Miłoraz (SN). W lěću 1966 započachu w Miłorazu prěnje swójby přesydlić. Wone dyrbjachu sej Wochožanskeje brunicoweje jamy dla nowe bydlenje pytać. Hač do lěta 1972 měješe něhdźe 216 ludźi swoje domske, swój statok a domiznu wopušćić.
Wosebje přesydlenje kěrchowa je Miłoražanow hłuboko trjechiło, na čož hač do dźensnišeho spominaja. Lětdźesatki ćerpjachu wobydlerjo pod poćežowanjemi brunicoweje industrije, wšako bu we wsy wuhlo nakładowane, štož woznamjenješe wulku haru a tójšto procha.
Wjesna rada Miłoraza a Slepjanska ewangelska wosada přeprošatej njedźelu, 4. septembra, w 14 hodź. na serbsko- němske kemše, na kotrychž wopomnja 50 lět dźělneho přesydlenja Miłoraza. Prěduje propst dr. Christian Stäblein z Berlina. Po kemšach budźe zhromadne kofejpiće na Slepjanskej wjesnej žurli. Štóž znaje něhdyšich wjesnjanow, kotrymž móhli wosobinske přeprošenje připósłać, njech to Miłoražanskej wjesnej radźe abo Slepjanskej wosadźe zdźěli.
Njesćerpnosć změje sćěhi
Słona Boršć. Twarske dźěła na awtodróze A 4 pola Budyšina tuchwilu wuskutkuja, zo so tam nimale wšědnje dołhe rynki čakacych awtow tworja. Zawčerawšim je to 23lětnemu wodźerjej BMWja najskerje předołho trało. Wón zajědźe na nabóčne pasmo a tamne awta přesćahny. Hłupe za njeho jenož bě, zo je jedne z tychle awtow ciwilne jězdźidło awtodróhoweje policije było. Njesćerpnosć 23lětnemu nětko wunjese, zo změje 100 eurow pokuty płaćić a zo nimo toho dypk w Flensburgu dóstanje.
Předewzaćeljo zjednoćeni
Drježdźany. Wuchodna Sakska ma wot najnowšeho dźěłowe zjednoćenstwo SPD za samostatnych předewzaćelow. Zwjazk su srjedu w Drježdźanach załožili, kaž zamołwići zdźěleja. Za předsydu wuzwolichu předewzaćela Rona Eckhardta z Bannewitza pola Drježdźan. Zwjazk ma so za mostytwarca mjez hospodarstwom a towaršnosću.
Za myto namjetowanaj
Budyšin. Mjez wosobami, kotrež su za Němske myto angažementa 2016 nominowane, staj tež Tim Döke z Budyšina a Wolfgang Goldstein ze Slepoho. Tole rozprawja rozhłosowy sćelak MDR. Döku běchu hižo loni za dźěło na dobro ćěkancow počesćili. A Goldstein je lawreat wobydlerskeho myta, dokelž so na šuli za demokratiju a tolerancu zasadźa.
Žadnej znamce do Čěskeje
Praha. Dwójku listowych znamkow „módru a čerwjenu mauritius“, najžadnišej a najdrohotnišej filatelistiskej drohoćince swěta, je anonymny čěski inwestor kupił. Płaćiznu za wobě znamce, wudatej lěta 1847 na kupje Mauritius, trochuja na štyri miliony eurow. Kupc chce je na swětowej filatelistiskej wustajeńcy 2018 w Praze zjawnosći spřistupnić.
Kulow (SN/BŠe). Z temu wukubłanje wučomnikow so Kulowski zawod Maja-meble intensiwnje zaběra, wšako njemysla tam jenož na tuchwilne połoženje jara derje wukubłanych sobudźěłaćerjow, ale tež na jutřišu a zajutřišu situaciju. „Wjele lět smy z potenciala regiona čerpać móhli“, wuswětla jednaćel zawoda Uwe Gottschlich. Mnozy přistajeni su starši hač 50 lět, tohodla dyrbja na přichod myslić. A při tym ma předewzaće wěstu ćežu. Na meblach, kotrež w Kulowje zhotowjeja, njeje dokładnje spóznajomne, zo wottam pochadźeja. Wšako twarja za znate šwedske předewzaće IKEA, kotrež produkt tež pod tymle mjenom předawa. Kulowski zawod je na to pokazany ze swójskim mjenom wabić.
