Němsko-serbski šulski kompleks w Slepom nawjazuje na njedawny wjesny jubilej składnostnje 750lětneho wobstaća łužiskeho sydlišća w srjedźnej Łužicy.
Slepo (AK/SN). Slepjanska zakładna a wyša šula nawjazujetej na njedawny jubilej składnostnje 750lětneho wobstaća Slepoho. Na to skedźbnjatej w aktualnym hamtskim łopjenu zarjadniskeho zjednoćenstwa Slepo. K jubilejnemu lětu chcedźa chowancy šulskeho centruma rjećaz ze znajmjeńša 750 balonow nastać dać. Derje widźomne chcedźa jón potom w Němsko-serbskim šulskim kompleksu pójsnyć.
Šulerjo su nětko namołwjeni, z pisakami a seršćowcami kreatiwnje a originelnje balony wuhotować. Hotowe wuměłstwowe twórby móža w horće šulskeho centruma wotedać. K swjedźenje składnostnje oficialneho pomejnowanja šule w septembrje je předwidźane balony potom do njebja pušćić. Hišće hač do kónca měsaca, potajkim hač do 30. awgusta, móža šulerki a šulerjo swoje wuměłstwowe twórby hišće w horće wotedać.
Budyšin (CS/SN). Staroměšćanski festiwal wot 2. do 4. septembra móže so lětsa bjez wobmjezowanjow wotměć. Tele dobre poselstwo wozjewištaj Dietmar Stange a Norbert Reichelt z Budyskeho turistiskeho towarstwa na wčerawšej nowinarskej konferency w sprjewinym měsće. Wusměrjeny je festiwal předewšěm na stare město. Te po měnjenju zastupjerjow turistiskeho towarstwa mjenujcy njeje hišće tak wožiwjene, kaž by to přiměrjene było. Hesło lětušeho festiwala w sprjewinym měsće je „Woda – wuměłstwo – swěca“.
Znaju Symana Pöpela jako zahoriteho wučerja, sportowca a runje tak angažowaneho Serba na polu kultury a folklory. Předewšěm pak mje wjeseli, zo wěnuje so wón wot lětušeho nadawkej braški. Derje drje wěmy, što k wukonjenju tajkeje funkcije wšitko k tomu słuša. Wot přeprošenja hosći hač k organizowanju kwasneho dnja – k tomu hišće wěstu žiłku za humor měć a so wo dobru naladu starać – tajkile nadawk njeje drje runjewon lochki. Wězo trjebaš za to tohorunja wěste nadarjenje. Braška je móhłrjec kaž tajki „manager“ kwasa. A to zajimawe je: Njemało Němcow wobdźiwa tutu rólu braški, a někotři bychu sej tajkeho samo na swójskim kwasu přeli.
Měnju, zo móžemy dźakowni być z kóždym dorostom, kotryž so tu pola nas namaka a zo so tuta rjana tradicija dale dawa. Mam za wažne, zo sej ju – kaž tež wjele dalšich ze serbstwom zwisowacych tradicijow – wobchowamy a wažimy.
Jan Bogusz
„Serbska rěč a kultura mje wšědnje přewodźetej“ powěda Syman Pöpel z Łušća. Po studiju wučerstwa za předmjetaj zemjepis a HTD (hospodarstwo-technika-domjacnosć) w Podstupimje sta so wón z wučerjom w Radworju. Jako tajki chce zdobom serbskosć „šulerkam a šulerjam, dalokož móžno, zbližić.“ Swój wólny čas wěnuje 30lětny sportowym aktiwitam. „W lěću dojědu sej tydźensce do Sakskeje Šwicy. To je mjeztym moja druha domizna. Tam aktiwnje z přećelemi z wotpowědnym wuhotowanjom krosnuju. Skały a wšelake formy krosnowanja mje w tutym regionje jara fascinuja. Nimo toho wjele kolesuju. Tak wabi mje treningowa čara husto do Čěskeje do městačka Krásná Lípa. W zymje lubuju, so na běžkach pohibować.“
Hladanske mocy časćišo chore
Drježdźany. Přistajeni w hladanju starych a chorych w Sakskej su po datowej analyzy Chorobneje kasy technikarjow (TK) jasnje dlěje chori hač přisłušnicy druhich powołanskich skupin. Woni su loni přerěznje wjace hač dźesać dnjow dlěje wupadnyli. Mějachu-li wšitcy dźěławi loni w Sakskej w přerězku 15,2 dnjej njepřitomnosće bě to pola hladarkow a hladarjow 25,8 dnjow.
