Krótkopowěsće (15.09.22)
Sotra nětko tež delnjoserbska
Budyšin. Wotnětka hodźi so přełožowanski program sotra tež w delnjoserbskej rěči wužiwać. Wot měrca tutoho lěta sem běše přełožowanje hižo z němčiny do hornjoserbšćiny móžne. Korpus programa sotry wopřija tuchwilu 90 000 delnjoserbsko-němskich sadowych porikow a 70 000 delnjoserbsko-hornjoserbskich sadowych porikow.
Filmowcy prašani
Budyšin. Za Łužisku filmowu přehladku móža so zaso hač do 20 mjeńšin dołhe krótkofilmy zapodać. Prěnjotnje wupisaja přidatne myto za filmowy koncept młodych filmowcow. Přidatne myto we wysokosći wot 3 000 eurow spožčitej Šula za delnjoserbsku rěč a kulturu a Filmowy festiwal Choćebuz. Hač do 1. oktobra móža so filmy pod zapodać.
Pominaja wuhnatu mjeńšinu
Po Sakskej Šwicy pućował
Serbske Pazlicy (SN/MiR). Husto słuži kónc tydźenja za Ambroža Handrika ze Serbskich Pazlic ke krosnowanju w Sakskej Šwicy. Tak běše tomu tež krótko po tym, zo běchu tam njedawno wulke wohenje zachadźeli. Njedawno pak njeběše wjedro tajke, zo móžeše zhromadnje ze Symanom Pöpelom po skaliznach krosnować, skerje bě na pućowanje po lěsu přeprosyło. „Poprawom běch sej sćěhi wohenja hórje předstajił“, Ambrož Handrik powěda, „mějach zaćišć, zo bě so z blakami wjele paliło, na druhich pak nic. Přiwšěm je ćežko, to, štož sym widźał, do słowow zwjazać. Wosebje dopominam so na zdónki, kotrež běchu wotpalene a wupalene, korjenjo dale w zemi.“ Čim dale wonaj na směr čěsku mjezu běžeštaj, ćim hórje běše situacija. „Jako do Čech hladachmoj, widźachmoj wulke płoniny, na kotrychž běchu njeličomne štomy spalene.“ Sej wobhladać, hdźe bě woheń zachadźał, tomu běchu jeju wozjewjenja w medijach pohnuli. Tuž pućowaštaj nimo znateho Skałneho młyna (Felsenmühle) na Mału zymsku horu (Kleiner Winterberg), dale k Ida-prózdnjeńcam (Idagrotten) a wottam na Wulku zymsku horu (Großer Winterberg).
Policija (14.09.22)
Dźěćo zemrěło
Wjazońca. Po ćežkim wobchadnym njezbožu wčera we Wjazońcy je jedne ze zranjeneju dźěsći zemrěło. Slědźenja wo přičinach njezboža traja.
Njeznaći su diesel pokradnyli
Chrósćicy. Na ležownosći jamy při S 98 w Chrósćicach su paduši něhdźe 700 litrow diesela pokradnyli. Njeznaći su minjeny kónc tydźenja z namocu tankaj dweju mašinow wočinili. Škoda wučinja wjace hač 1 400 eurow.
W Delanach babylěćo swjećili
Ralbicy (mbr/SN). Po dwulětnej přestawce, koronapandemije dla, wjeselachu so delanscy wobydlerjo zaso na třidnjowske babylěćo w Ralbicach. Wjesne towarstwo, wjesna rada, wohnjowa wobora a dalši pomocnicy běchu swjedźeń organizowali. Pjatk wotměchu wubědźowanje wohnjowych woborow pod swětłomjetakami. Najspěšniše mustwo mjez dwanaće cyłkami běše Sulšečanske, druhe najlěpše bě Salowske. Třeće městno wobsadźichu wobornicy ze Sernjan/Róžanta. Planowany wohnjostroj njehodźeše so płaćiwych wustawkow w zarjadniskim zwjazku Při Klóšterskej wodźe dla bohužel přewjesć.
We wjac hač wobsadźenym stanje postrowištaj moderatoraj Denny Gloxyn a Maik Brězan sobotu hosći. Wšitke generacije běchu zaso do programa zapřijate. Tak prezentowachu mjez druhim Ralbičanske žony reju, z kotrejž seniorow napodobnjachu. A mužojo zbudźichu posměwk z widejom, zaběracym so z koronu zaběra. Hač do zažneho ranja rejowachu wopytowarjo w stanje po hudźbje DJja Rafaela Krala.
