Na forumje SN wo rubježnym zwěrjeću horco diskutowali

Konjecy (SN/MWj). W přirodźe wuchodneje Sakskeje je wjelk kruće zakótwjeny, mjez wobydlerjemi pak je lědma akceptowany. Tohodla měł so wjetši ćišć na politikarjow wukonjeć, zo bychu woni tele połoženje skónčnje spóznali. Tole je rezimej foruma Serbskich Nowin wčera w Konjecach, na kotryž je wjace hač 40 zajimcow přichwatało, nimale wšitcy přećiwnicy wjelka. Jim napřećo sedźeše sobudźěłaćerka sakskeho kontaktneho wjelčeho běrowa Vanessa Ludwig. Wona rozłoži dźěławosć wjelčeho managementa, poda tójšto ličbow wo němskich a wuchodosakskich wjelčich črjódach a wěnowaše so tež Róžeńčanskej, na kotrejež konto dźěše minjene tři lěta 45 nadpadow na stadła wowcow. Šefredaktor Serbskich Nowin Janek Wowčer měješe jako moderator njelochki nadawk, kritiske hłosy z připosłucharstwa rjadować.