Zmylk přiznał
Čěska warnuje
Běłoruska wodychnje
Wuměłska wuměna
Wrócław (SN). Wuměłcy z europskeje kulturneje stolicy Wrócławja móža w słowakskich Košicach tworić, mjeztym zo změja jich kolegojo z wuzwolenych europskich městow přiležnosć za to w delnjošleskej stolicy. To předwidźi program agentury Wuměłske rezidency A-i-R Wro, kaž je na stronje www.wrócław.pl zhonić.
Za Košice su so organizatorojo rozsudźili, dokelž bě město lěta 2013 europska kulturna stolica. Tam mnohe tehdy zahajene ideje dale pěstuja. Jedna tajka je program „Košice Artist in Residence“ za wuměłcow ze wšelakich wobłukow a wjacorych, nic na kóždy pad europskich krajow. Wuměłcy, kotřiž dóstanu stipendij 1 400 eurow, móža w měrcu a aprylu w Košicach dźěłać. Jich twórby wustaja potom w jednej galeriji města.
Tilich do Waršawy
Drježdźany (dpa/SN). Šef sakskeho knježerstwa a tuchwilny prezident Zwjazkoweje rady Stanisław Tilich (CDU) wopyta srjedu Pólsku. We Waršawje chce so wón ze statnym prezidentom Andrzejom Dudu kaž tež z ministerskej prezidentku Beatu Szydło rozmołwjeć, zdźěli dźensa statna kenclija.
Přičina Tilichoweje jězby do susodneho kraja je nastupna wizita jako prezident Zwjazkoweje rady pola maršala pólskeho senata Stanisława Karczewskeho. Dale chce so politikar ze sejmowym maršalom Marekom Kuchcińskim zetkać.
We wačoku Tilicha stej hódnej meblej, kotrejž matej so Muzejej palasta Wilanów wróćić. Wonej běštej naposledk w zestawje Drježdźanskich Statnych wuměłskich zběrkow. Rešerše su wujewili, zo pochadźatej z Waršawy.
Na „zhubjenej straži“?
Do štwórtkowneho wjerška EU wo migraciskej krizy spjećuja so někotre srjedźoeuropske staty kursej němskeje kanclerki Angele Merkel (CDU).
Bratislava/Brüssel/Berlin (dpa/K/SN). Słowakski ministerski prezident Robert Fico rjekny, Němska je ze swojej politiku witanja ćěkancow zmylk zworała a chce nětko druhich k tomu nuzować, zo jón zaso naprawja. Kraje Visegrádskeje štyrki Čěska, Słowakska, Pólska a Madźarska „nochcedźa być posłušne a so wo ludźi starać, kotrychž je Němska přeprosyła“. Zdobom Fico Němskej a wšelakim dalšim krajam wumjetuje, zo chcyli „diktat“ nałožić napřećo wšěm tym, kotřiž su nastupajo migracisku politiku hinašeho měnjenja. Přećiwo zetkanju Visegrádskskeje skupiny je Němska samo diplomatisce protestowała.
Stawkować bjez wobmjezowanja
Bratislava (dpa/SN). Tři njedźele do wólbow słowakskeho parlamenta su wuwučowarjo na 14 najwažnišich uniwersitach a wysokich šulach kraja dźensa njewobmjezowany stawk zahajili. Kaž stawkowy komitej w interneće připowědźa, chcychu akademikarjo „stafetu wot wučerjow přewzać“, kotřiž žadaja sej mjez druhim wyše mzdy. 25. januara běchu tysacy wučerjow na stach šulow po cyłym kraju do stawka stupili. Woni pak chcyli dźěłowy bój dźensa nachwilnje přetorhnyć, byrnjež knježerstwo jich žadanja dotal njespjelniło.
Zastupjerjo šulskich a wysokošulskich wučerjow tuž rjeknychu, zo matej wobě skupinje samsne žadanja na knježerstwo a so tohodla mjez sobu podpěrujetej.
Woheń wNarodnym muzeju
Historiski ekumeniski wjeršk
12. februar 2016: Datum to za zapis do analow, dokelž dožiwja swět dźensa historiski podawk: Bamž Franciskus a patriarch ruskeje prawosławneje cyrkwje Kyrill so zetkataj. Na Kubje, hdźež stej hłowje wobeju cyrkwjow na wopyće, bamž po puću do Mexika, patriarch ducy do Chile a Brazilskeje.
Eksperća měnja, zo je to zasadna kročel k přewinjenju diferencow, dźělacych wobě wuznamnej swětowej cyrkwi dlěje hač tysac lět. Po ruskich cyrkwinskich žórłach rozprawja čěska telewizija ČT24, zo bu tele historiske zetkanje – wone wotměje so na Havanskim lětanišću – jara dołho přihotowane. Hłowny předmjet ma być přesćěhanje křesćanow na Bliskim wuchodźe, hdźež wobsteja mjez přewažnje islamistiskimi wěriwymi wjetše wosady katolikow a prawosławnych. Wuslědk zetkanja mjez Franciskusom a Kyrillom ma być zhromadna deklaracija.
Ruska kritizuje migracisku politiku
Berlin (dpa/SN). Ruski ministerski prezident Dmitrij Mjedwjedew je politiku Němskeje a Europskeje unije ćěkancam napřećo raznje kritizował. „Europska migraciska politika je dospołnje zwrěšćiła“, rjekny Mjedwjedew nowinje Handelsblatt. Po jeho měnjenju je „hłupe, europske durje šěroko wočinić a wšěch přeprosyć, kotřiž chcedźa přińć“ rjekny wón hladajo na kanclerku Angelu Merkel (CDU). Mjedwjedew ma riziko za njekalkulujomny, hdyž statysacy ćěkancow w dalokej měrje bjez kontrole do EU přichadźeja. Mnozy přińdu do Němskeje, dokelž jim tu pjenježnu podpěru wupłaća, druzy přińdu jako terorisća, je sej wón wěsty. Mjez ćěkancami „je sta njekmanikow, snano samo tysacy“.
Hakle tele dny bě předsyda CSU Horst Seehofer wot kanclerki Merkel w septembru wukazane wotewrjenje mjezow „njeprawdu“ mjenował.
