Dar Maćicy Serbskeje za kapałku
Praha. Lěta 2004 běchu rotundu swjateho Wjacława w twarjenju Karloweje uniwersity na Małostronskim naměsće našli. Maćica Serbska dari 250 eurow za zachowanje tysac lět stareho twarskeho pomnika. Prěni raz je kapałka naspomnjena w swjatowjacławskej legendźe z 13. lětstotka. Wjace wo namakance na internetnej stronje nase-rotunda.cz
Łužiske myto kiwa
Choćebuz. Hospodarska iniciatiwa Łužicy WIL wupisa pjaty raz Łužiske myto za wědomostny transfer. Myto 10 000 eurow hódnoći kooperaciske projekty mjez předewzaćemi a wědomostnymi institucijemi Łužicy. Informaciske zarjadowanje k wubědźowanju přewjedźechu dźensa pola lońšeho dobyćerja, firmy BOSIG w Elsterwerda.
Pišćele změja dlěšu přestawku
Podstupim (SN/at). Posedźenje Rady za naležnosće Serbow w Krajnym sejmje Braniborskeje wčera w Podstupimje bě w tymle nastupanju njewšědne. Prěni raz po schwalenju nowelěrowaneho Serbskeho zakonja w lěće 2014 je braniborska gmejna z Delnjeje Łužicy próstwu zapodała, zo bychu ju do připóznateho serbskeho sydlenskeho ruma přiwzali. Z tym zda so bytostna naležnosć tohole zakonja zwoprawdźić. Tale prěnja gmejna su Łukojce (Wiesengrund) we wokrjesu Sprjewja-Nysa, ležace mjez Choćebuzom a Baršćom. Gmejna je próstwu hromadźe ze serbskej radu přihotowała. Na posedźenju serbskeje rady staj předsyda Torsten Mak a wjesnjanosta Łukojc Egbert S. Piosik (SWZ) dokument podpisałoj, na to přepoda jón wjesnjanosta statnemu sekretarej Martinej Gorholtej (SPD), społnomócnjenemu braniborskeho knježerstwa za serbske naležnosće.
Wojerecy (SN/JaW). Župa „Handrij Zejler“ je Serbske rěčne koło we Wojerecach wožiwiła. Na wčerawšim prěnim zarjadowanju w Domowinskim domje zaběrachu so Serbja z Wojerec a wokoliny ze zelemi, zeleninu jich serbskim pomjenowanjom a wužiwanjom. Mjez wobdźělnikami běchu zamołwita za serbske naležnosće města Wojerec Gabriela Linakowa a fachowča za strowe zežiwjenje Rafaela Wićazowa kaž tež na serbšćinje zajimowani Němcy. Wojerowčan Werner Bejma bě korb połny zelow ze swójskeje zahrody sobu přinjesł, zo by je nimale 30 přitomnym předstajił a jim rozłožił, za čo hodźa so w kuchni abo strowotnistwje zasadźeć. „Sym koło po swojej zahrodźe šoł, kwěćel zelow zestajał, někotre zdźěla wurył a te abo tamne zelko kaž koza powoptał“, Bejma swoju prezentaciju šibale zahaji. Mjez druhim předstaji rólnu křipicu/přasku (Ackerschachtelhalm), kotraž ma po słowach Bejmy wjele siliciuma w sebi. A tón trjebamy za strowu włokninu (Bindegewebe). Kaž wón dale rozprawješe, hodźi so zahrodna běłonka/babjace zelo (Mutterkraut) přećiwo migrenje zasadźeć.
Hamor (AK/SN). Zaměrowy zwjazk Łužiska jězorina swój regionalny wuwićowy a jednanski koncept „Łužiska jězorina“ (REK) dale wjedźe. To wobzamknychu wčera radźićeljo zwjazka. „Z konceptom wuprajamy so jako region jasnje za změnu brunicoweho regiona na turistisku kónčinu. Tak swoje zaměry do přichoda kruće zapisamy“, wuzběhny předsyda zaměroweho zwjazka, Budyski krajny rada Michael Harig (CDU).
Jednanski koncept je wusměrjeny na wobłuki hospodarstwo, turizm, zawěsćenje byća, sydlenje a infrastruktura, ratarstwo a přirodoškit. Zwjazk je nastajił 16 jězorowych profilow a 13 profilow zwiskow a kanalow mjez jězorami. Cyłkownje je w koncepće 134 naprawow zakótwjene. „K tomu słuša, při Bjerwałdskim jězoru wuwić gastronomiju, wutwarić přistaw a infrastrukturu. Přeće do přichoda je přistawnišćo“, rjekny Andreas Worbs, nawoda wobłuka wuwiwanje projektow a planowanje města Drježdźan. W nadawku zaměroweho zwjazka je wón regionalny koncept wuwića a jednanja nastajił. Sakske nutřkowne ministerstwo podpěruje jón z 55 000 eurami. Zbytk přida zaměrowy zwjazk jako swójski podźěl.
Budyšin (SN/bl). Na 27. Wendish Fesće minjenu njedźelu w Texasu poby lětsa delegacija jědnaće ludźi Budyskeho Němsko-Serbskeho ludoweho dźiwadła. Tójšto wustupow tam mějachu a zahorichu přihladowarjow z njewšědnym serbsko-němsko-jendźelskim programom. Něhdźe 2 500 ludźi bě na swjedźensku łuku w Serbinje přišło, zo bychu Łužičanow dožiwili. Hosćićeljo měnjachu, zo bě hudźbna skupina najlěpša, kotruž hdy na tamnišim swjedźenju mějachu.
Hudźbna skupina Floppy dolls zawjeseli publikum ze serbskimi šlagrami 70- a 80tych lět kaž tež z delnjoserbskej narodnej drastu. Tón jedyn abo tamny jendźelski spěw tohorunja zaklinča. Intendant NSLDź Lutz Hillmann překwapi Texasčanow na basowej gitarje. „Jimacy běše wokomik, jako na wjeršku našeje jězby, Wendish Fesće, starc spontanje na jewišću serbsku pěseń zaspěwa“, powěda Madleńka Šołćic, zastupjerka intendanta a dramaturgowka NSLDź.
Ze swojim turbanom staj přisłušnikaj nabožneje zhromadnosće sikh wjacorych młodostnych w Indiskej před zatepjenjom wuchowałoj. Poprawom nabožne předpisy mužam njedowoleja, turban w zjawnosći z hłowy wzać, medije rozprawjeja. Młodostni běchu we wobłuku nabožneho nałožka do kanala padnyli a hrožachu so zatepić. Mužej tuž swój dźewjeć metrow dołhi turban rozwalištaj a staj z nim młodostnych wućahnyłoj.
Pola šewca po črije byli su třo najwjetši mužojo swěta w münsterlandskim Vredenje. Běchu to z 2,51 metrami najwjetši muž, 33lětny Sultan Kösel z Turkowskeje, w Parisu bydlacy Marokkočan Brahim Takioullah z 2,46 metrami a 2,32 metrow wulki Abdramane Dembele, tohorunja w Parisu bydlacy ze Słonowinoweho pobrjoha. Dźěłarnja Georga Wesselsa hižo wjele lět črije za nich zhotowja.