Z wudaća: srjeda, 28 septembera 2016

Sokoł Ralbicy/Hórki II

– Rakečanske ST II 1:3 (1:1)

Zestawa domjacych: Hrjehor – Šnajder, T. Matka, Bogusz, Materna, M. Matka, Šołta, Čórlich, Kurjat, Šmit (67. Šwejda), Jakubaš

Po wysokej poražce w Radworju steješe dalši koparski derby na hrajnym planje. Sokoł Ralbicy/Hórki II wočakowaše Rakečansku rezerwu. Přećiwnik bě nimo Konječana Šołty tež hišće z Korchom a Čornakom z prěnjeho mustwa zesylnjeny. Domjacy hrajachu najprjedy z wěsteho škita a łakachu na zmylki přećiwnika. W 2. min. bu Jakubaš rjenje swobodnje hraty a měrješe so sam na wrota, ale zwrěšći. Na tamnej stronje docpě dołha třělwa nadběhowarja a wrotar Hrjehor zakroči ze sylnej paradu. Po poł hodźinje Sokoljo nawjedowachu. Rakečanski kopar bě swojeho wrotarja nahrał. Jakubaš to spózna, wulišći sej bul a wrotarja přewiny. W 40. min. pruwowaše Korch Hrjehorja, kiž zamó k róžkej wotwobarać. Do połčasa pak dyrbješe tola hišće zady so přimnyć.

Hotowy wobchadny chaos zawiniło je wčera popołdnju njezbožo na awtodróze A 4 mjez Słonej Boršću a Hornim Wujězdom. Tam su tři nakładne awta do so zrazyli, při čimž so dwaj šoferaj ćežko zraništaj. Dokelž njeličomne jězdźidła na to awtodróhu hižo­ w Budyšinje wopušćichu, njebě jenož město dospołnje zatykane, ale tež mjeńše dróhi do směra na zapad. Foto: Rocci Klein

Z předpisami za wobtwarjenje w Budyšinje-Lětonju je Kubšiska gmejna twarske prawo za zasydlenje přemysłowych předewzaćow wutworiła. Potencielneho inwestora tež hižo maja.

Kubšicy (CK/SN). Za lětanišćo Budyšin-Lětoń su Kubšiscy gmejnscy radźićeljo na swojim zašłym posedźenju twarski plan schwalili. Zaměr je, zo móža njewužiwane płoniny při starym tankowym składźe, za kotrež zwjazkowy lětarski zarjad přisłušny njeje, za přemysło wužiwać. Lisćina ze 24 kriterijemi naliča, što wšo dowolene njeje. Mjez druhim su to drobnowikowanje, masowe plahowanje skotu abo spalernja wotpadkow. Industrijne zawody smědźa so jenož we wobmjezowanej měrje zasydlić.

Tak kaž běchu njedźelu we wosadach domchowanku swjećili, činjachu to wčera tež na Chróšćanskej zakładnej šuli „Jurij Chěžka“. Holcy a hólcy běchu korbiki z płodami sobu přinjesli, kotrež farar Měrćin Deleńk požohnowa. Z pisanym programom šu­lerjo předstajichu, kak sej małe myški do zymy skład spřihotuja a płody kaž tež myslički­ na ćopłe słónco a na rjane lětnje dny do swojich chowankow noša. K tomu zaklinčachu tež serbske pěsnje. Foto: Měrćin J. Bulank

Kopšin (SN). Ze sceniskim čitanjom předstaja zajutřišim, pjatk, na Kopšinjanskim hrodźišću Jurja Wjelowu „Paliwaku“, kotruž běchu tam před 80 lětami na poslednjej­ wulkej schadźowance serbskeho studentstwa 16. awgusta 1936 pokazali. Hra bě „manifestacija žiwjenskeje wole serbskeho ludu a aligorisce zdrasćeny protest přećiwo fašistiskemu postupowanju“, pisa Jurij Młynk w Stawiznach serbskeho dźiwadła. Nětko je so horstka angažowanych zmužiła „Paliwa­ku“ wozrodźić. W sceniskim čitanju powjedu lajscy hrajerjo dźiwadłoweju skupin Chrósćicy a Šunow-Konjecy pjatk wot 20 hodź. po hrodźišću. Wječor za­rjaduja zhromadnje župa „Michał Hórnik“ a gmejna Chrósćicy z pomocu Nukničanskeho­ wjesneho kluba, literarneho konopeja, NSLDź a SAEK Budyšin. Wopytowarjo njech sej kapsnu lampu a dobru naladu sobu přinjesu.

Komunikaciski problem měłoj

Kamjenc. Wšón rozhorjeny přizjewi so wčera rano rentnar na Kamjenskim policajskim rewěrje, dokelž jeho Mercedes hižo tam njesteješe, hdźež bě wón jón póndźelu wječor parkował. Wobsadka policajskeho awta nastaji so tuž na puć k móžnemu městnu njeskutka. Tola krótko po tym so rentnar znowa přizjewi a alarm cofny. Mandźelska bě awto dru­hdźe parkowała a njeje ničo prajiła.

Koncept wotpočowaceho wobchada we Wojerecach diskusiju zbudźił

Wojerecy (AK/SN). Ze zaměrnymi naprawami ma so Wojerowske stare město atraktiwniše stać. „Hłowny zaměr je wu­tworić měšćansku milu z wosebitej identitu, kotraž k flaněrowanju, wuchodźowanju a posydnjenju přeproša“, rozłoži architekt a měšćanski planowar Michael Kroll na wčerawšim posedźenju měšćanskich radźićelow. Woni wobzamknychu, koncept wotpočowaceho wobchada za stare město dale wjesć. W nim je mjez druhim zapisane rozšěrić parkowanišćo na Bělidłowej hasce (Bleichgässchen), natwarić dalše parkowanišća na Nowym torhošću, powjetšić ličbu městnow při nowej radnicy a porjeńšić parkowanišćo na Pforzheimskim naměsće.

Za zbrašenych wobydlerjow klóštra Marijineje hwězdy w Pančicach-Kukowje bě minjenu sobotu zaso raz wosebite dožiwjenje, podać so jako sobujěducy na motorskim na jězbu po dwurěčnej Łužicy. Na priwatnje organizowanej akciji je so něhdźe 50 jězdźerjow wobdźěliło. Mjez nimi bě Stanij Suchi z Róžanta (na wobrazu) ze swojej ­MZ-ETZ 250. Wšitcy zhromadnje dojědźechu sej po serbskich wsach hač do Mina­kała a wróćichu so po přestawce do klóštra na kofej. Foto: Feliks Haza

Budyšin (CRM/SN). W Budyskej cyrkwi swj. Pětra słuša kóždolětnje nazymu koncert katolskeho chóra pod nawodom cyrkwinskeho hudźbneho direktora Friedemanna Böhmy do wjerškow duchownohudźbnych poskitkow. Minjenu njedźelu móžeše jara wjele zajimcow tajki poskitk 20. raz dožiwić. Z dołho trajacym přikleskom, ale tež z nohomaj teptajo – to je w cyrkwi tola hišće chětro njezwučene – wopytowarjo zwuraznichu, zo běchu so zaso jónu wulke wočakowanja spjelnili. Tachantski farar Wito Sćapan citowaše­ k tomu wuprajenje, złožowace so na cyrkwinskeho wučerja Augustinusa: „Štóž spěwa, so dwójnje modli. Na intensiwne wašnje zapřimnje so tak čłowječi duch a zbudźa so emocije, tak zo so čłowjek w swojim cyłku docpěje.“