Prěni digitalny forum Serbskich Nowin z prapremjeru filma wuspěšny
Budyšin (SN/MiR). Prěnička Serbskich Nowin – prěni digitalnje přewjedźeny forum serbskeho wječornika – je so zešlachćiła. Tak zjima šefredaktor SN Janek Wowčer wčerawši wječor z hnydom třomi premjerami – prěni wirtuelny forum SN, prapremjera krótkofilma „Sorbenkind“ a simultany přełožk, kotryž zaruči nimo Janeka Wowčerja redaktor SN Bosćan Nawka. „Něhdźe 320 ludźi je forum SN před wobrazowkami slědowało. To mam za wulki wuspěch“, tak Wowčer po zarjadowanju. Z podpěru Michała Cyža a Budyskeho studija MeKoSax su wječor přihotowali a přewjedli. Kaž Cyž zdźěli, bě na wšě 200 ličakow přizjewjene a wjetšina z nich bě přez cyły wječor online.
W srjedźišću foruma steješe krótkofilm Lipšćanskeje režiserki Patricije Kaube „Sorbenkind“. Skulojćeny bu wječor z rozmołwnym kołom, kotrehož serbske přinoški buchu simultanje do němčiny přenjesene. Přełožk bu nimo toho tež we formje podtitulow poskićeny.