W Janšojcach swjeći Delnja Łužica jutře a njedźelu Festiwal serbskeje kultury. Přičin zhromadneho swjedźenjowanja je dosć. Domowina zhladuje na 70lětne skutkowanje w južnej Braniborskej. 1991, před štwórć lětstotkom běchu župy Choćebuz, Gubin-Baršć, Kalawa-Lubin a Grodk swoje mocy zjednoćili a zhromadnu Domowinsku župu Delnju Łužicu wutworili. Hižo kónc awgusta samsneho lěta móžachu tysacy zahorjenych wopytowarjow w Janšojcach žiwy wuraz bohatosće delnjoserbskeje kultury na tajkim festiwalu dožiwić.
A nětko zaso Janšojce. Domowinjenjo tamnišeje skupiny kaž tež w Rogowje, Mosće, Radowizy, Turjeju a Hochozy su podawk nastorčili. To swědči wo strowym narodnym wědomju. Domowina ma w Delnjej Łužicy mjeno, a cyły rjad pilnych partnerow organizatorow podpěruje. Hosćićeljo sami zwjazuja z festiwalom dalšej róčnicy: Serbsko-Němski domizniski muzej w Janšojcach wobsteji 20 lět a wjes bu před 670 lětami prěni raz pisomnje naspomnjena.
Wjesnjanosta gmejny Ralbicy-Róžant Hubertus Ryćer (CDU) njemóže chorosće dla tuchwilu swoje zastojnstwo wukonjeć. Wčerawše posedźenje gmejnskeje rady nawjedowaše tuž zastupowacy wjesnjanosta Tomaš Bjeńš (Delanske wolerske zjednoćenstwo). Tohodla su tež dnjowy porjad změnić dyrbjeli.
Róžant (JK/SN). Samo na sebi běchu radźićeljo wčera z wulkimi wočakowanjemi na posedźenje w Róžeńće přichwatali. Měješe dźě wo to hić, kak so gmejna dale prócuje twarić nowu pěstowarnju w Ralbicach. Jako zamołwity za twarstwo w zarjadniskim zwjazku Při Klóšterskej wodźe bě so Hubertus Ryćer tež wosebje na to přihotował. Dokelž pak je nahle schorjeł, njemóžachu nětko wo tym rěčeć. Wšako nimaja ani Tomaš Bjeńš ani radźićeljo dokładny přehlad wo naležnosći. Tohodla tónle dypk z dnjoweho porjada šmórnychu, runje tak tež ležownostne naležnosće gmejny.
Drježdźany (SN/CoR). Lětsa přewjedźe sakske knježerstwo kaž hižo w minjenych lětach znowa dźeń wotewrjenych duri pod hesłom Škleńčana knježerstwowa štwórć w Drježdźanskej statnej kencliji. Jutře, 20. awgusta, wot 10 do 17 hodź. změja wopytowarjo składnosć, so wobšěrnje wo dźěławosći krajneho knježerstwa wobhonić. Snědań ze sakskimi statnymi ministrami je runje tak móžna kaž wodźenja po kencliji.
Tež Serbja su jutře zaso pódla. Na prěnim poschodźe statneje kenclije prezentuje so Serbski institut (SI) w separatnej rumnosći. Serbska rěč a kultura dźensa, Serbja jako słowjanska mjeńšina w Němskej abo kak móžeš serbšćinu wuknyć – to su někotre temy, na kotrež dóstanu zajimcy wotmołwu. Nimo toho poskića tam wobdźělenje na kwisu, wobhladanje krótkich filmow, prezentaciju dźěławosće jeničkeho zwonkauniwersitneho serbskeho slědźerskeho zarjadnišća w dobje přiběraceje digitalizacije kaž tež rozmołwy ze sobudźěłaćerkami SI. Za dźěći budźe paslenski kućik přihotowany.
Wolfsburg (dpa/K/SN). We Wolfsburgskich zawodach VW dyrbja wot jutřišeho hač do 29. awgusta awta „Golf“ twarić přestać. Kaž w internej zdźělence koncerna rěka, su partnerojo-dodawarjo wo tym informowani. Přičina naprawy je, zo tči jedyn z partnerow z předewzaćom w prawniskej zwadźe. Tuchwilu pruwuja, hač njeměli tež za zawody VW w Braunschweigu, Zwickauwje a Kasselu krótkodźěło postajić. W Emdenje 7 500 ludźi hižo krótšo dźěła. Tam twarja Passat.
Ratarjo nadźijeja so pomocy
Berlin (dpa/SN). Ratarjo Němskeje nadźijeja so niskeje płaćizny mloka a druhich wudźěłkow dla dalšeje pomocy Zwjazka. Ratarski minister Christian Schmidt (CSU) je přidatne 60 milionow eurow přilubił, jeli zwjazkowe kraje 40 milionow přinošuja. Tole je prezident Zwjazka ratarjow Joachim Rukwied dźensa w Berlinje připowědźił. Zdobom wón kraje namołwi, swój podźěl přewostajić.
Juncker: Jednanja hišće traja