lěkowansko-wočerstwjenske městna w Braniborskej. Jědnaće čłonow wopřijaca přirada poda so do Bórkowow, zo by tam wšitko dakładnje pod lupu brała. Kónc oktobra so rozsudźi, hač smě gmejna status­ lěkowanišća wobchować.

Ptači porik ma zaso dorost

Wojerecy (SN). We Wojerowskim zwěrjencu je wčera porik ptačkow z mjenom sunda orienthorn třeći raz dorost dóstał. Hižo w aprylu běštej sej ptačkaj sydansku prózdnjeńcu twariłoj a wot toho časa njebě žónka za wopytowarjow hižo widźeć. Wot lěta 2007 je porik tule žiwy.

Maja wokołopuće na so brać

Budyšin (SN/mwe). Wjace hač 40 dróhow je tuchwilu w Budyskim wokrjesu twarskich dźěłow dla dospołnje abo połojčnje zawrjene. Kaž ze statistiki Budyskeho krajnoradneho zarjada za wobchadne wobmjezowanja wuchadźa, dyrbja šoferojo tež přichodnje dlěše wokołopuće wobjězdkow dla sćerpnje znjesć. Tak je w Blunju nawjes zawrjena, do Krěpjec přijědźeš jeno ze směra přez Halštrow. Dróhi twarja tež w Kumwałdźe, Kinsporskej holi, Kulowje a Smjerdźacej runje­ tak kaž we Łutach a Łazu. Wuskutki ma to wosebje na busowe linije z přechodnymi zastanišćemi.

Brunow. K tragiskemu njezbožu dóšło je wčera popołdnju na statnej dróze S 100 za Brunowom do směra na Kinspork. Z Kamjenca přijěducy Opel zajědźe z nje­znateje přičiny z jězdnje a zrazy do štoma. Awto so při tym dospołnje skóncowa. Wohnjowi wobornicy dyrbjachu šofera z awta wućahnyć. Najebać to, zo bě nuzowy lěkar hnydom na městnje a ćežkozranjeneho zastara, njemóžeše jemu hižo pomhać. Šofer hišće na městnje njezboža wudycha.

Šćeńca. Na Sprjewinej w Šćeńcy je wčera popołdnju traktor do awta zrazył. Wodźer awta so při tym zrani.

Student Yoshihisa Hagiwara z Tokija wopyta minjeny tydźeń Budyšin, zo by so ze Serbami a městom zeznajomił. Witała je jeho mjez druhim Annett Šołćic w Smolerjec kniharni, hdźež je sej hósć někotre knihi, kaž němsko-serbski słownik a rěčespytne wudaća, kupił. Hagiwara studuje tuchwilu germanistiku, sla­wistiku­ a polo­nistiku w Halle. Wón je šuler w Serbach znateho prof. Christopha Gora Kimury a zaběra so předewšěm z přirunanjom słowjanskich rěčow. Tak wobdźěli so w awgusće tež na kursu słowakšćiny w Bratislavje. Foto: Jurij Łušćanski

Dyrdomdej w hrodźe

Ramnow. Pod hesłom „Prózdninske wjesela za kralowske dźěći“ přeprošeja hólcow a holcy jutře wot 14 do 15.30 hodź. na dyrdomdej w Ramnowskim baroknym hrodźe. Wosebje dźěći wot šěsć lět smědźa wšelke potajnstwa na zelowej zahrodźe wuslědźić.

Na slědach njetopyrjow

Kamjenc. Z kapsnej lampu a ultrazwukowym detektorom podadźa so wobdźělnicy swójbneje ekskursije Kamjenskeho Muzeja zapadneje Łužicy na slědy nócnych hońtwjerjow, njetopyrjow. Zarjadowanje je pjatk w 19 hodź.

Dróha zawrjena

Budyšin. Dźensa a jutře je Ericha Weinertowa w Budyšinje na wysokosći kružneho wobchada dospołnje zawrjena. Přičina su krótkodobne twarske naprawy Němskeje telekom.

Kozakojo koncertuja

Wojerecy. We Wojerowskej Janskej cyrkwi koncertuje jutře, štwórtk, w 20 hodź. skupina Wolgaskich kozakow.

Kozel měł mandat přewzać

Budyšin. Krajne dźěłowe zjednoćenstwo Serbska lěwica Hajkej Ko­zelej poruča, móžny mandat Sakskeho krajneho sejma jako naslědnik přiwzać. Na wčerawšim wuradźowanju Serbskeje lěwicy w Budyšinje přesahowachu podpěrace aspekty porno haćacym. Naslědny mandat budźe móžny, wuzwola-li zapósłanču Annekathrin Klepsch za kulturnu měšća­nostku Drježdźan a złoži-li wona na to swój mandat w krajnym sejmje.

Přichod brunicy njewěsty

Praha. Čěski industrijowy minister Jan Mládek je na wopyće sewjeročěskeju městow­ Litvínov a Horní Jiřetín zdźělił, zo rozsud wo dalewjedźenju tamnišeje brunicoweje jamy wo pjeć lět wotstorči. Při tej składnosći wón zdobom dwělo­waše, hač budźe brunica potom hišće w samsnej měrje trěbna kaž dźensa.

Dorost pobrachuje

Ruce połnej dźěła ma w prózdninskej sezonje Ina Schmidt z Kobjelnjanskeho Sprjewineho statoka. Na „pastyrsku hodźinku“ bě wowčerska mišterka přeprosyła, a přišło je wjace hač 40 dźěći z wokoliny, ale tež z Drježdźan a Choćebuza, zo bychu wjace wo wowcach zhonili. Skót picować wone wězo tež smědźachu. Foto: SN/M. Bulank