MIDAS so wuwiću nowych medijow přiměriła
Ostrava (SN/JaW). Europske zjednoćenstwo dźenikow w mjeńšinowych a regionalnych rěčach (MIDAS) je so wuwiću nowych medijow přiměriło. Wotnětka smědźa so internetne nowiny z čłonom zwjazka stać. To je hłowna zhromadźizna MIDAS pjatk w Ostravje, hdźež so zastupnicy mjeńšinowych dźenikow scyła prěni raz zetkachu, jednohłósnje wobzamknyła. „Kročel, so internetnym medijam wotewrěć, je nuznje trěbna, wšako hižo nětko mnohe z našich čłonskich nowin dale a bóle w interneće publikuja a mjenje w ćišćanej formje“, rjekny sobuzałožer MIDAS a bywši šefredaktor słowjenskeho dźenika w Italskej Primorski Dnevnik Bojan Brezigar. Hižo na lońšim zetkanju w Barcelonje běchu wo tym nadrobnje debatowali.
