Za kurs čěšćiny so přizjewić
Dołhodobne ideje wuwiwać
Slepo (AK/SN). Slepjanska gmejna nastaja so na drastisce stupace płaćizny za płun a milinu wot 2023. Wjetšina gmejnskeje rady je na zašłym posedźenju parlamenta wobzamknyła, wutworić sydom wosobow wopřijacu dźěłowu skupinu, kotruž mjenuja „Energijo-awtarkna gmejna“. Wona ma wo aktualnym połoženju energije w gmejnje wuradźować, doporučenja k polěpšenju energijoweje eficiency zestajeć a konkretne namjety k lěpšemu wućeženju komunalnych připrawow a twarjenjow zdźěłać. Dźěłowa skupina so zjawnje njeschadźuje. Wona ma jenož poradźowacu funkciju.
Njewšědne njezbožo je so předwčerawšim w Chrósćicach stało. ...
Złota nazyma w Rogeńskim parku
Rada swójske stejišćo přihotuje
Wot kabineta njedawno na posedźenju w Budyšinje schwalena šesta rozprawa statneho knježerstwa wo połoženju serbskeho ludu bě wčera předmjet posedźenja Rady za serbske naležnosće Sakskeje.
Drježdźany (SN). Po lětnjej přestawce a wjacorych dźěłowych posedźenjach zetka so Rada za serbske naležnosće Sakskeje na wčerawšej wutorje znowa w rumnosćach Sakskeho krajneho sejma w Drježdźanach. Pod nawodom amtěrowaceho předsydy Marka Klimana zaběrachu so radźićeljo mjez druhim ze šestej rozprawu statneho knježerstwa wo połoženju serbskeho ludu, kotraž bě so na njedawnym posedźenju kabineta w Budyšinje schwaliła a nětko parlamentej předpołožiła, kaž z nowinskeje zdźělenki gremija wuchadźa. Z wida Serbskeje rady so wšelake temowe wobłuki w rozprawje jenož njedospołnje wotbłyšćuja, čehoždla chcedźa radźićeljo swójske stejišćo k rozprawje wudźěłać a je we wobłuku wobjednanja rozprawy w přisłušnym wuběrku krajneho parlamenta zapósłancam a zjawnosći předstajić.
Krótkopowěsće (12.10.22)
Helmut Rychtar njeboh
Budyšin. Serbski rozhłosownik Helmut Rychtar je póndźelu 80lětny w Drježdźanskej chorowni zemrěł, kaž serbska redakcija MDR dźensa informuje. 1977 bě započał jako rozhłosownik dźěłać, wot 1989 nawjedowaše Serbski rozhłós a 1992 sta so z nawodu studija MDR w Budyšinje. Zo mamy serbski rańši rozhłosowy program a Radijo Satkula je sobu jeho zasłužba.
Změny wustawkow přiwzate
Drježdźany/Budyšin. Hamtske sudnistwo Drježdźany je wšitke změny wustawkow Domowiny přiwzało a zapisało, kotrež bě wurjadna hłowna zhromadźizna serbskeho třěšneho zwjazka 3. junija w Choćebuzu wobzamknyła. To je předsyda Dawid Statnik čłonam zwjazkoweho předsydstwa a předsydstwam sobustawskich towarstwow a župow zdźělił.
Hanina medalja Geratej Róblej
Na kermušnych wikach nowe wobliča witali
Slepo (JoS/SN). Kermušu kaž w knize móžachu předwčerawšim při najrjeńšim nazymskim wjedrje z wikami, přehladku jabłukow, poradźowanjom wo hribach a z dujerskej hudźbu Rakečanskich muzikantow w Slepjanskim Serbskim kulturnym centrumje swjećić. 30 wikowarjow tam swoje wudźěłki poskićowaše. Sadowcowy fachowc Klaus Schwartz z Lubija měješe hižo dopołdnja ruce połnej dźěła, zo by wot wopytowarjow sobu přinjesene družiny jabłukow zwěsćił. Nimo toho bě wón přehladku z 240 družinami jabłukow na žurli SKC natwarił. Tež hribowy fachowc Uwe Bartholomäus bě cyły dźeń jara požadany. Wot njeho wopytowarjo mjez druhim zhonichu, zo hač do spočatka septembra suchoty dla scyła žane hriby njerosćechu. Po mócnym dešćowanju pak so połoženje na to změni. 60 družin hribow bě wón sobu do SKC přinjesł a wopytowarjo so cyły čas za nje zajimowachu.