Drastu sej na róli rólować
Njedźelny dźeń wotewrjeneho pomnika syły zajimcow přiwabił
Budyšin (CS/SN). Lětuši dźeń wotewrjeneho pomnika je najebać chłódne a pochmurne wjedro mnohich zajimcow do Budyšina wabił. Zajimcam, kotřiž so mjeztym wospjet na dźeń wotewrjeneho pomnika měrja, je stajnje a bóle wažne, sej wotkryć wosebitosće města. Wichmannowe sydlišćo bě so jako publikumowy magnet wopokazał. Beate Müller drje tam njebydli, tola kładźe wažnosć na to, swoje šaty w róli na Schillowej rólować. Zańdźenu njedźelu je wona zajimcam pokazała, kak so to po starodawnym wašnju čini. Za nju je to tež wěsta sentimentalita. Beate Müller róluje ruby a płachty, kotrež je wot wowki zdźědźiła. Jako dźěćo je z wowku w Rudnych horinach na rólu chodźiła. „Běše to rjany čas, a mějach swoju wowku přewšo rady“, wona praji. Wopytowarjo na dnju pomnika so runja jej dopominaja. Někotryžkuli wě, zo su w Budyšinje wjacore tajke nastroje měli, kaž Při Bělenišćach, Thomasa Mannowej abo Pawoła Njekowej hasy. Zo na Schillowej hišće tajku maja, njebě wjetšinje wopytowarjow znate.
Krótkopowěsće (14.09.22)
Chorownje alarmuja
Drježdźany. Hospodarski ćišć na sakske chorownje njesměrnje stupacych kóštow za energiju a inflacije dla sylnje přiběra. Pod hesłom „alarmowy schodźenk čerwjene“ chcychu towaršnosć chorownjow w Sakskej kaž tež zastupjerjo klinikow dźensa připołdnju wo aktualnym połoženju w tutych medicinskich zarjadnišćach informować. Woni wočakuja za kliniki hnydomne wurunanje inflacije dla.
Lay: Jasne wuznaće trěbne
Wojerecy. „Jasne wuznaće sakskeho statneho knježerstwa k Łužiskej jězorinje“ ma Budyska zapósłanča zwjazkoweho sejma Caren Lay (Lěwica) runja dalšim wobdźělnikam rozmołwneho koła w jězorinje wčera we Wojerecach za trěbne. Lěta dołho maja w regionje začuće, zo jich w Drježdźanach woprawdźe chutnje njebjeru. „Statne knježerstwo z wuwićom jězoriny macošnje wobchadźa“, rjekny Lay po zarjadowanju.
Stephan Meyer spřisahany
Trěbne su mjena za wjesne puće
Nowe Bóšicy (SN/MiR). Bóščanska gmejnska rada prosy wobydlerjow wo podpěru. Němska póšta je zwěsćiła, zo maja sobudźěłaćerjo ćeže při roznošowanju nowinow, časopisow, listow, pakćikow a paketow, dokelž adresatow njenamakaja. Wšako nimaja dróhi a šćežki w Nowych Bóšicach žane mjena. Wjesnjanosta Stanij Ryćer (rjemjesło Bóšicy) zwurazni, zo nima to za problem. „Teoretisce byštej měłoj so dwě dróze pomjenować, kotrejž wjedźetej so we wsy křižujo do štyrjoch směrow“, wón rjekny.
Wo strowej snědani serbowali
Poskitk, nic jenož žonam
Policija (13.09.22)
Dźěsći znjezbožiłoj
Wjazońca. Na Augusta-Bebelowej dróze we Wjazońcy stej wčera dźěsći znjezbožiłoj. Wokoło 19.30 hodź. je šofer wosoboweho awta z mjenowaneje dróhi dolěwa wotbočił, zo by do pódlanskeho puća zawinył. Při tym běše wón dźěsći po wšěm zdaću přewidźał. Pomocnicy su zranjeneju do chorownje dowjezli. Za transport su helikopter zasadźili. Zastojnicy policije staraja so tuchwilu wo zwěsćenje přičiny njezboža. Nimo toho ma posudźowar podawk pohódnoćić. Wěcna škoda dotal znata njeje.
Dobrowólna wohnjowa wobora je pomocnikow při zastaranju małeju pacientow podpěrała a je městnosć njezboža za zastojnikow policije wuswětliła. Augusta-Bebelowa dróha je była hač do połnocy zawrjena.
