London/Calais/Skopje (dpa/SN). Britiske knježerstwo je hladajo na přiběracu ličbu ćěkancow w francoskim Calaisu znjeměrnjene. Minjenu nóc je dalši ćěkanc žiwjenje přisadźił, jako spyta přez podmórski kanal do Jendźelskeje přińć. W Calaisu čaka mjeztym něhdźe 5 000 migrantow na składnosć, do Wulkeje Britaniskeje so dóstać. Stajnje zaso spytaja na nakładne awta zalězć, kotrež na ćahach stejo kanal přeprěčeja. Mjeztym stej so Wulka Britaniska a Francoska dojednałoj wěstotne naprawy polěpšić. Tak chcedźa w Calaisu wěstotne pasmo zarjadować, w kotrymž maja nakładne awta čakać.
W zwisku z přiběracej ličbu ćěkancow je tež Makedonska wočiwidnje přežadana. Minjene tři dny je tam nimale 2 000 ludźi ze Syriskeje a Afghanistana wo azyl prosyło, kaž medije rozprawjeja. Ćěkancam wupisuja na někotre dny płaćiwe makedonske dokumenty, zo móhli přez Serbisku a Madźarsku dale jěć. Fachowcy trochuja, zo w septembru wšědnje hač do 10 000 ludźi Makedonsku docpěje. Kraj słuša k najchudšim Europy.
Berlin (dpa/SN). Rada ćěkancow w němskej stolicy je knježaceho měšćanostu Michaela Müllera (SPD) namołwiła, „katastrofalne poměry w politice napřećo ćěkancam w Berlinje ručež móžno skónčić“. W zjawnym lisće předsydstwo rady ćěkancow raznje kritizuje, zo Berlin swoje zakonske nadawki při zaměstnjenju a zastaranju požadarjow azyla njespjelnja. „Ćěkancy wostawaja bjezdomni a njedóstawaja ani eksistencny minimum“, spisarjo lista šwikaja.
Z tuchwilu 1 800 po informacijach krajneho zarjada za strowotnistwo a socialne w hostelach zaměstnjenych za azylom pytacych ma jeničce 600 oficialny dobropis centralneho zarjada za registrowanje ćěkancow za hostel. „Zbywacych bjez hnady do bjezdomnosće sćeleće. To je přećiwo zakonjej.“ W mnohich hostelach mjeztym dobropisy krajneho zarjada za městno hospodowanja hižo njeakceptuja, dokelž je zarjad přepozdźe płaći abo scyła nic. Tuchwilu njeje pječa wjace hač 4 000 hostelowych zličbowankow zapłaćene.
Sobudźěłaćerka běrowa Domowinskeje župy „Jakub Lorenc-Zalěski“ Juliana Kaulfürstowa je w Slepjanskej kónčinje pytała za ludźimi, kotřiž slepjanšćinu hišće w jeje starej formje wobknježa. 2. oktobra maja so wupłody jeje slědźenja na dwěmaj CDjomaj wozjewić. Za to spřistupnja wona zwukonošakaj tež zjawnosći na zarjadowanju na žurli Slepjanskeho kulturneho centruma. K nahrawanju słuša kniha, kotraž předstaja rěčnych swědkow kaž tež wobsahi jich powědančkow a dožiwjenjow; nimo serbskorěčnych přepisanjow wopřijima wona tež němskorěčne přełožki. Wšitko zhromadnje wuńdźe pod titlom „Płachta pełna hulicowańkow“ (Płachta połna powědančkow). Wobrazy fotografa Karstena Nyče z Noweho Města nad Sprjewju wudaće wobohaćeja, portrety ludźi kaž tež čwak płata hraja při tym wosebitu rólu.
Rejowanski ansambl Pśijaśelstwo z Choćebuza je so lětsa posledni raz wobdźělił na folklornym festiwalu w Chrósćicach: Hromadźe z cyłkom Stara lubosć pokaza tam reju „Jutrowna woda“. W njedźelnym programje łužiskich skupin staj Thomas Mietk a jeho partnerka posledni raz rejowałoj. Jan Kral je so Thomasa Mietka prašał za přičinami kónca kaž tež za zaćišćemi wo festiwalu w Chrósćicach.
Posledni zjawny wustup Rejwanskeho ansambla Pśijaśelstwo Choćebuz bě na folklornym festiwalu „Łužica“ w Chrósćicach. Što su přičiny toho?
T. Mietk: Mamy chutne ćeže z dorostom. Nimamy dosć abo žanych zajimcow za naš cyłk. Pobrachuja tež nazwučowarjo a wuměłscy nawodźa, kotřiž bychu dźěło našeho ansambla a tak jeho duch a wobstaće zaručili. Njeje tež nichtó, kiž by za nas programy zestajał a je potom zwoprawdźił. Dotalni zamołwići su přez powołanske winowatosće wjazani a nimaja hižo dosć chwile za woporniwe dźěło našeho cyłka.
W Chrósćicach sće jako jenički por wustupiłoj ze solom. Je to hižo wuraz toho, zo nimaće ludźi?