Z wudaća: štwórtk, 01 oktobera 2015

Kirbsy su mnohim rjana nazymska dekoracija. Přiběrajcy pak z nich najwšelakoriše strowe wudźěłki zhotowjeja, kaž kompot abo marmeladu. Tež kirbsowa poliwka móže słódna być. Přičiny dosć potajkim, sej rjany eksemplar kupić. Mjez druhim činić móžeš to w Hózku, hdźež su w tamnišim ratarskim zawodźe tele dny kirbsy žnjeli. Foto: Michał Domanja

Prjedy hač móža so šulerjo do nazymskich prózdnin podać, drje je hišće dobry tydźeń chwile. Zo pak móhli so za tón­ abo tamny poskitk přizjewić, po­damy tu mały přehlad zarjadowanjow, kotryž nima narok dospołnosće.

Smochćicy (SN/MWj). Wjele časa zhromadnje přežiwić móhli dźědojo a wowki ze swojimi wnučkami we wobłuku wosebiteho tydźenja, kotryž planuje Smochčanski Dom biskopa Bena w druhim tydźenju prózdnin wot 19. do 23. oktobra. Na programje steja tematiske koła runje tak kaž wulěty a překwapjenki. Wobsahowje steja při tym tři nabožiny židowstwo, křesćanstwo a islam w srjedźišću. Někotre městna su hišće swobodne. Zajimcy njech přizjewja so pod telefonowym čisłom 035935/ 22 316. Dalši tajki tydźeń za dźědow, wowki a wnučkow wotměje so w zymskich prózdninach wot 15. do 19. februara 2016.

Wyši měšćanosta wobara so přećiwo tukanjam w interneće

Běła Woda (AK/SN). Swój koncept decentralneho zaměstnjenja ćěkancow, předewšěm swójbow, chce město Běła Woda tež přichodnje zwoprawdźić. Tole podšmórny wyši měšćanosta Torsten Pötzsch (Klartext) wčera na posedźenju měšćanskeje rady. Tuchwilu bydli 86 požadarjow­ azyla, mjez nimi połsta dźěći, w dohromady 18 bydlenjach. „Hač do kónca­ lěta přewostaji bydlenjotwarska towaršnosć dalše 15 bydlenjow. Prjedy­ hač ćěkancy do nich zaćahnu, chcemy z wobydlerjemi zhromadźizny přewjesć“, připowědźi Torsten Pötzsch. Po jeho słowach maja w měsće derje wothłosowanu pomocnu syć, w kotrejž wosady, towarstwa, město a policija hromadźe­ dźěłaja. Njedawno su někotři ćěkancy za zajimcow warili. Młody požadar azyla je tele dny samo abituru złožił a chce rady w měsće wostać, rysowaše Pötzsch přikładaj integracije. Na tamnym boku so wón starosći, zo za wosom dźěći ćěkancow městna w šulach pobrachuja. Město tuž doraznje na zamołwite instancy apeluje, zo by so winowatosć do-šule-chodźenja w Běłej Wodźe dodźeržała.

Zo njemóhli nazymske wichory žanu škodu načinić, w Budyskim wokrjesu nětko při hłownych dróhach kontroluja, hač su štomy krute dosć abo hač su snano chore, zo móhli je wichory powalić. Wokoło Wojerec wobstaruje tele dźěło tamniša na­dróžna mištrownja. Jeje sobudźěłaćerjo dyrbjachu tele dny při dróze z Wojerec do Narća­ wulki dub podrězać a wottransportować. Foto: Ulrige Herzger

Hłowna a zdobom wólbna zhromadźi­zna Katolskeho zjednoćenstwa kubłarjow Sakskeje (KEG), w kotrymž je dobra połojca nětčišich a něhdyšich serbskich wučerjow, wučerkow a kubłarkow z čłonom, wotmě so njedawno w Drježdźanskim gymnaziju swjateho Bena.

Na spočatku swjećeše z přichwatanymi čłonami w kapałce Benoweho gymnazija dušepastyr tohole kubłanišća a kapłan Mariusz Noparlik, rodźeny Polak z Hornjeje Šleskeje, Božu mšu, na kotrejž tež serbski kěrluš zanjesechu. Na hłownej zhromadźiznje rozprawješe předsydka zjednoćenstwa Monika Jurkowa, kubłarka w Radworskim katolskim serbskim dźěćacym domje „Alojs Andricki“, wo dźěle minjeneje legislaturneje doby třoch lět. Tohorunja w předsydstwje skutkowaca Jěwa-Marja Elic z Hórkow, wučerka na Budyskim Serbskim gymnaziju, poda přehlad wo financach zjednoćenstwa. Wobě Serbowce dźěłatej hižo dźewjeć lět w předsydstwje KEG.

