K 200. narodninam narodneho budźićela, wědomostnika a wudawaćela Serbskich Nowin Jana Arnošta Smolerja (Pokročowanje a kónc)
Předwidźany studij ewangelskeje teologije w Lipsku znjemóžni Janej Arnoštej Smolerjej přikaz pruskeho krala, zo maja wšitcy jeho staćenjo w kraju studować. Tak poda so wón po jutrach 1836 do Wrócławja. Na tamnišej sławnej uniwersiće běchu tehdy prěnju fakultu slawistiki w Pruskej wotewrěli, štož bě za dalši žiwjenski puć Smolerja jara wužitne. We Wrócławju nańdźe wón bywšich serbskich sobušulerjow, kaž Delnjoserba Jan Boguchwała Markusa ze Zakrjowa. Kaž Smoler je tón pozdźišo zběrku serbskich ludowych pěsnjow za wupisanje Hornjołužiskeje towaršnosće wědomosćow w Zhorjelcu zapodał. Smolerjowa zběrka pak bu mytowana a 1841 a 1843 ćišćana. Markus, Julius Eduard Wjelan ze Slepoho, Jan Awgust Warko, syn Běłowodźanskeho wučerja a po studiju farar w Jabłońcu, kaž tež Sigismund Rjeda z Dołheje Boršće studowachu tohorunja ewangelske duchownstwo.