Praha (ČŽ/K). Wjacławske naměsto bě sobotu znowa „jewišćo“ w naležnosći migraciskeje krizy. Před Narodnym muzejom demonstrowaše něhdźe tysac přećiwnikow ćěkancow za „našu kulturu a wěstotu kraja“. Z policajskim rjećazom dźělenych wustupowaše dobre 400 ludźi za podpěru azyl pytacych. Ke konfliktam njeje žanym dochadźało. Jeničce prowokantnych słowow a nadawanjow bě dosć, kaž rěčnik policije zdźěli. Na stronje přećiwnikow wustupi jako rěčnik mjez druhim zapósłanc-předewzaćel Tomio Okamura, kritizowacy postajenje kwotow ćěkancow a žadacy sej zawrjenje hranicow. Tež spěwar Aleš Bríchta so słowa jimaše. Wobdźělnicy móžachu podpisać peticiju, kotraž žada sej wustup Čěskeje z Europskeje unije. Pod pomnikom swj. Wjacława na konju demonstrowachu přitomni porno tomu za solidarnosć z migrantami. Sociologowka Jiřina Šiklová dopomni na to, zo su w zašłosći tež z Čěskeje ludźo ćěkać dyrbjeli. Dale pokaza wona na wobstejnosć, zo „smy za čas balkanskeje wójny 40 000 ćěkancow přiwzali. Je ně­chtó pytnył, zo smy to přežadani byli?“, wědomostnica zwurazni.

Bratislava (SŽ/K). Po njedawnej rozkorje we Visegrádskej štyrce (V4) rozdźělnych měnjenjow postajeneje kwoty ćěkancow dla su so šefojo jeje čłonskich statow Andrej Kiska (Słowakska), Miloš Zeman (Čěska), Andrzej Duda (Pólska) a János Áder (Madźarska) znowa zešli. Na wuradźowanjach w Balatonfüredźe wobdźěli so tež chorwatska prezidentka Kolinda Grabar-Kitarović. Po informacijach słowakskeho dźenika SME su wobdźělnicy zeńdźenja nastupajo migrantsku krizu přezjedneho nahlada, zo dyrbi so palaca naležnosć humanitarnje, sprawnje a narodno-wěstotnje rozrisać. Za trěbne woni mjez druhim maja, zesylnić škit hranicow Europskeje unije a zawěsćić kontrolowany přichad cuzych do njeje. EU dyrbi financielnje přinošować k wudźeržowanju lěhwow ćěkancow, zo bychu dostojne žiwjenske wuměnjenja za ludźi w nich zawěsćene byli. Hłowy spomnjenych statow maja tež za to, zo dyrbjeli so na rozrisanju wšěch přisłušnych problemow tohorunja mjezynarodne organizacije wobdźělić, na přikład UNO.

Pólski duchowny we Vatikanje swoju homoseksualnosć přiznał

Waršawa. Kaž bomba zadyrił je coming­out pólskeho duchowneho Krzysztofa Charamsy w pólskich medijach, w cyrkwi a po wšej towaršnosći. Charamsa, dotal čłon wažneje kongregacije za wučbu wěry we Vatikanje, něhdy organa inkwizi­cije, bě oficialnje přiznał, zo je homo­seksualny. Runočasnje předstaji wón žur­nalistam we Vatikanje swojeho partnera. W pisomnym stejišću pólski duchowny swoje splažne wusměrjenje zakitowaše, za kotrež „so njezamołwi“. Cyrkej wón namołwi, zo by swój dotal agresiwny a diskriminowacy zwuk napřećo homoseksualnym duchownym změniła. Sam pječa cyły rjad tajkich duchownych znaje, kotrychž ma přiwšěm za „wulkotnych měšnikow“. Po swojim wuznaću čuje so wón nětko „wuswobodźeny a zbožowny“.

Bratislava (SłŽ/K). Srjedu popołdnju je so słowakski prezident Andrej Kiska w sejmje słowa jimał a so k migraciskej krizy w Europje wuprajił. Kritizowaše knježerstwo Roberta Fica za to, kak so wone zadźerži. „Jako Słowakska w juliju zdźěli, njepřiwzać něšto stow ćěkancow­ – tehdy hišće na dobrowólnej bazy – z cyłkownje 40 000, zhubichmy sympatije we wjetšinje Europy“, prezident zjima. „Słowakska je so stała z objektom wutykowanja a wusměšowanja w medijach.“ Kiska pokaza­ na to, zo ma kraj winowatosće spjelnjeć, kiž jemu z čłonstwom w mjezynarodnych organizacijach wurostu. We wjetšinje europskich krajow su wobydlerjo a politikarjo nahlada, zo „dyrbimy ludźom pomhać, ćěkacym před wójnu a namocu. Z našeje pozicije je so čłowjek po zdaću zminył“, tak prezident. „Politika dyrbi měć humanistiski rozměr“, wón napomni a doda: „Dźakować so a připó­znaće wuprajić chcył wšěm, kiž su w minjenych měsacach a dnjach město ,my Słowacy to njemóžemy‘ rjekli ,tež my Słowacy pomhamy‘.“