Policija (11.10.22)
Štom pokradnyć spytali
Trjebin. Na njewšědnu rubiznu měrjachu so njeznaći minjeny kónc tydźenja w Trjebinje. Tam podachu so na priwatnu ležownosć a započachu aziski klon wuryć. Dokónčili pak woni swój njeskutk njejsu. Snano je jich něchtó mylił, snano pak bě dźěło přećežke, přetož aziski klon ma chětro sylne korjenje. Přiwšěm je policija na městnje slědy zawěsćiła a nětko za skućićelemi pyta.
Z wobchoda pjenjezy spakosćili
Budyšin. Njeznaći su so w nocy na njedźelu do wobchoda na Budyskej Bohatej hasy zadobyli. Kaž policija rozprawja, woni we wobchodźe njemdrje zachadźachu, mobiliar skóncowachu a pjenjezy pokradnychu. Wo kotru sumu so jedna, bohužel znate njeje.
Přewjedu projekt
Rakecy. „Moja serbska domizna“ je hesło projektoweho tydźenja 5. lětnika Rakečanskeje Pawołskeje šule, z kotrymž so šulerki a šulerjo tutón tydźeń zaběraja. Mjez druhim wopytaja studijo Serbskeho rozhłosa, rejuja ze SLA, wobhladaja sej staru cyrkwinsku biblioteku a nawjerća krótke filmy wo serbskich temach. Sobotu wot 14 do 17 hodź. wuslědki w šuli prezentuja. Předwidźane su dale kwis, hudźba a reje. K tomu su zajimcy witani.
DZA so předstaji
Wojerecy. Z Němskim centrumom za astrofyziku (DZA) ma we Łužicy wulki slědźenski centrum z mjezynarodnym wuprudźenjom nastać, kiž stwori perspektiwy za cyły region. Što pak DZA dokładnje čini a što wón za region wunjese? Na tutej prašeni a dalše wotmołwjeja dr. Christian Stegmann, dr. Maria Krause a Katharina Henjes-Kunst jutře, srjedu, wot 19 hodź. we Wojerowskej kulturnej fabrice na Piwarskej hasce 1. Wšitcy zajimcy su na informaciske zarjadowanje přeprošeni.
W radiju wo Zejlerju
Zo móhli ludźo twarić
Zapadnje sprjewineho města ma nowotwarska štwórć nastać
Budyšin (SN/MWj). Dźeń a wjace ludźi so w Budyšinje naprašuje, hdźe móhli sej ležownosć kupić a na njej jednoswójbny dom twarić. Kaž měšćanski zarjad wčera zdźěli, chce město tuž na swojej zapadnej kromje ležownosće předać a tak nowu bydlensku štwórć wutworić. W Ratarjecach je něhdźe 135 000 kwadratnych metrow wulka płonina w planje wužiwanja ležownosćow hižo za bydlenske zaměry wupisana. Tuž móža tam trěbny twarski plan nastajić.
Po informacijach města móhło něhdźe 150 jednoswójbnych domow z 500 do 800 kwadratnych metrow wulkimi ležownosćemi nastać. Za to pytaja nětko inwestora, kiž bydlensku štwórć jako cyłk wuwije. „Wón ma za płoninu swójski koncept zdźěłać. Inowatiwne měšćanskotwarske ideje pod wobkedźbowanjom aktualnych towaršnostnych a wobswětopolitiskich tendencow su wuraznje witane“, rěka w nowinskej zdźělence města. Bydlensku štwórć planować a ju k trěbnym medijam přizamknyć móže so we wjacorych wotrězkach stać. Při tym pak maja cyłkowne planowanje wulkeje płoniny wobkedźbować.