Pomocny program schwaleny
Drježdźany. Program k hnydomnej pomocy z wobjimom nimale dweju milionow eurow žałostnych lěsnych wohenjow w Sakskej Šwicy dla je sakske knježerstwo wčera schwaliło. Wot ministerstwa za wědomosć, kulturu a turizm nastorčena podpěra měri so na předewzaća hospodowarstwa a gastronomije kaž tež dalšich turistiskich posłužbarjow w regionje narodneho parka Sakska Šwica.
Žony a strukturna změna
Z městna njezboža so wotsalił
Wojerecy. Policiji je při nócnej patruli po Wojerowskim industrijnišću w nocy na njedźelu šwarnje wobškodźeny VW Touran napadnył. W nim nańdźechu 43lětneho spicy. Při dalšich slědźenjach so wukopa, zo bě muž do toho na S 101 znjezbožił a so z městna njezboža wotsalił. Kaž policisća zwěsćichu, bě wón mjez Jitkom a Nižej Wsu z dotal njeznatych přičin z jězdnje wujěł, wobchadne znamješko chětro wobškodźił a na to w kukuricowym polu stejo wostał. Wot tam bě potom prosće dale jěł. Cyłkowna škoda wučinja něhdźe 15 000 eurow.
Slepo/Dźěwin/Trjebin (AK/SN). Wutwar moderneje šěrokopasmoweje syće za spěšniši internet w Slepjanskej kónčinje dale derje pokročuje. To podšmórnychu wjesnjanosća gmejnow Slepo, Dźěwin a Trjebin w swojich gmejnskich nowinach. „Dźěła sewjernje železniskeje čary su zakónčene“, tak Slepjanski wjesnjanosta Jörg Funda (CDU). Hłubokotwarske dźěła w južnym dźělu Slepjanskeje gmejny tuchwilu dale zwoprawdźeja. Tam maja hišće hač do kónca awgusta dźěło. Po tym chce Telekom škleńčnonićowe kable do zemje zesuwać a přizamknyć.
Budyšin (CS/SN). 21. awgusta 1992 bě wosebity dźeń za Budyske kino. Dospołnje ponowjene prezentowaše so wone tehdy swojim přihladowarkam a přihladowarjam.
K wosebitej składnosći přińdźechu tehdy tež wosebići hosćo do Budyskeho kina: Wolfgang Stumph, jeho filmowa dźowka Claudia Schmutzler kaž tež Ralf Zacher běchu na premjerje swojeho paska „Go Trabi Go 2 – Das war der wilde Osten“ pódla a wuspytachu tež hnydom nowe kinowe sydła. Te běchu wšak tehdy takrjec Mercedesy mjez kinowymi sydłami. Wolfgang Stumph přepoda jako dar palčika za zahrodu ze swojim mjezwočom, kiž hraje w filmje wuznamnu rólu. Tónle suweněr sej w Budyskim kinje z toho časa njesměrnje česća.
Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (15)
Na wólbnej zhromadźiznje Serbskeje pčólnicy 2019 wuprajichu pčołarjo tehdy 34lětnej Katrin Matkec z Lejna swoju dowěru. Wuzwolichu ju za městopředsydku towarstwa, znajo tež jeje agilne organizatoriske kmanosće. Hibićiwa młoda pčołarka je so w Lejnje narodźiła, chodźeše hač do 10. lětnika w Pančicach-Kukowje do šule. Swój čas ze staršimaj tu a tam w dowolu je z nimaj wjele pućujo sej přiswojiła njezlemjeny kruty poćah k wšej Božej stwórbje.
Pola swojeho dźěda Franca Matki w Sernjanach je z časa dźěćatstwa přewšo rady pobyła. Wón bě znaty a wuspěšny pčołar. Jako šulska holca je pola njeho na zahrodźe pčołki znazdala wobkedźbowała a zhladujo wróćo so wona dopomina, kak je so stajnje na całtu z mjedom wjeseliła. Hišće dźensa ma měd za „kralowsku jědź“.