Z wudaća: štwórtk, 19 nowembera 2015

Sobotu 21.11.  9:30 Zwjazkowe předsydstwo Domowiny w Budyšinje

  13:00 Hłowna zhromadźizna Spěchowanskeho kruha za serbsku ludowu kulturu w Hórnikecach

  14:30 Bajkowe popołdnjo w Čornochołmčanskim Krabatowym młynje

  18:00 Barokowy koncert w Husce

  19:00 141. schadźowanka w Budyskej „Krónje“

  19:30 Klawěrny wječor Appassionata w Budyskim Serbskim  muzeju

  20:00 Kermušne reje w Konječanskim towarstwowym domje „Delany“

Njedźelu 22.11.  14:00 Drastowa burza w Budyskim Kamjentnym domje

  16:00 Inscenacija NSLDź „Nic so smjeć“ na žurli Haslowskeho Bizoldec hosćenca

Póndźelu 23.11. 9:30  Fachowy dźeń k temje „demokratija trjeba pohib“ w Smochčanskim domje biskopa Bena

Wutoru 24.11. 10:00  Posedźenje załožboweje rady w Drježdźanach

  19:00  Zarjadowanje Budyskeho kluba wuchowarjow rěče­ „Łaćonšćina – kmótra a pućrubarka němčiny hač do dźensnišeho“ w Budyskej Sprjewinej pensiji­

Srjedu 25.11.  9:00  Chórowy koncert „Sołobiki“ dorostoweho studija

   Serbskeho ludoweho ansambla w Lubiju

  15:00  Budyska měšćanska rada

  17:00  Přednosk „Rostliny a zwěrjata wěšćeja wjedro“ w Prožymju

Štwórtk  26.11.  15:00  Hodowne paslenje w Budyskim žónskim centrumje

Z lóštnym zhromadnym spěwanjom je so wutoru wječor w Pančicach-Kukowje lětuši posledni z cyłkownje 14 nazymskich koncertow Załožby za serbski lud zakónčił.

Pančicy-Kukow (BW/SN). Wjace hač 60 ludźi młódšeje, srjedźneje a staršeje staroby bě zawčerawšim na koncert skupiny Přezpólni w „Starej hospodźe“ přišło. Młodźi mužojo a pacholjo z klóšterskich wsow wokoło swojeho nawody Fabiana Kaulfürsta zanošowachu z jasnym, sylnym a čerstwym hłosom stare serbske ludowe spěwy, kotrež běchu sej ze Smolerjowych zběrkow a z Kraloweho huslerskeho spěwnika wubrali. Tak zaklinča mjez druhim znaty ludowy spěw „Hej witajće hólcy zdaloka“. Slědowachu mjeztym woteznate stare serbske kwasne spěwy, kajkež spěwachu na přikład we Wojerowskej kónčinje, a dalše spěwy wo camprowanju w sakskej Hornjej Łužicy, wo słódnym piwje w Křidowje (Schiedel) a Jěžowje, wo pachołomaj na słužbje w Radworju a w Pančicach a tež žortne štučki, tak wo nješwižnych mandźelskich a njeswěrnych žónskich.

Gmejnska rada wariantu za Koblicy a Wulke Ždźary wobzamknyła

Łaz (AK/SN). Za wotwodźenje swojich wopłóčkow změja domjacnosće w Ko­blicach a Wulkich Ždźarach přichodnje měsačnje dźesać eurow zakładneho popłatka a na kubikny meter 6,65 eurow płaćić. Ležownosć přizamknyć płaći 2,56 eurow na kwadratny meter. Tule tak mjenowanu wariantu 5 je Łazowska gmejnska rada na swojim zašłym posedźenju wob­zamknyła. Za wotwodźowanje wužiwać chcedźa předewšěm kanal, po kotrymž woda sama wot so ćeče. Jenož za wotležane ležownosće drje budu klumpy zasadźeć dyrbjeć.

Wo wsach na pohladnicach

Nowa Wjeska. Wjesne towarstwo Nowa Wjeska přeprošuje wšitkich zajimcow jutře, pjatk, na přednošk Pětra Lipiča. Swinjarčan porěči wo „Wsach podłu Klóšterskeje wody na pohladnicach“. Přednošk započnje so we 18.30 hodź. a wotměje so w Nowowješćanskim wjesnym klubje při sportnišću.

