„Wuhódnoćenski zmylk“ w Zwjazkowym kriminalnym zarjedźe (BKA) je wina na tym, zo dóstachu zapósłancy zwjazkoweho sejma a wša zjawnosć Němskeje skomoleny wobraz wo nadběhach na Serbow. Čitać móžachmy to w prěnjotnej wotmołwje zwjazkoweho ministerstwa nutřkowneho z 9. julija na małe naprašowanje zapósłanče Ulle Jelpke (Lěwica) nastupajo Serbam napřećo njepřećelske podawki. Hdyž je 40 procentow zapodatych městnow njeskutka wopačne, da je prašenje woprawnjene, kak dokładnje so tajke sensibelne daty ze Sakskeje abo Braniborskeje na zwjazkowu runinu dale dawaja a kak tam z nimi wobchadźeja.
Wopak podata městnosć prawicarskoekstremistiskich njeskutkow zda so zastojnikam BKA snano lapsus być. Je pak jim scyła wědome, što to na přikład za Němskopazličanow rěka? Tući scyła njewědźachu, kak je so mjeno jich wsy do tajkeje statistiki dóstało abo zo tam prawicarjo jězdźa, zo bychu Serbow nadpadnyli. Z połnym prawom je Kamjenske měšćanske zarjadnistwo na mjenowanju Němskich Pazlic w tutym zwisku dwělowało.
Budyšin/Berlin (SN/at). Němske Pazlicy njejsu centrum nadpadow na serbskich młodostnych byli, kaž bě to w třoch tabulkach wotmołwy zwjazkoweho knježerstwa z 9. julija na małe naprašowanje zapósłanče Ulle Jelpke (Lěwica) napisane (SN rozprawjachu). Tole wuchadźa z reakcije přisłušneho zwjazkoweho ministerstwa nutřkowneho (BMI) na naprašowanje Serbskich Nowin. W horjeka mjenowanej wotmołwje „njejsu nastupajo ,wobraz połoženja wuhódnoćenja politisce motiwowanych chłostanskich skutkow‘ (LAPOS) wuhódnoćenskeho zmylka w Zwjazkowym kriminalnym zarjedźe dla njeskutki zdźěla tym gmejnam přirjadowane, hdźež běchu so wone woprawdźe stali“, piše rěčnica ministerstwa.
Karlovy Vary/Žitawa (SN). Składnostnje požadanja Karlovych Varow za swětowe herbstwo UNESCO wotewrěchu tam minjenu wutoru wustajeńcu „Bjezmjezna kultura kupjelow“. Jeje zakład twori 2013 wot Žitawskich měšćanskich muzejow, Regionalneje galerije Liberec a Narodneho pomnikoweho instituta Liberec zdźěłana přehladka „Kupać bjez mjezow“, kotraž bě hižo w Žitawje, Liberecu, Hrádeku nad Nisou a Jablonecu nad Nisou widźeć.
Žitawske měšćanske muzeje su hłowny wupožčowar za wustajeńcu w kejžorskej kupjeli Karlovy Vary. Mjez druhim pokazuja tam 60 fotow wo najwažnišich a najrjeńšich kupjelach w třikrajowym róžku, zapopadnjenych wot Michaela Čtveráčeka a Jürgena Maćija. Tež mnohe historiske eksponaty Žitawskich zběrkow su pódla, mjez nimi 130 lět stary kupanski płašć z Großschönauskeho froteja, kupanska drasta a trjenja z minjenych lětdźesatkow kaž tež přisłušk za myće a kupanje a tohorunja jednotliwe wuměłske twórby.
Hamor (SN/CoR). Po zwrěšćenju jězorinoweho festiwala při Parcowskim jězorje lěta 2013 je tónle kónc tydźenja dalši pospyt, festiwal popoweje hudźby pod hołym njebjom w lětnjej sezonje – takrjec wulku party za młodych ludźi – w regionje etablěrować. Tak wotměwa so wot dźensnišeho hač do njedźele prěni raz Cherrybeach-festiwal na Hamorskim přibrjohu Bjerwałdskeho jězora.
Porno festiwalej jězoriny tehdy, kotryž měješe wočakowanych 40 000 wopytowarjow a realnych 20 000 hosći dla wulki deficit 2,5 milionow eurow, je dimensija nastupajo Cherrybeach-festiwal hinaša. Tak njewočakuja jenož něhdźe 5 000 ludźi, tež 90 procentow zastupnych lisćikow je hižo předate. Na stanowanišću žanoho městna wjace njeje. Wobydlerjo Hamora scyła njetrjebaja zastup zapłaćić. Hinak hač při Parcowskim jězorje móža so tam wopytowarjo tež kupać.
Něhdźe sto ludźi je so wčera na demonstraciji Budyskeje wobydlerskeje iniciatiwy „Dom azylowych požadarjow Greenpark“ před Budyskim krajnoradnym zarjadom wobdźěliło. Narěče noweho Budyskeho wyšeho měšćanosty Alexandera Ahrensa (njestronjan) a Budyskeju radźićelow Matthiasa Knaaka (CDU) a Mika Hauschilda (FDP) pohnuchu přitomnych tež k protestam.