Kontroli policije wuwinyć chcyše so wčera popołdnju 27lětny muž w Zemicach-Tumicach. Stupiwši na płun pak zrazy wón frontalnje do napřećo přijěduceho Suzukija. Na to chcyše pěši dale ćěkać, zastojnicy pak jeho spěšnje dosahnychu a wobhrodźenju mosta připutachu. Młody muž měješe hnydom wjacore přičiny za swoje zadźerženje. Jemu běchu mjenujcy jězbnu dowolnosć sćazali, jeho awto njebě ani přizjewjene ani zawěsćene a nimo toho bě wón drogi brał. 62lětny wodźer Suzukija so při zražce zrani. Foto: Rocci Klein

Pančicy-Kukow. Dokelž njebě w awće připasany, je wutoru muž policiji w Zejicach napadnył. W Pančicach chcychu jeho na to kontrolować, štož wón najprjedy ignorowaše, skónčnje pak tola zasta. Pytnywši jeho „chorhojčku“ přewjedźechu alkoholowy test, kotryž wunjese 1,64 promilow, a to hižo we 8.40 hodź.

Pokazaja nowu wustajeńcu

Budyšin. „Žony ze wšeho swěta“ rěka wustajeńca pólskeje wuměłče Marty Słomianowskeje, kotruž wotewru jutře, pjatk, w 15 hodź. w Budyskim žónskim centrumje na Karla Marxowej 7. Přehladku pokazaja we wobłuku Interkultur­neho tydźenja Budyskeho wokrjesa.

Wułója ryby z hata

Radwor. Na rybarski swjedźeń přeprošeja sobotu, 3. oktobra, k Radworskemu kupowemu hatej. Wot 10 hodź. tam ryby łója, zarězaja, filetěruja a suša. Móžeš sej tuž čerstweho karpa kupić abo sušeneho na městnje słodźeć dać. Hosćo z madźarskeje partnerskeje gmejny warja zaso rybjacu poliwku. Dalše informacije wo swjedźenju a wo hosćićelskim towar­stwje kupoweho hata nadeńdu zajimcy pod www.insel-radibor.de.

Přewjedu spěwny wječor

1.10.–7.10.2015: Alles steht Kopf: wšě­dnje 17 a 20 hodź. | pj, so, nj a wu 14:45 hodź. nj 12:30 hodź. | pj a so 22:15 hodź. | w 3 D Everest: wšědnje 20 hodź. | pj a so 22:30 hodź. Man lernt nie aus: štw, pj a wu 17 hodź. | so, nj a srj 19:45 hodź. | pj a so 22:30 hodź. Fack ju Göhte 2: wšědnje 17:15 a 19:45 hodź. | pj, so, nj a wu 14:30 hodź. | nj 12:30 hodź. | pj a so 22:30 hodź. Der kleine Rabe Socke 2: pj 15 hodź. Maze Runner: so, nj a srj 17 hodź. | štw, pj a wu 19:45 hodź. Pixels: so 14:45 hodź. Minions: nj 12:30 hodź. | w 3 D

Kino-ekstra: Slow West: pó 17:15 a 20:15 hodź.

Plakat „Serbske stawizny w 160 wobrazach“ nětko předleži

Hnydom pjeć eksemplarow nablaku je sej přirjadnica Budyskeho krajneho rady Birgit Weber po předstajenju noweho plakata „Serbske stawizny w 160 wobrazach“ minjeny tydźeń w Budyskim Serbskim muzeju kupiła a wot awtorow Ralfa Reimanna a dr. Hansa Mirtschina signować dała. „To je tola wulkotny darik“, wona měni. Tež Budyski nowy wyši měšćanosta Alexander Ahrens (njestronjan) bě na prezentaciji. „1 000 lět Budyšin w 180 wobrazach“ rěkaše 2012 předchadnik serbskeho plakata – a tak knježi nětko, kaž prof. dr. Dietrich Šołta w swojim hódnoćenju zwurazni, tež na plakatowej runinje zaso runostajenje mjez Serbami a Němcami. „By rjenje było, by-li plakat po cyłym měsće­ a kraju wupójsnjeny był“, přeje sej Dietrich Šołta. Šansu za to skići nakład 1 000 němsko- a 500 serbskorěčnych eksemplarow­.