Krótkopowěsće (27.07.22)
Pomoc tež z Łužicy
Bad Schandau. 148 wobornikow je w narodnym parku Sakska Šwica rozšěrjenju lěsnych wohenjow zadźěwało. Mjez nimi su tež wjacori dobrowólni z Pančic-Kukowa a Ćiska, kiž su so wčera z Kamjenca na pomoc podali. Za město Bad Schandau su wčera nawječor katastrofowy alarm wukazali. W narodnym parku pali so tuchwilu lěs na płoninje něhdźe 250 hektarow.
Wjace hońtwjerkow w Sakskej
Drježdźany. Ličba sakskich hońtwjerkow je so w minjenych lětach nimale podwojiła. Kónc zašłeho lěta měješe wjace hač 1 200 žonow hońtwjerske wopismo, kaž jednaćel krajneho hońtwjerskeho zwjazka Martin Wißmann zdźěli. 2013 bě jich hišće 632. To wotpowěduje zwjazkowemu trendej. Podźěl hońtwjerkow je w Němskej wot lěta 2016 wot sydom na jednaće procentow přiběrał.
Celibat wučerkow zakónča
Termin wobkedźbować
Budyšin. Załožba za serbski lud skedźbnja na to, zo je 31. julija 2022 posledni termin za zapodaće próstwow wo přizwolenje srědkow załožby za projekty w lěće 2023 ze spěchowanskej sumu nad 10 000 eurami. Próstwy, kotrež po tutym terminje dochadźeja, njemóža tam wobkedźbować. Próstwy za projekty prěnjeho połlěta 2023 ze spěchowanskej sumu pod 10 000 eurami maja hišće hač do 30. septembra 2022 chwile. K tutomu terminej skónči so tež doba zapodaća próstwow wo pjenjezy ze spěchowanskeho programa „Serbska rěč a kultura w strukturnej změnje“. Wobšěrne informacije, spěchowanskej směrnicy a aktualne trěbne formulary nańdu zajimcy na internetowej stronje załožby pod .
Dróha zawrjena
Delnja Kina. Hač do 5. awgusta je Stara wjesna dróha w Delnjej Kinje při wotbóčce na zwjazkowu dróhu B 156 za nadróžny wobchad zawrjena. Tam twarja nowy płunowód. Wot zawrjenja potrjechena je tohorunja měšćanska busowa linja 13 (Marktkauf – Delnja Kina – Bórk). Při woběmaj busowymaj zastanišćomaj w Delnjej Kinje bus w mjenowany času njezastanje.
Premjera knihi
Policija (26.07.22)
Muža po zadobywanju zajeli
Wojerecy. Hnydom dwójce je so 35lětny muž z Pólskeje předwčerawšim na Wojerowskej Kolpingowej hasy do wosoboweho awta zadobył. Hižo na pózdnim popołdnju bě sej wón šěry Mercedes C 220 wupytał. Wón hižo w awće sedźeše, jako jeho wobsedźer lepi a wućěri. W nocy zadoby so kriminelny potom do šěreho Škoda Superb. W nim so jemu samo poradźi motor zaswěćić. Tež tu pak bu wón myleny a najprjedy raz pěši ćekny. Kaž Zhorjelska policajska direkcija rozprawja, so 35lětny bórze na to wróći. Mjeztym přiwołana policija jeho lepi a nachwilnje zaja. Pola skućićela naměrichu 1,18 promilow alkohola w kreji. Sudnistwo chcyše wčera rozsudźić, hač muža do přepytowanskeje jatby tyknu. Wo wuslědku rozsuda policija žane informacije njepoda.
Najstarša Němka bydli w Budyšinje
Na diskotece kuntworow minjeny kónc tydźenja w Salowje je mjez ...
Pčołki dawaja móc a skrućeja elan
Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (7)
Znaty Pěskečanski pčołar Beno Pólk narodźi so w druhim lěće Druheje swětoweje wójny jako najmłódše ze sydom dźěći. Derje so wón dopomina, što rěka w chuduškich poměrach, ale přiwšěm z lubosću maćerje kubłany wotrosć. Nan Jan Pólk so hakle 1949 z wójnskeje jatby nawróći.
Při kóždym wjedrje nóžkowaše mały Beno ze šěsć dalšimi Pěskečanskimi dźěćimi do Njebjelčanskeje šule. Ze 14 lětami poda so do Drježdźan, zo by so na dróhotwarca wukubłał. Po dwěmaj lětomaj złoži tam fachowe pruwowanje a bu w Kamjenskim dróhotwarskim zawodźe přistajeny. 47 lět je tam hač do wuměnkarskeje staroby dźěłał. W lěće 1965 woženi so z Angelu Koklic ze Smjerdźaceje.
Krótkopowěsće (26.07.22)
Wulkowoheń dale howri
Choćebuz/Falkenberg. Wot dźesać na 800 hektarow w běhu jednoho dnja je so wulkowoheń blisko města Falkenberga (wokrjes Łobjo-Halštow) wupřestrěł. Wohnjowa wobora měješe połoženje dźensa rano za „jara napjate“. Płomjenja pod kontrolu hišće nimaja. Wosebje potrjecheny je region Kölsa-Siedlung, hdźež bě rano 152 wobornikow zasadźenych. Prěni wobydlerjo tež z Rehefelda dyrbjachu hižo wčera swoje chěže wopušćić.
Předstaja tudyše ekoratarjenje
Drježdźany. Mnohostronsku paletu zežiwjenskeho hospodarstwa prezentuja wšelacy wustajerjo a Hospodarske spěchowanje Sakska tzwr na sakskim zhromadnym stejnišću na „Bio Fach“, swětowych wodźenskich wikach za biožiwidła. Hewak w februarje wotměwaca so ekspozicija budźe lětsa „lěćne wudaće“, wot 26. hač do 29. julija w Nürnbergu. Pódla je tež bio-regio-modelowy region Łužica.
Wučbu pozdźišo započinać?
Policija (25.07.22)
Transporter přećežki był
Wóspork. Sobotu popołdnju policiji zdźělichu, zo při awtodróze A 4 pola Wósporka něchtó twaršćizny z transportera mjeta. Zo jězdźidło tam steješe pak měješe hinašu přičinu. Ford bě nimale dwójce tak ćežko nakładźeny kaž dowolene. Tohodla bě so jedne z kolesow skóncowało. Zo móhł šofer rezerwowe koleso přišrubować, dyrbješe najprjedy dźěl nakładowanych twaršćiznow z awta wzać, štož je k iritacijam nimo jěducych šoferow wjedło. Po reparaturje a překładowanju twaršćiznow na hinaše awto smědźeše 32lětny pólski wodźer dale jěć. Za swój delikt pak změje wón tučnu pokutu płaćić.
Wustawki a sport tema radźićelow byli
Hórki (JK/SN). Tradicionalnje přewjedźe Chróšćanska gmejnska rada swoje poslednje posedźenje do lětnjeje přestawki w domje wohnjoweje wobory w Hórkach. Minjeny štwórtk tomu zaso tak bě a na dnjowym porjedźe stejachu wjacore wažne temy, wo kotrychž mějachu do dowoloweho časa rozsudźić.