Na literarne popołdnjo

Choćebuz. Składnostnje 40. posmjertnin Miny Witkojc a 75. posmjertnin Mata Kosyka wuhotuje spěchowanske towarstwo Choćebuskeho Serbskeho muzeja jutře, pjatk, w 15 hodź. literarne popołdnjo w muzeju. Zarjadowanje budźe dwurěčne, zastup darmotny.

19.11.–25.11.2015: Die Tribute von Panem – Mockingjay 2: wšědnje 14:30 hodź. (nimo štw, pó a srj) a 17:15 hodź. Die Tribute von Panem – Mockingjay 2 w 3 D: wšědnje 16:15 a 19:30 hodź. | pj a so 22:30 hodź. Paranormal Activity: pj a so 22:45 hodź. Spectre: wšědnje 14:15 hodź. (nimo štw, pó a srj), 17:15 hodź. (nimo pó), pj, so a srj 19:15 hodź. | štw, nj, pó a wu 19:30 hodź. | pj a so 22.15 hodź. Er ist wieder da: wšědnje 20:15 hodź. | nj 12:15 hodź. Hotel Transsilvanien 2 w 3 D: pj, so, nj a wu 14 hodź. The Last Witch Hunter: pj a so 22:45 hodź. Ritter Trenk: nj 12:15 hodź. Hotel Transsilvanien: nj 12:15 hodź. Der Marsianer: štw, nj a wu 16.30 hodź.

Kino-ekstra: 45 Years: pó 17:15 a 20:15

Rakecy. Na wčerawši swjaty dźeń drje je so wutoru wječor Rakečan jara wjeselił a při tym přehłuboko do škleńcy hladał. Ze swojim BMWjom wón policistam krótko po połnocy na Winicowym puću napadny. Při kontroli zwěsćichu, zo bě wón wjace alkohola hač dowolene pił. Test z alkomatom wunjese 1,50 promilow. 51lětny změje so nětko wopiłstwa w na­dróžnym wobchadźe dla zamołwić a drje přichodny čas nóžkuje.

Smjerdźaca (aha/SN). Jako předsyda Towarstwa swj. Filomeny Gerat Róbl před někotrymi lětami připadnje dr. Milenu Valevu zezna, kotraž bydli mjeztym 17 lět w Němskej a na uniwersitomaj w Niederrheinje a Nürnbergu wuči, přeprosy wona Smjerdźečana do swojeje bołharskeje domizny. Gerat Róbl dojědźe sej z njej do Razgrada blisko rumunskeje hranicy, hdźež so wo nuzy ludźi w měsće z 33 000 wobydlerjemi přeswědči. Lětsa je tomu štwórty raz, zo Towarstwo swj. Filomeny z pakćikowej akciju dźěći w tamnišich syrotownjach a nuzu tradace swójby hody zwjesela.

Zo bychu wobešli korupciju a zo statne instancy rozdźělenje darow kontro­luja, załožichu tam loni Towarstwo Odyseja, kotrehož čłonaj staj tež dr. Milena Valeva a Gerat Róbl. Towarstwo, mjeztym z wunoška lońšeho Łazkowskeho beneficneho koncerta z transporterami wuhotowane, stražuje nad sprawnym rozdźělenjom darow. Tak je zaručene, zo móža so tam dźěći na wjace hač 30 městnach z pomocy z Łužicy wjeselić.

Konferenca „Domizna – identita, wěra“ w Berlinje

Prěni raz scyła su minjeny tydźeń w Berlinje zhromadnu konferencu mjeńšin přewjedli – a to w jara šěrokim zmysle. Přeprošeni běchu wusydlency, zastupnicy wšitkich štyrjoch w Němskej připó­znatych awtochtonych mjeńšin – Serbow, Danow w Němskej, Frizow a Sintow a Romow – kaž tež zastupnikow němskich mjeńšin we wukraju. Ideju k tomu měještaj zwjazkowy minister za nutřkowne naležnosće dr. Thomas de Maizière (CDU) a społnomócnjeny zwjazkoweho knježerstwa za naležnosće wusydlencow a narodnych mjeńšin Hartmut Koschyk (CSU). Přichwatali pak běchu tež reprezentanća politiki, hospodarstwa, cyrkwjow, sporta a kultury. Tak witachu mjez druhim wulkopósłancow Georgiskeje, Rumunskeje, Čěskeje republiki, Danskeje a Bosniskeje-Hercegowiny. Tež prezident Federacije narodnych mjeńšin w Europje Hans-Heinrich Hansen bě přeprošenje sćěhował. Serbow zastupowaše předsyda Domowiny Dawid Statnik.